Yeremia 14
14
Amakhuwa khukeinzala
1Likhuwa liOMWAMI elieetsela Yeremia khukeinzala ndielino;
2mbu Yuda yeekhuula;
amataalake kafwa omwoyo;
abandube balakaashe khwiloba;
tsimbungu tsiaYerusalemu tsituumuukha.
3Abamakurube baruma abatuutu babwe amatsi;
boola khumatikho, nibaranyoola amatsi ta;
bakalukha netsisiongo tsikhaya;
batiilwa tsisoni, nibakoyaasibwa,
nibafwimbwa omurwe.
4Khulwa liloba eliafwa omwoyo shichila ifula shiyikwilekhwo khushialo ta,
abalimi batiilwa tsisoni,
bafwimbwa omurwe.
5Kata eshitsusu mubulimo shiibula mana nishilekha omwana,
shichila obunyasi bubulaho.
6Tsisishili tsinabulimo tsisinjila khubutenje obukhaya bwebikulu;
tsiheeselanga omuuya shinga amabwe;
tsimoni tsiatsio tsimaliha,
shichila emiani chibulaho.
7Kata obumayaanu bweefwe nibukhuyinga nobuloli,
iwe okhole khulwa eliiralio, e OMWAMI;
okhuba okhukotola khweefwe nokhunji;
khwakhwonoonela.
8E iwe obunaayilo bwaIsiraeli,
omuhoniawe mundaalo tsiamasila,
nishiina eshiakhachila noba shinga omurende mushialo
kata shinga omuchendi oukotola okhunyoola aha akona?
9Nishiina eshiakhachila noba shinga omundu oung'ang'aala,
shinga omundu omululu oukhay va okhuhonia?
Nebutswa, OMWAMI, oli hakari weefwe;
khukulishilwa khuliiralio;
orakhulekha tawe.
10Kano niko aka OMWAMI asunga khukabandu bano;
mbu Baheelanga okhutiimatiima bario;
shibakaya ebilenje biabwe ta;
ne niko akachila OMWAMI shiabafuchiilila ta;
bulaano aleetsulila obumayaanu bwabwe nabakuuma khulwa ebionoono biabwe.
11OMWAMI yasunjila mbu Orasaayila abandu bano amalayi ta. 12Olwa baba nibahonga inzala shindalahulila okhuhaaba khwabwe ta; kata olwa baba nibamala emisango emisambe nemisango chieimele, shindalabafuchiilila tawe; ne ndalabasishia nolukanga, neinzala, noluumbe.
13Mana nisunga mbu E, Omwami NYASAYE! Lola, abanabii babasunjilanga mbu Shimulalola olukanga kata okhubakhwo neinzala ta; ne ndalamuheelesia omulembe kwatoto habundu hano. 14Mana OMWAMI niyasunjila mbu Abanabii tsana barumbulilanga obubeeyi muliira lianje; isie shindabaruma ta, kata okhubalaka kata okhusungana ninabo ta. Bamurumbulila libisulo liobubeeyi, nobufumu obukhaya, nobukaatii obwomumioyo chiabwe. 15Khulwako, kano niko aka OMWAMI aboola khukabanabii abarumbulilanga muliira lianje, ne shindabaruma ta; nebutswa baboola mbu Olukanga neinzala shibilabakhwo mushialo shino ta; mbu Olukanga neinzala nibio ebilatibia abanabii abo. 16Nabo abandu aba barumbulilanga balasukunwa mumihanda chieYerusalemu khulwa inzala nende olukanga; kata balabula ababayabila, bo abeene, nabakhasi babwe, nabaana babwe abasiani, nabaana babwe abakhaana. Okhuba ndalatsukha butsukha obubii bwabwe khubo.
17Olababoolela likhuwa lino;
mbu Tsimoni tsianje tsiroonyenje amasika eshilo neshiteere,
karakhalikha ta,
okhuba omukhaana omushisila wabandu banje yaarilwe olukuma olukhongo,
likhupache libii muno.
18Nimba ninzia mumikunda ebulafu,
abeerwa nolukanga mbabo!
Kata nimba ninzinjila mwitookho,
tsinyumbe tsieinzala nzietsio!
Okhuba abanabii nabakuhani bosi bakholanga akabwe mushialo,
nibabula obumanyi.
19Kho walobeele Yuda elala noho?
Sayuni yisinyanga omwoyokwo?
Olwashiina nokhukhupile,
obuhonia nibubulaho khulweefwe?
Khwalindiilila omulembe, ne lilayi liosi nilireetsa ta;
eshise shiobuhonia, ne lola, indenga yonyene!
20E OMWAMI, khwiyama tsimbii tsieefwe,
nobumayaanu bwabakuuka beefwe;
okhuba khwakhwonoonela.
21Orakhuleka ta, khulwa eliiralio;
orafwola eshifumbishio shioluyali ta;
witsulile, oburoonoonia indakanoyo nineefwe tawe.
22Chiliho echiomumindu chiabutswa echiamahanga echinyala okhukwisia ifula?
Kata likulu liene linyala okhuhaana olunyirila?
Ne shioli niwe, e OMWAMI Nyasaye weefwe?
Niko akachila khulanaayilanga mwiwe;
okhuba niwe oukhola ebio biosi.
Currently Selected:
Yeremia 14: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
