Yeremia 17
17
Obwonooni bwaYuda bwasaarwa khumioyo chiabwe
1Obwonooni bwaYuda bwahandiikwa nolukalamu Iweshibia; bwasaarwa khukhabaho khomwoyo kwabwe nobutsunzu bwa alumasi, khandi khutsinzika tsiebimalilo biabwe; 2olwa abaana babwe beetsulilanga ebimalilo biabwe nemiAshera chiabwe hamisaala emitendeemu nokhubikulu ebirambi, 3nomushialo shietsingulu. Emianduchio ebiolukoosibio ndalahaana okhuyaaywa, bibe omurungo khulwa obwonoonibwo, mumbalitsio tsiosi. 4Olatendeyia omukhonokwo khubulaamebwo obwa ndakhuheelesia; ne ndalachila nokhalabanila abasukubo mushialo eshia oramanyile ta; okhuba oburima bwanje nomulilo omululumu okulaakhanga inziayo.
5Kano niko aka OMWAMI aboola
mbu Ali mushilaamo shiobubii omundu owisiikanga abandu,
nakhola abandu babe omukhonokwe kwamaani,
nowa omwoyokwe kurulile khuMWAMI.
6Okhuba alafwanana nende eshitsakha mushialo eshikhaya;
shialalola lilayi liosi niliitsa ta.
Alamenya habundu ahahalaakhu mushitsiimi,
mushialo shieshilongo eshiramenywamwo ta.
7Noweikhabi omundu owisiikanga OMWAMI,
owa OMWAMI ali obunaayilobwe.
8Alaba shinga omusaala okwaraakwa hamatsi,
okulandinjia emisi chiakwo hamuchela nikuraria mundaalo tsiomubasu omululu ta, shichila amasaafu kakwo namabisi,
kata shikulahenda mumuyika okwa ifula yibulamwo,
kata shikulalekha okhwama ta.
9Omwoyo nomukaatii okhushila biosi;
kwabiiyila elala;
ounyala okhukumanya niwina?
10Isie OMWAMI erunilisinjia omwoyo,
nindeema amayililisio,
okhuheelesia buli mundu ebia tsinjilatsie tsikhoyeele,
ebia ebiamo biebikholebie bikhoyeele.
11Shinga ikhwale eyikhung'aasia abaana abarali abayo,
nindio omundu ali ounyoola obuyinda, ne munjila yatoto ta;
hakari wetsindaalotsie bulimurulakhwo,
ne khubumaliilishi aliba butswa omuyingwa.
12Eshifumbi shioluyali eshiarenjekhwa hekulu okhurula khukhuchaaka niho habundu weefwe ahatakatifu.
13E OMWAMI, obunaayilo bwaIsiraeli,
abo bosi abakhulekha balafwimbwa omurwe;
abo abakhurulakhwo balahandiikwa mushialo,
shichila bamulekha OMWAMI,
eshinoko shiamatsi amalamu.
14Usilishe, OMWAMI, kho ndalaba omulamu;
umbonie, kho ndalahona;
okhuba niwe owa nditsoominjia.
15Lola, bareebanga bari
Likhuwa liOMWAMI lili heena?
Liitse bulaano.
16Shindakhunichilisia mbu oleere amabii,
kata shindeekomba inyanga yamaraba ta;
iwe omanyile orio;
kosi akarula mumunwa kwanje kahuliilikha imbeliwo.
17Oraba eshiriisio khwisie ta;
niwe obwilushilo bwanje khunyanga imbii.
18Bahambibwe tsisoni abasandinjia
nebutswa isie endeshe okhuhambibwa tsisoni;
bo bafwe omwoyo,
nebutswa isie endeshe okhufwa omwoyo;
obaleerele inyanga imbii,
nobatibia obutibii shikhabili.
Isabato yilindwe, yibe indakatifu
19Kano niko aka OMWAMI yamboolela; mbu Tsia osinjile mushilibwa shiaBenyamini, eshia abaruchi baYuda beenjililangamwo, neshia barulilangamwo; khandi mubilibwa biosi bieYerusalemu; 20nobasunjile mbu Hulile likhuwa liOMWAMI, inywe abaruchi baYuda, nabaYuda bosi, nabamenyanga muYerusalemu bosi, abeenjililanga mubilibwa bino. 21Kano niko aka OMWAMI aboola; mbu Mwirecheshe khulwa obulamu bweenywe, muleshe okhuchinga omusiiko kwosi khunyanga yasabato, kata okhukwinjisilia mubilibwa bieYerusalemu; 22kata murarusia omusiiko munzu tsieenywe khunyanga yasabato, kata okhukhola omulimo kwosi ta; nebutswa mwahule inyanga yasabato, shinga olwa ndalaka abakuuka beenywe. 23Nabo shibahulila kata okhureka amarwi ta; habula boomia amakosi, mbu baleshe okhuhulila kata okhuchesiyibwa ta.
24Ne OMWAMI asunga mbu Nimuba nimurakhwo omwoyo okhumbulila, oburabisilia omusiiko kwosi mubilibwa bielitookho lino khunyanga yasabato ta, habula okhwahula inyanga yasabato, oburakholelakhwo omulimo kwosi ta, 25kho abaruchi abeekhala khushifumbi shiaDaudi baleenjilila mubilibwa bielitookho lino, nibachenda mumakaari nokhufarasi, bo abeene nabakhulundu babwe, nabaYuda, nabamenyanga muYerusalemu; abandu balamenyanga mwitookho lino inziayo. 26Baleetsa nibarula mumataala kaYuda, nomumbali etsibotokhana Yerusalemu, nomushialo shiaBenyamini, nomuShefela, nomubikulu, nomuNegebu, nibaleera emisango chiokhusambwa, nemisango chindi, nemisango chieimele, nobubaane, nibaleera emisango chiokhuupa orio, munzu yOMWAMI. 27Nebutswa nimuba nimukhaya okhumbulila, okhwahulanga inyanga yasabato, oburachinga omusiiko kwosi niwinjila mubilibwa bieYerusalemu khunyanga yasabato ta; kho ndalahambia omulilo mubilibwa bialio, nakwo kulamala tsinzu tsikhulundu; kata shikuIasima ta. Eliechesio liomulonji nende litoyi.
Currently Selected:
Yeremia 17: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
