Yeremia 1
1
Yeremiah yalangwa, narumwa
1Amakhuwa kaYeremia waHilikia, owokhubakuhani abali nibali muAnatsotsi mushialo shiaBenyamini; 2owa likhuwa liOMWAMI lieetsela mundaalo tsiaYosia waAmoni, omuruchi waYuda, mumuyika kwekhumi nakhataru okwomuburuchibwe. 3Khandi liamwitsila mundaalo tsiaYehoyakimu waYosia, omuruchi waYuda, okhuula olwa omuyika kwekhumi nalulala kwaZedekia waYosia, omuruchi waYuda, olwa kwali nikuhweele, okhuula khukhwarwa khwabeYerusalemu nibayilwa mubuhambe, mumwesi kwakharaano.
4Haho likhuwa liOMWAMI lianzitsila, liri
5Nindashiakhulonga munda ta, ndakhumanya;
norashieebulwa ta, ndakhwahula;
ndakhuraho obe omunabii khumahanga.
6Mana nimboola mbu E, Omwami NYASAYE! Lola, engorwa okhuboola; eshili butswa omuyia.
7Naye OMWAMI niyamboolela mbu Orasunga mbu Eshili butswa omuyia, ta;
okhuba owa ndalakhurumakhwo yesi yesi, olamutsiila;
khandi aka ndalakhulaka kosi kosi, olakaboola.
8Orabariitsanga ta;
okhuba isie endi ninawe okhukhuhonia;
nilwo olwa OMWAMI aboola.
9Mana OMWAMI nanyiila omukhono, OMWAMI niyamboolela mbu
Ngako, ereele amakhuwa kanje mumunwa kwo;
10lola, inyanga yino ekhwemeeshe khumahanga khandi khuburuchi,
okhusiula nokhulikulula,
okhumulula nokhukwisia;
khandi okhuumbakha, nende okhuraaka.
11Likhuwa liOMWAMI nilinzitsila khandi, liri Yeremia, eshia oluutsi nishiina? Ningalusia mbu Enduutsi olusaala Iwomulusi. 12OMWAMI niyasunjila mbu Oteechile, okhuba ehenganga likhuwa lianje, okhuliusia.
13Likhuwa liOMWAMI nilinzitsila khandi olwakhabili, liri Eshia oluutsi nishiina? Ningalusia, mbu Enduutsi inyungu yamatsi akapapachila, niyifutaarila enotsi. 14OMWAMI niyasunjila mbu Amabii kalarula elubeka Iwenotsi, nikabakwila abomushialo bosi pe. 15OMWAMI naboola mbu Okhuba lola, enanga ebilibwa biosi bioburuchi bwosi bwenotsi; nabio bileetsa, nibira buli shilala eshifumbi shiashio shiobwami habwinjililo bwebilibwa bieYerusalemu, nende halukoba lwalio tsimbeka tsiosi, nende hamataala kosi kaYuda. 16Nasi ndalarumbula obukhalachi bwanje khubo khulwa obubii bwabwe bwosi; shinga olwa bandekha, nibasambila abanyasaye bandi amaleesi kelibuuliesi, nibeenamila emilimo chiamakhono kabwe abeene. 17Kho khulwako, wibohe tsingubotsio mushishienje, orule, nobaboolela kosi aka ekhulakaorafwa omwoyo khukabwe ta, endeshe okhukhwira omwoyo imbeli wabwe. 18Okhuba lola, leelo luno ekhukhola obe litaala liolukoba, isiilo yeshibia, lisiisi liomukasa okhuyinga eshialo shiosi, okhuyinga abaruchi baYuda, nokhuyinga abakhulundu bashio, nokhuyinga abakuhani bashio, nokhuyinga abandu beshialo tsana. 19Nabo balaseerana ninawe; nebutswa shibalakhuhula ta; okhuba isie endi ninawe okhukhuhonia; nilwo olwa OMWAMI aboola.
Currently Selected:
Yeremia 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
