Yeremia 11
11
Akokhukhaya indakano
1Likhuwa elieetsela Yeremia okhurula khuMWAMI ndielinoj mbu 2Hulila amakhuwa keindakano yino, mana osungane nabandu baYuda, nabamenyanga muYerusalemu, 3obaboolele mbu Kano niko aka OMWAMl, Nyasaye waIsiraeli, aboola, mbu Ali mushilaamo shiobubii omundu ourahulila amakhuwa keindakano yino 4eya ndalaka abakuuka beenywe, khunyanga olwa ndabarusia mushialo shiaMisiri, okhurula mumulilo omululumu shinga okurulanga eshibia, mbu Hulilenje omwoyo kwanje, nimukhola kosi aka emulaka; kho mulabeetsanga abandu banje, nasi ndalabeetsanga Nyasaye weenywe; 5mbu endinyisie eshiitsubo eshia ndeetsubila abakuuka beenywe, okhubaheelesia eshialo eshiyembangamwo amabeele nende obuushi shinga olwa kali leelo. Mana ningalusia nisunga mbu Amina, OMWAMI.
6OMWAMI niyasunjila mbu Rumbula amakhuwa kano kosi mumataala kaYuda nomumihanda chieYerusalemu; ori Hulile amakhuwa keindakano yino, nimukakhola. 7Okhuba ndabalachilisia obutinyu abakuuka beenywe khunyanga olwa ndabatikulusia nimbarusia mushialo shiaMisiri, okhuula olwa leelo, nimbalachilisia khale, nilumilila okhubalachilisia, mbu Hulilenje omwoyo kwanje. 8Nebutswa shibahulila ta kata okhureka amarwi; ne nibachenda buli mundu mubutinyu bwomwoyokwe omubiiniko akachila nimbaleerela amakhuwa kosi keindakano yino, eya ndabalaka okhukhola, ne shibakhola ta.
9OMWAMI niyasunjila mbu Obusanjilili bunyooleeshe mubandu baYuda nomubamenyanga muYerusalemu. 10Bakalushiile obumayaanu bwabakuuka babwe, abakhaya okhuhulila amakhuwa kanje; ne balondile khubanyasaye bandi nibachikhalabanila; abeinzu yaIsiraeli nabeinzu yaYuda boonooniye indakano yanje eya ndalakana nabakuuka babwe. 11Khulwako, kano niko aka OMWAMI aboola; mbu Lola, ndalabakhupia khushibii eshia baranyala okhwihonokokha khushio ta; balahaabila, ne shindalabahulila tawe. 12Mana abomumataala kaYuda nabamenyanga muYerusalemu balatsia nibahaabila abanyasaye abo aba basambilanga amalesi kelibuuliesi; ne shibalabahonia khunyanga yamasila kabwe, nahatuutu ta. 13Okhuba abanyasayebo nabanji, shinga obunji bwamataalako, iwe Yuda; ne obunji bwemihanda chieYerusalemu shinga olwa buli, nolwa mwasinjisiliye eshietsisoni tsana ebimalilo biemisango, nibio ebimalilo ebiokhusambilakhwo Baali amalesi kelibuuliesi.
14Khulwako, orasabila abandu bano, kata okhuchinga omwoyo kata lisaayo khulwabo ta; okhuba shindalabahulila olwa bahaabila khunyanga yamasila kabwe ta. 15Omuheelwa wanje ali arie munzu yanje, olwa yakholanga akobwilaasi? Ebiitsubo neinyama yemisango binyala okhukeng'a amatinyu akakhulindiilila noho? Ne onyala okhwikhoya noho? 16Khale OMWAMI yakhukulikha mbu Omutseituni omutendeemu, omukaasu, okuli nebiamo ebilayi; ne alakuhambia omulilo, nobuyoka bweimbumbuyeka ingali, ne amasaka kakwo kalayia pe. 17Okhuba OMWAMI omwene mahe owakhuraaka akhurumbuliile amabii, khulwa obubii bweinzu yaIsiraeli nobweinzu yaYuda obwa bakhola nibasinyisia muno khulwa okhusambila Baali amalesi kelibuuliesi.
Obusanjilili okhukwisia Yerusalemu
18OMWAMI yamanyia, mana ningamanya;
mana niundolosia ebikhole biabwe ebibii.
19Nebutswa ndali shinga likondi liholo olwa liyilwa khukhwirwa.
Shindamanya mbu bayangasilia tsiyemi okhuyinga ta;
bari Khuhesie omusaala halala nebiamo biakwo;
khumukhalache okhurula mushialo shiabali mwoyo,
eliiralie lileshe okhwitsulilungwa.
20Ne bulaano, e OMWAMI omwene mahe, ouyaasinjia habwene, iwe outeemanga amayililisio nende omwoyo, fuchiilila endole eshikwolishio khubo; okhuba ereele eshifune shianje mumukhonokwo. 21Khulwako, kano niko aka OMWAMI aboola khumakhuwa kabaAnatsotsi abayiima obulamubwo, nibasunga bari Orarumbulila muliira liOMWAMI ta, oleshe okhufwila mumukhono kweefwe; 22ne khulwako, kano niko aka OMWAMI aboola; mbu Lola, ndalabakuumaabasooliili balafwa khulwa olukanga, abaana babwe abasiani nabakhaana balafwa khulwa inzala; 23shibalatong'a kata mulala khubo taokhuba ndalakhupia abaAnatsotsi khushibii, mbu omuyika kwokhukuumwa khwabwe.
Currently Selected:
Yeremia 11: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
