Yeremia 26
26
Abandu beenya okhwira Yeremia
1Haho khukhuchaaka khwokhuruka khwaYehoyakimu waYosia, omuruchi waYuda likhuwa lino liarula khuMWAMI; mbu 2Kano niko aka OMWAMI aboola; mbu Sinjila mulwanyi Iweinzu yOMWAMI, nosunjila abomumataala kosi kaYuda abeetsa okhwinama munzu yOMWAMI, amakhuwa kosi aka ekhulaka okhubaboolela; orachweya okhuboola likhuwa kata elala ta. 3Haundi balahulila, nibashiukhana buli mundu okhurula khunjilaye imbii; mbu nzikalukhasie oburaleera obubii obwa ereelekhwo omwoyo okhubakholela khulwa obubii bwebikhole biabwe. 4Mana obasunjile mbu Kano niko aka OMWAMI aboola; mbu Nimuba nimurambulila ta, okhuchenda mumalako kanje aka ndara imbeli weenywe, 5nokhuhulila amakhuwa kabasumba banje abanabii aba emurumilanga, kata nilumilila okhubaruma, ne shimwabahulila ta; 6kho ndalakhola inzu yino yibe shinga Shiilo; litookho iino nalio ndalalikhola libe eshilaka munwa khumahanga kosi akomushialo.
7Nabo abakuhani nabanabii nabandu bosi bahulila Yeremia naboola amakhuwa ako munzu yOMWAMI. 8Mana olwa Yeremia yali namalile okhuboola kosi aka OMWAMI yali namulachile okhuboolela abandu bosi, abakuhani abo nabanabii nabandu bosi bamuhamba, nibasunga mbu Oleerwa bwirwa 9Nishiina eshichilile norumbulila muliira liOMWAMI, ori Inzu yino yilafwana shinga Shiilo, nalio litookho lino lilakwa likunda, aharali abamenyamwo? Ne abandu abo bosi bali nibakhung'aaniile Yeremia munzu yOMWAMI.
10Olwa abakhulundu baYuda bahulila amakhuwa ako baiikulukha nibarula ebunanzu yomuruchi okhuula khunzu yOMWAMI; nibeekhala mubwinjililo bwEshilibwa Eshiyia shieinzu YOMWAMI. 11Mana abakuhani nabanabii nibasunjila abakhulundu tsana nende abandu bosi, bari Omundu uno akwanile okhufwa; okhuba arumbuule amakhuwa nafukula litookho lino, shinga olwa muhuliile namarwi keenywe.
12Mana Yeremia nasunjila abakhulundu bosi nende abandu bosi, ari OMWAMI yaruma okhurumbulila inzu yino nelitookho lino, amakhuwa ako kosi aka muhuliile. 13Kho bulaano kasie tsinjila tsieenywe nebikhole bieenywe, nimuhulila ' omwoyo kwOMWAMI Nyasaye weenywe; mana OMWAMI aleekalukhasia nalekha obubii obwa yali narumbuule khwinywe. 14Nasi, lole, endi mumakhono keenywe; mukholele shinga olwa muluutsi mbu namalayi akakhoyeele. 15Nebutswa mumanye tieeli mbu nimuba nimunzira muleetuukha amatsayi koubula eshikha khumirwe chieenywe, khandi khwitookho lino nokhubamenyangamwo; okhuba toto mwene OMWAMI yaruma okhuboola amakhuwa ako kosi mumarwi keenywe.
16Mana abakhulundu nabandu bosi nibasunjila abakuhani nabanabii mbu Omundu uno shiakwanile okhufwa ta; okhuba abooleelaane nineefu muliira liOMWAMI Nyasaye weefwe. 17Habwenaho abandi abokhubakofu beshialo nibabuukha, nibasunjila abomukhung'aano kwosi kwabandu, bari 18Mika oweMorashetsi yalakula mundaalo tsiaHezekia omuruchi waYuda, nasunjila abandu bosi baYuda ari Kano niko aka OMWAMI omwene mahe aboola; mbu
Sayuni lilalimwa shinga omukunda;
Yerusalemu lilakwa amalikulukho,
nolukulu Iweinzu tsana shinga omutsuru okwokhushikulu.
19Ne Hezekia omuruchi waYuda nabaYuda bosi bamala bamwire noho? Mbula, shiyaria OMWAMI, nasaba OMWAMI obukoosia, mana OMWAMI niyeekalukhasia nalekha obubii obwa yali niyarumbuule khubo? Nikhukhola khurio khwakheeleerela obubii obukhongo.
20Ne yaliho omundu owarumbulila muliira lOMWAMI, mbu Uria waShemaya oweKiriatsiyearimu; naye yarumbulila litookho lino neshialo shino amakhuwa malala nakaYeremia; 21mana olwa Yehoyakimu omuruchi halala nabalulube, nabakhulundu bosi, nibahulila amakhuwake, omuruchi yakhaaba okhumwira; ne olwa Uria yahulila yaria, niyeelukha natsia eMisiri. 22Naye Yehoyakimu omuruchi yaruma abandu eMisiri, mbu Elinatsani waAlchibori nabandu bandi ninaye halala, okhutsia eMisiri. 23Nabo nibarusia Uria muMisiri, nibamuyila ewaYehoyakimu omuruchi; naye yamwira nolukanga, nasukuna omulambokwe mubilindwa biabandu butswa.
24Nebutswa Ahikamu waShafani yamuterela Yeremia, mbu baleshe okhumuhaana mumukhono kwabandu okhwirwa.
Currently Selected:
Yeremia 26: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
