Yeremia 21
21
Obulakusi bwobumululwi bwaYerusalemu
1Likhuwa elieetsela Yeremia okhurula khuMWAMI, olwa omuruchi Zedekia yamurumila Pashihuri waMalikhiya, naZefania waMaaseya omukuhani, ndielino; 2mbu Nochama, okhureebele ewOMWAMI; okhuba Nebukhadineza omuruchi waBabeli akhuseerile; haundi OMWAMI alakhukholela shinga ebikholebie biamakana biosi olwa bili, namurusia khwifwe.
3Mana Yeremia nabasunjila mbu Mulaboolela Zedekia muri nanwa; 4mbu Kano niko aka OMWAMI, Nyasaye waIsiraeli, aboola; mbu Lole, ndalashiukhasia ebimanulwa bielihe ebili mumakhono keenywe, ebia museerelanga omuruchi waBabeli nende abaKalidayo abamwikaliile nibali elwanyi wolukoba; ne ndalabakhung'aasia halala mwitookho elo mukari. 5Nasi omwene ndalamuseera nomukhono okunyiililwe, omukhono kwamaani, mubusinyishi nomubululu nomuburima obunji. 6Ne ndalarootsa abamenyanga mwitookho lino, ari abandu ari emiruko; balafwa khulwa oluumbe olukhongo. 7Mana olunyumakhwo, OMWAMI aboola, ndalahaana Zedekia omuruchi waYuda, nabasumbabe, nende abandu abakhaba nibatong'ile mwitookho lino inyuma woluumbe nolukanga neinzala, mumukhono kwaNebukhadineza omuruchi waBabeli, nomumukhono kwabasuku babwe, nomumukhono kwa abo abayiima obulamu bwabwe; naye alabakhupa nolukanga; shialabasaalilila, kata okhubatiililwa eshisa, kata okhubabeela tsimbabasi ta.
8Ne khubandu bano, olabasunjila mbu Kano niko aka OMWAMI aboola; mbu Lole, era imbeli weenywe injila yobulamu nende injila yokhufwa. 9Outong'a mwitaala lino alafwa khulwa olukanga, nokhulwa inzala, nokhulwa oluumbe; habula ourulamwo, niyeelushila ewabaKalidayo abamwikalila, ye alaba mwoyo, ne obulamubwe bulaba eshiyaayoshie. 10Okhuba enyumiliye litookho lino tsimoni nindifukula, khulwa amabii, amalayi ta; nilwo olwa OMWAMI aboola. Lilahaanwa mumukhono kwomuruchi waBabeli, naye alalisamha nomulilo.
Obulakusi bwokhufukula abaruchi baYuda
11Ne khumakhuwa keinzu yomuruchi waYuda, hulile likhuwa liOMWAMI; mbu 12Iwe inzu yaDaudi, kano niko aka OMWAMI aboola;
mbu Yaasinjia habwene mumabwibwi,
nomuhonia oyo ouyaayilwe mumukhono kwa oyo oumumiina,
obululu bwanje buleshe okhurubukha shinga omulilo
nibusamba okhuula olwa abulaho ounyala okhubusimia
khulwa obubii bwebikhole bieenywe.
13Lola, ekhuyinga, iwe oumenya mwibanda,
nawe lichina liomuhololookhwe,
nilwo olwa OMWAMI aboola;
inywe ababoola mbu Niwina oulakholomokha okhukhuseera?
Kata niwina ouleenjila mubimenyo bieefwe?
14OMWAMI aboola mbu
Ndalamukuuma shinga ebiamo biebikhole bieenywe olwa bikhoyeele;
ndalahambia omulilo mumutsuru kwalio,
nakwo kulamala biosi ebilibotokhaane.
Currently Selected:
Yeremia 21: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
