Isaya 66
66
Obuyaasii bwOMWAMI, nende obukaasu bwaSayuni obweimbeli
1Kano niko aka OMWAMI aboola, mbu
Likulu nilio eshifumbi shianje shiobwami,
eshialo nashio nishio eshia enambisilinjiakhwo ebilenje;
mwakhanyumbashila inzu yeimbia shi?
Khandi nahabundu shiina ahalaba obuhuluushilo bwanje?
2Shichila ebindu bino biosi omukhono kwanje nikwo okwabikhola,
khandi bino biosi nebianje;
nolwa OMWAMI aboola.
Ne omundu uno niye owa ndalahenganga,
mbu omwituutuyi, owomwoyo okwinyushile,
outechelelanga likhuwa lianje.
3Ousinza ing'ombe yeengana owira omundu;
outisa likondi yeengana oufunaka imbwa likosi;
ouleera eshihanwa shieimele yeengana ouleera amalasile keimbiitsi;
ousamba obubaane yeengana ousabila eshiabutswa ikhabi.
Toto mwene, beeloboleele tsinjila tsiabwe,
khandi emioyo chiabwe chisangaalilanga emisilo chiabwe;
4nasi siesi ndalalobola amanyasio kabwe,
nimbaleerela ebia bariitsanga;
okhuba olwa ndalanga, yabulaho owafuchila;
olwa ndaboola, shibahulila ta;
nebutswa bakhola akali amabii mumoni tsianje,
nibalobola ako akaranjamisia ta.
5Hulile likhuwa liOMWAMI,
inywe abatechelelanga likhuwalie;
mbu Abaana beenywe abamukiyanga inywe,
abamusukuune khulwa eliira lianje,
basunjile bari Leshe OMWAMI aheebwe oluyali,
mbu khulole okhwikhoya khweenywe;
nebutswa balafwimbwa omurwe.
6Omwoyo kweindiri okurula mwitookho,
omwoyo okurula muhekalu,
omwoyo kwOMWAMI ourunganga abasukube omurungo.
7Olwa yali nashili okhulumwa, yeebula;
olwa inumwaye yali niyishili okhuchaaka yeebula omwana omusiani.
8Niwina owahulilakhwo likhuwa elifwana liri?
Niwina owalolakhwo akafwana kari?
Eshialo shiakheebulwa munyanga ndala noho?
Lihanga liakheebulwa nonoho?
Okhuba Sayuni niliakhachaaka okhulumwa,
habwenaho lieebula abaana balio.
9Ndakhoosia abaana khukhwibulwa, ndabula okhubeebusia? Nolwa OMWAMI areeba; nasi owibusinjia, ndakheekala olubeleshelo noho? Nolwa Nyasaye areeba.
10Mutsatsahale halala nende Yerusalemu, nimulisangaalila,
inywe mwesi abaliheelanga;
muliikhoyele omwikhoyo,
inywe mwesi abaliikhuulanga;
11mbu munuune nimwikurila tsimbeele tsiokhulemia khwalio;
mbu mwikumule,
nimusangaalila obunji bwoluyali lwalio.
12Okhuba kano niko aka OMWAMI aboola; mbu
Lole, ndalaliusilie omulembe shinga omwalo,
khandi oluyali lwamahanga shinga omuchela okuyemba,
ne mulanuunakhwo;
mulahakarwa khubihukunyu,
khandi mulabayibwa khumakulu.
13Shinga owa nyina aleminjia o-mwoyo,
nolwa ndalamulemia omwoyo;
ne mulalemibwa muYerusalemu.
14Ne mulalola, emioyo chieenywe nichiikhoya,
amakumba keenywe nikanera shinga omuboka;
omukhono kwOMWAMI nakwo kulamanyishila abasumbabe,
nobusinyishibwe khubasukube.
15Okhuba lole, OMWAMI aleetsa nende omulilo,
amakaarike nako kalafwana shinga imbumbuyeka;
okhurunga omurimabwe nende obululu,
nokhukondekhakhwe nende tsimemu tsiomulilo.
16Okhuba OMWAMI alakhalachila abandu bosi eshiina,
niyeekhoonyela omulilo nende olukangalwe;
nabaleerwa nende OMWAMI balaba abanji.
17Abo abeeyahula nibeelafilia okhutsia mubikuuri ebiasirwa tsingaka,
munyuma wa oyo ouli hakari,
nibalia inyama yeimbiitsi, nende omusilo, nende akhabuto;
bosi balaakamila halala;
nolwa OMWAMI aboola.
18Shichila ndamanya ebikhole biabwe nende amapaaro kabwe;
eshise shiitsanga olwa ndalakhung'aasia abamahanga kosi nende abetsinimi tsiosi;
nabo baleetsa nibalola oluyali lwanje.
19Ne ndalaraho eshilolelo hakari wabo;
nabeenabo abeehonokokha mubo,
ndalabaruma khumahanga,
eTarashishi nende ePuli, nende eLudi, abakhwesanga obuyingo;
eTubali nende eYawani,
enatsinguku etsili ehale,
etsirahuliile akeifuma yanje,
kata okhulola oluyali lwanje ta;
nabo baleelwatsa akoluyali lwanje mumahanga.
20Khandi balarusia abaana beenywe mumahanga kosi,
babe eshihaanwa shiOMWAMI,
khutsifarasi, khandi khumakaari, khandi khumakaari akali nebilama,
khandi khunyumbu, khandi khungamia,
okhuula khushikulu shianje eshitakatifu shiaYerusalemu,
shinga abaIsiraeli olwa baleeranga eshihaanwa shiabwe shieimele mushichinjilo eshisiye khunzu yOMWAMI;
nolwa OMWAMI aboola.
21Khandi OMWAMI aboola mbu
Khandi ndalabukula abandi khubo babe abakuhani nende abaLawi.
22Okhuba shinga likulu liyia nende eshialo eshiyia ebia ndalakhola, olwa bilamenya imbeli wanje,
nolwa olwibulo Iweenywe nende eliira lieenywe bilamenya;
nolwa OMWAMI aboola.
23Ne okhurula khukhuchaaka khwomwesi okhuula kukhuchaaka khwokundi,
khandi okhurula khusabato yindi okhuula khuyindi,
abandu bosi baleetsanga okhwinama imbeli wanje;
nolwa OMWAMI aboola.
24Khandi balarula, nibahenga,
nibalola emilambo chiabandu aba'khaya;
okhuba tsinyende tsiabwe shitsilifwa,
kata omulilo kwabwe okhusima ta;
ne balabeetsanga abeshisinyo khubandu bosi.
Currently Selected:
Isaya 66: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
