Yeremia 22
22
1Kano niko aka OMWAMI aboola; mbu Kholomokha otsie khunzu yomuruchi waYuda, nosunjilayo likhuwa lino; 2mbu Hulila likhuwa liOMWAMI, iwe omuruchi waYuda, owikhaale khushifumbi shiaDaudi; iwe, nabasumbabo, nabandubo abeenjililanga mubilibwa bino. 3Kano niko aka OMWAMI aboola; mbu Yaasinjie habwene nimukhola akobulunjishi, nimuhonia oyo ouyaayilwe mumukhono kwa oyo oumumiina. Murabakholela obubii kata akamayukuba abali abarende nababisandu nabakhasi abalekhwa, kata mureebeenia amabanga kababula eshikha habundu hano ta. 4Okhuba nimuba nimukhola likhuwa lino toto, kho abaruchi abeekhala khushifumbi shiaDaudi baleenjilila mubilibwa bieinzu yino, nibachendela mumakaari nokhufarasi, bo abeene nabasumba babwe nabandu babwe. 5Nebutswa nimuba nimurahulila amakhuwa kano ta, kho OMWAMI aboola mbu Nditsuba khwisie omwene mbu inzu yino yilakwisibwa likunda. 6Okhuba kano niko aka OMWAMI aboola khukeinzu yomuruchi waYuda; mbu
Oli khwisie shinga Gileadi, shinga obutenje bwaLebanoni;
ne toto mwene ndalakhukwisia eshitsiimi,
amataala akaramenywamwo ta.
7Ndalaahula abokhutibia okhukhuyinga,
buli mundu nebimanulwabie;
nabo balirema emisiitachio emilobole nibachisukuna mumulilo.
8Amahanga amanji kalabira heetookho lino, nibasungana buli mundu nowashie, bari Nishiina eshiachila OMWAMI nakholela litookho lino likhongo ario? 9Mana balakalusia mbu Shichila balekha indakano yOMWAMI Nyasaye wabwe, nibeenamila abanyasaye bandi nibabakhalabanila.
10Muralilila omufu, kata okhumwikhuula ta;
ne mumulilile butinyu oyo ourula natsia,
okhuba shialakalukha tawe,
okhulola eshialo eshia yeebulilwamwo.
11Okhuba kano niko aka OMWAMI aboola khukaShalumu waYosia, omuruchi waYuda, owakalukha muburuchi bwaYosia samwana, owarula hano; mbu Shialakalukha hano khandi ta; 12ne habundu tsana ewa yayilwa niyaarwa, alafwilayo, kata shialalola eshialo shino khandi ta.
13Woowe khumwenoyo ouchiumbakha inzuye mukhubula obulunjishi,
nebisikabie mukhubula obukhalachi bwatoto;
oukhosia owashie emilimo sila omurungo,
naramuheelesia omushaarakwe ta;
14ousunga mbu Enyumbashe inzu ingali,
nebisika ebiiyangu ebiahekulu nafutulamwo amatirisha,
nachifwimbila tsimbaho tsiemisiita,
nachibakha iranji iranzayi.
15Okaala mbu olaba omuruchi shichila oshilaanila emisiita?
Ne so shiyaliitsanga, nanywa,
nayaasinjia nakhola akobwatoto?
Mana akeke nikakaasa.
16Yayaasinjia eshifune shiabasandile nabatakha;
mana nikakaasa.
OMWAMI areeba mbu
Okhwo shikhwali nikhwo okhumanya isie?
17Nebutswa tsimonitsio nomwoyokwo bichooma khunganga yobukaatii yonyene nokhuraatsia amatsayi kababula eshikha,
nokhukhola akobusandii nakamahababa.
18Khulwako, kano niko aka OMWAMI aboola khukaYehoyakimu waYosia, omuruchi waYuda; mbu
Shibalamwikhuula,
bari E, mwana weefwel kata mbu E, mbootswa! Ta;
shibalamwikhuula,
bari E, omwami! Kata mbu E, owoluyali! Tawe.
19Alayabilwa shinga isishili olwa yiyabilwa,
nakhweswa nasukunwa elwanyi webilibwa bieYerusalemu.
20Niina muLebanoni, olanjilisie;
chinga omwoyo eBashani;
lanjilisia noli eAbarimu;
okhuba abatiabo bosi bamalilaanwe.
21Ndakhusunjilakhwo mundaalotsio tsiobwale,
nebutswa wasunga mbu Shindalahulila ta.
Eshio neshiimashio okhurula khubwanabwo,
mbu shiohulilanga omwoyo kwanje ta.
22Omuyeka kulaaya abaayibo bosi,
abatiabo nabo balatsia mubuhambe;
nilwo olwa olatiilwa tsisoni nofwimbwa omurwe
khulwa obubiibwo bwosi.
23E iwe oumenya eLebanoni,
oukhola eshitsushio mumisiita,
olabinda muno muno olwa inumwa yilakhutiila,
obusaalili shinga obwomukhasi oulumwa okhwibula!
24OMWAMI aboola mbu Isie uno! Oyo Konia waYehoyakimu omuruchi waYuda, kata niyakhaba nali ingaka yeshibalikho eyokhumukhono kwanje musaatsa, khane ndakhakhurimuakhwo; 25ndalakhuhaana mumakhono ka abo abayiima obulamubwo, mumakhono ka abo aba oriitsanga, mbu mumukhono kwaNebukhadineza omuruchi waBabeli, nomumakhono kabaKalidayo. 26Khandi ndalakhukhuyunga, halala nende mawo owakhwibula, nimusukuna mushindi shialo, eshia murayeebulilwamwo ta; ne mushieneshio mulafwilamwo. 27Ne khushialo eshia baliibungwa amahofu okhukalukha khushio, shibalakalukhayo ta.
28Omundu oyo Konia, ali butswa inyungu eyatiishe, eyilechelwe, noho?
Mbu inyungu eyirachamisia omundu yesi ta?
Nishiina eshichila nakhuyungwa, ye nolwibulolwe,
nibasukunwa mushialo eshia baramanya ta?
29O, eshialo, eshialo, eshialo!
hulila likhuwa liOMWAMI.
30Kano niko aka OMWAMI aboola;
mbu Handiika khumundu uno mbu nomukumba,
mbu nomundu ouralikaasa mundaalotsie ta;
okhuba abulaho owokhulwibulolwe oulikaasa niyeekhala khushifumbi shioburuchi shiaDaudi,
okhuruka khandi muYuda ta.
Currently Selected:
Yeremia 22: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
