Yeremia 2
2
OMWAMI asaaya Isiraeli, abali nibakalukha inyuma
1Likhuwa liOMWAMI lianzitsila, liri 2Tsia orumbule, abeYerusalemu nibahulila, ori Kano niko aka OMWAMI aboola; mbu
Ekhwitsulilanga, obuheelibwo noshili omubuukha,
obuyanzibwo noli omweha;
shinga olwa walondana ninasi mushitsiimi,
mushialo eshiraraakwakhwomwo ta.
3Isiraeli yali omutakatifu wOMWAMI,
mbu eshirongole shielichesalie;
abaliakhwo bosi bali neshikha;
amabii kabakwila;
nilwo olwa OMWAMI aboola.
4Hulile likhuwa liOMWAMI, inywe abeinzu yaYakobo, neenyu mwesi abebilibwa bieinzu yaIsiraeli. 5Kano niko aka OMWAMI aboola; mbu
Nobumayaanu shiina obwa abakuuka beenywe banyoola mwisie obwachila nibarulakhwo nibatsia ehale,
nibalonda amakhuwa kabutswa nibakwa ababutswa?
6Kata shibareeba mbu OMWAMI ali heena owakhutikulusia nakhurusia mushialo shiaMisiri? ta;
oyo owakhwimilila mushitsiimi,
mushialo eshikhaya eshilimwo amako,
mushialo eshibulamwo ifula, eshieshiilima eshimali ti,
mushialo eshia omundu yesi yesi arabirakhwomwo ta,
omwa omundu yesi yesi aramenya tawe.
7Nasi ndamuusia mushialo shieinzikura,
mbu muliitsenje khubiamo biashio, nobulayi bwashio;
nebutswa olwa mweenjilamwo, mwoonoonia eshialo shianje,
nimukwisia obulaame bwanje eshisinyo.
8Abakuhani shibareeba mbu OMWAMI ali heena?
Ta, kata abasitsa khukamalako nabo bangorwa;
abaayi babandu nabo bakhaya,
abanabii nibarumbulila Baali,
nibalonda amakhuwa akabula obukhoonyi.
9Ne niko akachila nishifunaana nineenywe,
nilwo olwa OMWAMI aboola;
khandi ndalaflmaananga nende abeetsukhulu beenywe.
10Kho yambushe mutsie khunguku tsieKitimu, mulole;
kata rumane eKedari, munoonelesie;
mulole niliba niliikholile elifwana lirio nohomba.
11Liliho lihanga eliakalula abanyasaye balio,
kata olwa baralikhwo nyasaye toto ta?
Nebutswa abandu banje bakalula oluyali lwabwe mukhufwana khweshieneshio eshibula obukhoonyi.
12Iwe likulu, huka khukano nong'ang'aala;
orie okhuria khwamakana, nofwa omwoyo muno;
nilwo olwa OMWAMI aboola.
13Okhuba abandu banje bakholile amabii kabili;
mbu bandekha isie, eshinoko shiamatsi amalamu,
nibeeyabila abeene tsingulu,
tsingulu tsinzatishe,
etsia amatsi karanyala okhutong'amwo ta.
14Khane Isiraeli nomusumba?
Yeebulwa mubusumba noho?
Ne akwile eshioluyiitsi mbushiina?
15Tsitalanyi tsiamuhoolelakhwo, nitsichinga emioyo;
tsioonoonia eshialoshie;
amataalake kakwisibwa amakunda, aharali abamenyamwo ta.
16Khandi abandu beNofu nabeTahapanesi nabo bamukhupa olukuma khulwotosi.
17Shiwayeechemela kano omwene olwa wamulekha OMWAMI Nyasayewo owali nakhwimililanga injila?
18Ne bulaano obeele orie khunjila eyitsia eMisiri,
okhunywa amatsi komwalo kwaNaili?
Kata obeele orie khunjila eyitsia eAshuru,
okhunywa amatsi komwalo kwaEufurate?
19Tsimbiitsio etsiene tsilakhukuuma,
okhushiukhanakhwo nakhwo khulakhukondeshela.
Kho olole, nomanya shinga olwa okholile likhuwa libii khandi lilulu,
olwa omuleshile OMWAMI Nyasayewo;
okhuria isie khubula mwiwe;
niIwo olwa Omwami aboola, mbu OMWAMI omwene mahe.
