Yeremia 15
15
Oburima bwOMWAMI khuYuda shibumootsolokha ta
1Mana OMWAMI niyasunjila mbu Kata Musa naSamweli nibakhaba nibasinjiile imbeli wanje, omwoyo kwanje shikwakhanyala okhushiukhanila abandu bano ta; obarume barule mumoni tsianje, batsie. 2Ne olwa balakhureeba mbu Kho khurule nikhutsia heena? Olababoolela mbu Kano niko aka OMWAMI aboola; mbu
Abali khulwa oluumbe, batsie khuluumbe;
abali khulwa olukanga, khulukanga;
abali khulwa inzala, khunzala;
nabali khulwa obuhambe, khumbambe.
3OMWAMI aboola mbu Ndalaraho hekulu wabwe abatibii betsimbia tsine; mbu olukanga okhwira, netsimbwa okhumaanya, namanyonyi akomwikulu netsisolo etsiomushialo okhulia nohumalilana. 4Ndalabakhola babe eshiriisio mubwami bwosi bweshialo, khulwa Manase waHezekia omuruchi waYuda, khulwako aka yakhola muYerusalemu.
5Niwina oulakhutiililwa eshisa, iwe Yerusalemu?
Niwina oulakhubeelelela?
Niwina oulakotolela khunjila mbu areebe akobulamubwo?
6OMWAMI asunga mbu Wandoba;
okaluushe inyuma;
ne niko akachilile ninyiilile omukhono kwanje khwiwe, nikhutibia;
enjoonyile okhumumootsoloshelanga.
7Embaseesile nolutelu haluyia Iweshialo,
enjilile bafwiliilwe abaana babwe;
esishiye abandu banje;
shichila shibakaluushe okhurula khunjila tsiabwe ta.
8Enyinjiyiye abakhasi babwe abalekhwa okhushila omuyeshe kwetsinyanza obunji;
embaleereele owonooninjia mushiteere okhuyinga abanyina abasooliili;
embakwisiliye obusaalili noburii meetsukhana.
9Oyo oweebula abaana musaafu atoreelela;
akona shinga oufwile;
eliubalie liyeelile nishishili eshiteere;
afwimbwa omurwe nakoyaasibwa.
Nabo abashitong'a, ndalabahaana khulukanga imbeli wabasuku babwe;
nilwo olwa OMWAMI aboola.
10Woowe, mama ko! Wanzibula embe omundu wobusoolo nowamayinje mushialo shiosi! Shindahosia omundu eshindu kata abandu shibayahosiakhwo nebutswa banyekanga, bosi pe. 11Kabe kario, OMWAMI, nimba nindabasabiile amalayi, kata nimba nindakhusaayile khulwa abasuku abo mundaalo tsiamasila nomundaalo tsiamatinyu ta. 12Omundu yakhanyala okhufunaka eshibia, mbu eshibia eshirula enotsi, nomukasa?
13Emianduchio namabiikhoko, ndalabihaana okhuyaaywa harali obukusi ta, khulwa ebionoonobio biosi mumbalitsio tsiosi. 14Ndalachila nokhalabanila abasuku beenywe mushialo eshia oramanyile ta; okhuba muburima bwanje omulilo kuhambiibwe, okulaakhanga inziayo.
Aka OMWAMI yasuubisia Yeremia
15E OMWAMI, iwe omanyile;
unzitsulile niungoonya,
niumalila eshikwoli khubo abasandinjia.
Mubwisimilisiibwo, orarusiaho ta;
manya mbu khululwo ndeefwila amanyeko.
16Amakhuwako kanyoola, nasi ningalia;
amakhuwako nikangwila eshiokhwikhoya,
nikasangaasia omwoyo kwanje;
okhuba engulishilwa khuliiralio,
e OMWAMI Nyasaye omwene mahe.
17Shindabuutsa nabatsatsahalanga,
kata shindayeekhoya ta;
ndabuutsa sienyene, shichila omukhonokwo kwali khwisie;
okhuba wanzitsusia obusinyishi.
18Nishiina eshichila okhusaalila khwanje nikhuraholeela ta,
kata lifumire lianje okhuhona,
nilikhaya okhuhonibwa?
Wakhambeela butswa shinga omuchela omukaatii,
mbu amatsi akakhamanga, noho?
19Khulwako, kano niko aka OMWAMI aboola;
mbu Noba nokalukha, isie ndalakhukalusia,
mbu osinjile imbeli wanje;
ne noba niweelamwo akolukoosi mubibula obukhoonyi,
olaba shinga omunwa kwanje;
bo balakhukalushila,
habula iwe shiolabakalushila ta.
20Ndakhukhola obe olukoba lwelisiisi liomukasa khubandu bano;
balakhuseera, ne shibalakhuhula ta;
okhuba endi ninawe,
okhukhuhonia nokhukhureesia;
nilwo olwa OMWAMI aboola.
21Ndalakhureesia mumukhono kwomubii nikhununuula mumukhono kwowamariisia.
Currently Selected:
Yeremia 15: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
