Yeremia 20
20
Pashihuri alakwa eshilaka munwa khulwa okhumuboha Yeremia
1Haho Pashihuri waImeri omukuhani, owali omukali omukhulundu munzu yOMWAMI, yahulila Yeremia narumbulanga amakhuwa ako. 2Mana Pashihuri namunywekha Yeremia omunabii, niyeenjisia ebilenjebie mumakokolo akali mushilibwa shiemukulu shiaBenyamini, eshili enanzu yOMWAMI. 3Mana mukamba, olwa Pashihuri yarusia Yeremia mumakokolo, Yeremia yamusunjila mbu OMWAMI shiakhulanganga eliira mbu Pashihuri ta, habula Oburisii-tsimbekatsiosi. 4Okhuba kano niko aka OMWAMI aboola; mbu Lola, ndalakhukhola obe eshiriisio khwiwe omwene, nokhubeetsabo bosi; balakwa khulwa olukanga lwabasuku babwe, nawe olarakhwo butswa tsimoni. Khandi ndalahaana Yuda yosi mumukhono kwomuruchi waBabeli, naye alabaara nabayila eBabeli, nokhubeera nolukanga. 5Khandi ndalahaana obuyinda bwosi bwelitookho lino, biosi ebia lieenyoolela, ebiolukoosi bialio biosi, kata nende amabiikho kosi kabaruchi baYuda, ndalabihaana mumukhono kwabasuku babwe, abalabayaaya, nibabahamba, nibabayila eBabeli. 6Nawe, Pashihuri, halala nende bosi abamenya munzuyo, mulatsia mubuhambe; oloola eBabeli, ne ebweneyo olafwilayo, ne ebweneyo olayabilwayo, iwe omwene nabeetsabo bosi, aba warumbulila akobubeeyi muliira lianje.
Olwikhuulu lwaYeremia
7E OMWAMI, wangaatia,
nasi ningaatibwa;
washila amaani,
niuhula.
Engwile eshiokhutseshelwa eshiteere tulu;
abandu bosi banyokhoosia.
8Okhuba buli olwa emboola, enanjisia mbu
Amayukuba nobumululi mbiebio!
Okhuba likhuwa liOMWAMI lingwiliile eliokhunyekwa nokhuchaywa eshiteere tulu.
9Ne nimba nisunga mbu shindalamuralakhwo kata okhuboolakhwo muliiralie ta
kho mumwoyo kwanje muba shinga omulimwo omulilo okwakhanga,
nikwikalilwa mumakumba kanje,
ne enjoonyile okhukusibila;
shinyala ta.
10Okhuba embulilanga obumoonyi obunji,
noburiisii tsimbeka tsiosi.
Mwikaane! Khumwikaane!
nolwa abeetsa banje baboolanga,
olwa bayiichilanga okhwisichirala khwanje;
bari Haundi yakhanyala okhubatsilisibwa,
mana khulamuhula nikhumala eshikwoli khuye.
11Nebutswa OMWAMI ali ninasi, nali omululu owamariisla;
niko akachila abasandii banje baleesichirala kata shibalahula ta.
Balafwimbwa omurwe muno kata akabwe shikalakaasa ta;
okhufwolwa khwabwe okhurahwaho shikhuleebililwa tawe.
12E OMWAMI omwene mahe, outeemanga abalunjishi,
iwe oulolanga amayililisio nende omwoyo,
fuchiilila endole eshikwolishio khubo;
okhuba ereele eshifune shianje mumukhonokwo.
13Mumwimbile OMWAMI;
mumwitsoomie OMWAMI;
okhuba wahoniye omwoyo kwomutakha mumukhono kwabakholi bobubii.
14Inyanga eyo eya ndeebulilwakhwo yibe mushilaamo shiobubii;
inyanga eya mama yanzibulilakhwo yileshe okhulangwa mbu eyeikhabi.
15Omundu oyo abe mushilaamo shiobubii owakhupila papa omunwa mbu Omwana omusiani akhwibuliilwe,
nachila natsatsahala.
16Omundu oyo abe shinga amataala tsana aka OMWAMI yakwisia harali tsimbabasi ta;
ahulile tsimbungu mumabwibwi,
namakhu mushiteere,
17shichila shiyayanzira nishili munda ta;
khane mama yakhabeele eshilindwa shianje,
olubeleshelolwe niluba olukhongo tsindaalo tsiosi.
18Nishiina eshiachila nirula munda,
okhulola amanyakhano namasila,
nimalila tsindaalo tsianje musoni?
Currently Selected:
Yeremia 20: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