20Okhuba khale muno wafunaka likokololio nokhalaka ebibohelobio,
nosunga mbu Shindalabeetsanga omusumba khandi ta.
Kata khubuli shikulu eshirambi nomushiinikha shiabuli musaala omutendeemu weenama shinga omutamba.
21Nebutswa ndakhuraaka noli omutsabibu omulayi muno,
imwo yene niyili habwene yosi.
Kho okholile orie noshiama,
nokwa omutsabibu omunabulimo?
22Okhuba kata niwiyosilia amakaati, niwikhoonyela isabuni inyinji,
ne eshipala shiobumayaanubwo shishiliho imbeli wanje;
nilwo olwa Omwami NYASAYE aboola.
23Oboolanga orie, mbu Shindayoonooneeshe ta;
shindalondile emiBaali ta?
Henga injilayo mwibanda;
manya eshia wakholile shinga olwa shili.
Oli ingamia inyangu eyiilukhanga eyi nende eyi;
24isishili eyanabulimo eyanala eshitsiimi,
eyiheesela buheesela khulwa obwikombi munduukho yayo; ouchikaya niwina?
Ouchikhaaba aleshe okhuchoonya; alachinyoola mumwesi kwayo.
25Wilinde ebilenje, bileshe okhubula ebilaaro,
nende olumililo, luleshe okhuhulila obuloho.
Habula iwe wasunga mbu Nibutswa;
ndaheelile abacheni,
ne nibo aba ndalalondangakhwo.
26Shinga omwibi olwa afwimbwa omurwe nanyoolelesiibwe,
nilwo olwa abeinzu yaIsiraeli bafwimbwa omurwe;
mbu bo abene, nabaruchi babwe, nabakhulundu babwe,
halala nabakuhani babwe nende abanabii babwe;
27abasunjilanga omusaala bari Niwe papa;
nalichina, bari Niwe owanzibula.
Okhuba bayafutaariile,
nibarahenga mumoni ta.
Nebutswa mundaalo tsiamasila kabwe baboola bari
Buukha, okhuhonie.
28Ne abanyasayebo aba weekasilia bali heena?
Bo babuushe, nibaba nibanyala okhukhuhonia mundaalo tsiamasilako.
Okhuba abanyasayebo abanji,
shinga obunji bamataalako, iwe Yuda.
29Mbushiina nimwenya okhufunaana ninasi?
Inywe mwesi mwayakholeele induli;
nilwo olwa OMWAMI aboola.
30Ndakhupile abaanabo, ne nibutswa;
shibafuchiilila obuchesiyi ta;
olukanga Iweenywe nilwo olwaliile abanabii beenywe,
shinga italanyi imbalaba.
31Inywe abolwibulo luno, rechelesie likhuwa liOMWAMI.
Isie ndali butswa eshitsiimi khuIsiraeli,
kata eshialo shieshiilima ti?
Nishiina eshichila abandu banje nibasunga mbu Khuli abalekhuule;
shikhulakhwitsila khandi ta?
32Omukhaana yakhanyala okhwibilila ebisiahobie,
kata omweha ebiifwalobie?
Nebutswa abandu banje banzibiliile,
tsindaalo tsinyinji etsirabalikha ta.
33Okasinjia injilayo muno muno okhukhaaba abatia!
Ne kata abakhasi ababii, obeechesiye tsinjilatsio.
34Khungubotsio tsinyoolekhangakhwo amabanga kobulamu bwabamanani absbula eshikha;
ne shiwabanyoola nibayabanga inzu ta.
Ne butswa kata mu ako kosi
35oboolanga ori Embula eshikha;
emanyile mbu oburimabwe bushiukhaane niburulakhwo.
Lola, ndalakhwinjilila itookho,
shichila oboolanga mbu Isie shindayoonoonile ta.
36Obeele orie, nochendachenda ori nanwa nokalukhasia injilayo?
Misiri yilakhufwimbia omurwe shinga Ashuru olwa yakhufwimbia omurwe.
37Yaho naho witsa okhurulaho niwituushile amakhono khumurwe;
okhuba OMWAMI walobile abo aba wisiikanga;
kata shiolakaasa khulwabo ta.
Currently Selected:
Yeremia 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
