Yeremia 18
18
1Likhuwa elieetsela Yeremia okhurula khuMWAMI ndielino; 2mbu Rula okholomoshe otsie khunzu yomulonji; ne ebweneyo ndalakhuboolela amakhuwa kanje ohulile. 3Kho nikholomokha ninzia khunzu yomulonji, ne nguyo, yali nakholanga emilimochie khumukurutumu kwobulonji. 4Ne olwa eshikaye eshia yalonga khwitoyi shioonoonekha mumukhono kwomulonji, yalilonga khandi eshindu shindi, shinga omulonji mwene olwa yachama okhulonga.
5Mana likhuwa liOMWAMI nilinzitsila, liri 6Owe inzu yaIsiraeli, shinyala okhukhukholela shmga omulonji uno olwa akhola? Nilwo olwa OMWAMI aboola. Lole, shinga litoyi elili mumukhono kwomulonji, nolwa muli mumukhono kwanje, inywe abeinzu yaIsiraeli. 7Khushise shiosi eshia emba nimboola khwihanga nalebe, kata khubwami nalebe, okhulisiula nokhulilikulula nokhulimulula; 8lihanga elo elia emba nimboolilekhwo niliba nilishiukhana nilirula khububii bwalio, ndaleekalukhasia nindekha obubii obwa emba nimbaarile okhulikholela. 9Kata khushise shiosi eshia emba nimboola khwihanga nalebe kata khubwami nalebe, okhuliumbakha nokhuliraaka; 10niliba nilikhola obubii imbeli wanje, nilirahulila omwoyo kwanje ta, ndaleekalukhasia nindekha amalayi aka emba nimboolile mbu ndakhabakholela. 11Kho bulaano otsie, oboolele abaYuda nabamenyanga muYerusalemu, ori Kano niko aka OMWAMI aboola; mbu lole, engasinjia amabii khulweenywe, ningasia tsiyemi khwinywe; bulaano kalushe, buli mundu okhurula khunjilaye imbii, mukasie tsinjila tsieenywe nebikhole bieenywe.
12Ne baboola mbu Nibutswa! Khulalonda tsiyemi tsieefwe, nikhukhola buli mundu akarula mubutinyu bwomwoyokwe omubii.
13Khulwako, kano niko aka OMWAMI aboola; mbu
Reebelesie mubamahanga,
mbu ali heena owahulila akafwana kario?
Omukhaana omushisila Isiraeli akholile likhuwa libii liamakana.
14Itsaluchi yaLebanoni yakharula khumachina kaSirioni noho?
Emichela echiomungulu chiakhakhama,
emichela tsana eminyifu echibiranga?
15Ne abandu banje banzibiliile;
basambiile ebindu biabutswa amalesi kelibuuliesi,
nibeesichirala khunjila tsiabwe,
khumihanda chiakhale,
mbu bachende khung'aanyi,
khunjila etsirakasibwa ta;
16nibakhola eshialo shiabwe shibe eshiokhung'ang'aalilwa,
eshiokhunyokhoosibwa tsindaalo tsiosi;
buli mundu oubirayo alachenya,
nayuya omurwe.
17Shinga omuyeka kwebukwe, ndalabasalaasia imbeli wabasuku;
ndalabalolosia omukongo kwanje, mumoni ta,
khunyanga yamasila kabwe.
Obukhobani bwabandu nende lisaayo liaYeremia
18Mana nibasunga mbu Chende khukasie tsiyemi okhuyinga Yeremia; okhuba amalako shikalasikha ewomukuhani, kata obuchesiyi ewomuchesi, kata likhuwa ewomunabii ta. Chende khutsie khumuupe netsinimi, nikhurahulilakhwo akeke kosi ta.
19E OMWAMI, urechele eshirwi;
ohulile omwoyo kwa abo abayingana ninasi.
20Amabii karungwe khulwa amalayi?
Okhuba bayabile obuko khulwa obulamu bwanje.
Witsulile shinga olwa ndasinjila imbeliwo okhusunga amalayi khubo,
okhushiukhasia oburimabwo buleshe okhuba khubo.
21Khulwako, ohaane abaana babwe khunzala;
obahaane khubunyali bwolukanga.
Abakhasi babwe babule abaana, babe abalekhwa;
abasaatsa babwe beerwe noluumbe,
abasooliili babwe nibeerwa nolukanga mwihe.
22Tsimbungu tsihuliilishe okhurula munzu tsiabwe,
olwa oleera abaseeri khubo meetsukhana;
okhuba bayabile obuko okhundiila,
nibareka eshikoye khulwa ebilenje bianje.
23Nebutswa, OMWAMI, omanyile tsiyemi tsiabwe tsiosi,
etsili khwisie okhunzira;
orabaleshela obumayaanu bwabwe
kata okhusiliisia obwonooni bwabwe imbeliwo ta;
nebutswa lekha bakwisibwe imbeliwo;
obakholele khunyanga yoburimabwo.
Currently Selected:
Yeremia 18: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
