Yeremia 16
16
Obuyaasii bwOMWAMI khubandu
1Likhuwa liOMWAMI nilinzitsila khandi, liri 2Orateeshia omukhasi, kata okhwibula abaana abasiani kata abakhaana habundu hano ta. 3Okhuba kano niko aka OMWAMI aboola khukabaana abasiani nokhukabaana abakhaana ababa nibeebulilwa habundu hano, nokhukabanyinabwe ababa nibabeebula, nokhukabasaabwe ababa nibabeebula habundu hano; 4mbu Balafwa khulwa tsinyumbe; shibaleekhuulwa, kata shibalayabilwa ta; balaba shinga imbolela khwiloba; ne balatibibwa nolukanga, khandi neinzala; emilambo chiabwe chilakwa ebiliibwa biamanyonyi akomwikulu nende tsisolo etsiomushialo.
5Okhuba kano niko aka OMWAMI aboola; mbu Oreenjila munzu yetsimbungu, kata oratsia okhubeekhuula kata okhubabeelelela ta; okhuba ndayiniye omulembe kwanje mubandu bano, mbu obuheeli bwanje oburalilu netsimbabasi; nilwo olwa OMWAMI aboola. 6Abakhongo nabatuutu bosi balafwila mushialo shino; shibalayabilwa ta, kata abandu shibalabeekhuula, kata okhwisalaka kata okhwibeka olubeko khulwabwe ta; 7omundu yesi shialamechela abeekhuuli eshiokhulia okhubalemia omwoyo khulwa abafu, ta; kata omundu yesi shialabaheelesia eshikombe shiobulemia mbu banywe khulwa basamwana kata khulwa banyina tawe. 8Khandi oreenjila munzu yelisabo okhubuutsa ninabo, nokhulia nokhunywa, ta. 9Okhuba kano niko aka OMWAMI omwene mahe, Nyasaye walsiraeli, aboola; mbu Lole, habundu hano, imbeli wetsimoni tsieenywe, mundaalo tsieenywe, ndalaakamia omwoyo kwokhwikhoya nomwoyo kwobutsatsahaafu, omwoyo kwomwene shiselelo nomwoyo kwomweha!
10Ne olwa olaboolela abandu bano amakhuwa kano kosi, nabo nibakhureeba mbu Ne nishiina eshichila OMWAMI narumbula obubii buno obukhongo khwifwe? Kata obumayaanu bweefwe nishiina? Kata nishiina eshionoono shieefwe eshia khumwonooneele OMWAMI Nyasaye weefwe? 11Mana olababoolela mbu OMWAMI aboola mbu Shichila abakuuka beenywe bandekha, nibalonda khubanyasaye bandi, nibabakhalabanila, nibabeenamila, nibandekha, nibarahulila amalako kanje ta; 12kata inywe mwakholile obubii okhushila abakuuka beenywe; okhuba lole, muchendanga buli mundu mubutinyu bwomwoyokwe omubii, nimukhaya okhumbulila; 13niko akachila ndalamukhuyungal okhurula mushialo shino, okhuula khushialo eshia muramanyile ta, kata inywe kata abakuuka beenywe; ne mushieneshio mulakhalabanilanga abanyasaye bandi eshiteere neshilo; okhuba shindalamukoosia obukoosia ta.
14OMWAMI aboola mbu Khulwako, lole, tsindaalo tsiitsanga olwa shikalasungungwa khandi mbu Shinga OMWAMI olwa ali mwoyo, owatikulusia abaana baIsiraeli nabarusia mushialo shiaMisiri, ta; 15habula mbu Shinga OMWAMI olwa ali mwoyo, owatikulusia abaana baIsiraeli nabarusia mushualo shienotsi, nokhurula mubialo biosi ewa yali nabeelusiliyeyo; ne ndalabakalusia mushialo shiabwe eshia ndaheelesia abakuuka babwe.
16OMWAMI aboola mbu Lole, ndalarumana abanaabi abanji, nabo balabanaaba; mana olunyumakhwo ndalarumana abayiitsi abanji, nabo balabayiima nibabarusia mubuli lukulu, nomubuli shikulu, nomumeena akomunyanda. 17Okhuba tsimoni tsianje tsili khunjila tsiabwe tsiosi; shibabisikha mumoni tsianje, kata obumayaanu bwabwe shibufwimbwa mumoni tsianje ta. 18Olwambeli ndalabarunga obumayaanu bwabwe nobwonooni bwabwe shikhabili; shichila boonooniye eshialo shianje nemilambo chiebisinyo biabwe, nibeetsusia obulaame bwanje ebindu biabwe ebiemisilo.
19E OMWAMI, amaani kanje khandi olukoba lwanje,
obwilushilo bwanje khunyanga yamatinyu,
amahanga kalakhwitsila iwe okhurula khushihesi shieshialo, nikasunga
mbu Obulaame bwabakuuka beefwe nobubeeyi bwonyene,
emiuya butswa, ebindu ebiralimwo obukhoonyi bwosi ta.
20Omundu anyala okhwikholela omwene abanyasaye?
Mbula, bo shibali abanyasaye ta!
21Khulwako, lola, ndalachila nibamanya; mbu luno lulala ndalachila nibamanya omukhono kwanje nende obunyali bwanje; kho balamanya mbu Yahweh nilio eliira lianje.
Currently Selected:
Yeremia 16: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
