Yeremia 19
19
Eliechesio lieisiongo inzatishe
1Kano niko aka OMWAMI yaboola; mbu Tsia okule isiongo yelitoyi eyomulonji, mana olanje abokhubakofu babandu nabokhubakofu babakuhani, 2murule ninabo, mutsie khwibanda liomwana waHinomu, elili habwinjililo bweShilibwa shieTsinjio; mana orumbulileyo amakhuwa aka ndalakhuboolela; 3osunje mbu Hulile likhuwa liOMWAMI, inywe abaruchi baYuda nabamenyanga muYerusalemu; kano niko aka OMWAMI omwene mahe, Nyasaye waIsiraeli, aboola; mbu Lole, ndalakhupia habundu hano khushibii, eshilachila buli mundu yesi ouhulilakhwo alahuka okhushila. 4Shichila bandekha, niboonoonia habundu hano, nibasambilamwo abanyasaye bandi amalesi kelibuuliesi, abanyasaye aba baramanya ta, kata bo kata abakuuka babwe kata abaruchi baYuda; nibeetsusia habundu hano amabanga kababula eshikha; 5niboembakha habundu aheechingu haBaali okhusambila abaana babwe mumulilo babe emisango emisambe khuBaali; ne ako shindalakakhwo, kata okhusunga, kata shikeenjila mumapaaro kanje ta. 6Kho OMWAMI aboola mbu Khulwako, lole, tsindaalo tsiitsanga olwa habundu hano shihalalangwa mbu Tofetsi, kata Libanda liomwana waHinomu khandi ta, habula Libanda liObwiri. 7Ndalafubia tsiyemi tsiaYuda naYerusalemu habundu hano; ndalachila nibakwisibwa nolukanga imbeli wabasuleu babwe, khandi namakhono ka abo abayiima obulamu bwabwe; nemilambo chiabwe ndalachihaana chibe ebiliibwa biamanyonyi akomwikulu nende tsisolo etsiomushialo. 8Ndalakhola litookho lino libe eliamariisia, eliokhunyokhoosibwa; buli mundu oubirayo alariisibwa, nanyokhoosia khulwa amanyasio kalio kosi. 9Ndalachila nibalia inyama yemibili chiabaana babwe abasiani neinyama yemibili chiabaana babwe abakhaana; kata balalia buli mundu inyama yomubili kwomwitsawe, mubwikalilwi nomumatinyu, olwa abasuku babwe nende abo abayiima obulamu bwabwe balabasandia.
10Mana olaaraka isiongo tsana, abandu aba otsia ninabo nibalola, 11nobasunjila mbu Kano niko aka OMWAMI omwane mahe aboola; mbu Nolwa ndalaara abandu bano nelitookho lino, shinga omundu olwa yaara isiongo yomulonji, eyiranyala okhukasibwa khandi ta. Balayabilanga abafu muTofetsi, shichila habundu undi halabulaho. 12OMWAMI aboola mbu Nolwa ndalakholela habundu hano, nabamenyangamwo, ningwisia litookho lino okhufwana shinga Tofetsi. 13Kata tsinzu tsieYerusalemu, netsinzu tsiabaruchi baYuda, etsioonoonekha, tsilaba shinga habundu hano haTofetsi; mbu tsinzu tsiosi etsia basambilanga amalesi kelibuuliesi khubilama biatsio khulihe liosi liomwikulu, nibatsushila emisango chiokhutsushila khubanyasaye bandi.
14Mana Yeremia narula eTofetsi, ewa OMWAMI yali namurumile okhurumbula amakhuwake; nasinjila mulwanyi Iweinzu yOMWAMI, nasunjila abandu bosi ari 15Kano niko aka OMWAMI omwene mahe, Nyasaye waIsiraeli, aboola; mbu Lole, ndalaleera khwitookho lino nokhumataala kalio kosi, amabii ako kosi aka ndarumbula khulio; shichila boomia amakosi, mbu baleshe okhuhulila amakhuwa kanje.
Currently Selected:
Yeremia 19: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
