Isaya 9
9
Okhwibulwa khwomukhulundu womulembe nende oburuchibwe
1Habula shililabaho lifumbi khumwenoyo owalinji mumasila ta. Olwambeli yachila eshialo shiaZabuloni nende eshialo shiaNafutali nibilekwa, ne mundaalo tsiolunyumakhwo alabikhola bibe ebioluyali, khunjila yeinyanza, injelekha weYorodani, niyo Galilaya yamahanga.
2Abandu abali nibachendanga mushiilima baluutsi obulafu obukhongo;
abo abali nibamenya mushialo shieshiilima eshimali ti,
obulafu bubaashiile.
3Winjiyiye abelihanga, obameeteele okhwikhoya okhunji;
beekhoyanga imbeliwo shinga okhwikhoya khwelichesa,
shinga abelihe olwa batsatsahalanga nibakabana ebiyaayilwe.
4Okhuba likokolo liomusiikokwe,
nende omutiichilo okwokhwibeka,
nende indabushi yomusandiiwe,
wabifunaache biosi shinga khunyanga yeMidiani.
5Okhuba tsiputi tsiosi tsiabandu abeeriitsilanga,
halala nende ebiifwalo ebitabaane amatsayi,
bilaba ebiokhusambwa, bilaba ebiokhulika omulilo.
6Khulweefwe omwana yeebuulwe,
khuheelwe omwana omusiani;
oburuchi nabwo bulabeetsanga khwibekalie,
naye alakulikhwa eliira, mbu Omwibaali Wamakana, Nyasaye Wobunyali,
Seefwe Wobumeli, Omukhulundu Womulembe.
7Obumeeteshi bwobukhulundubwe nende obwomulembe bubula eshiakamo,
khushifumbi shiaDaudi nokhuburuchibwe,
okhushiralisia nokhushitinyisia nobukhalachi bwatoto khandi nobulunjishi okhurula olwa leelo okhuula khubisoni nebisoni.
Obulumilifu bwOMWAMI omwene mahe bulakhola.
Oburima bwOMWAMI khuIsiraeli
8Omwami yaruma likhuwa khuYakobo,
nalio nilimukwila Isiraeli.
9Abandu bosi balalola,
nibo abaEfuraimu nende abamenyanga eSamaria,
ababoolanga nende isunga nobwikhulumamii, bari
10Amatofali kakwile,
ne khuloombashila amachina amabaatse;
emikhuyu chiaremwa,
ne khularaho emisiita mushilenje shiachio.
11Khulwako OMWAMI alabuusia abamayinje khubo,
khandi alayakula abasuku babwe.
12AbaSiria ebukwe, ne abaFilisiti mumbo;
nabo balamila Isiraeli bukala.
Khulwako kosi oburimabwe shibuhutsuluushe tawe,
nebutswa omukhonokwe ashikukoloole ario.
13Ne kata kario, abelihanga shibamushiukhaniile omwenoyo owabakhupa,
kata shibamukhaabile OMWAMI omwene mahe ta.
14Niko akachila OMWAMI alaremakhwo Isiraeli omurwe nende omushila,
olusaka nende olusi, khunyanga ndala.
15Omukofu woluyali, niye omurwe;
naye omunabii owechesinjia akobubeeyi, niye omushila.
16Okhuba abo abeemililanga abelihanga lino babashiaminjia;
nabo abeemililwa ninabo bamilwa bukala.
17Niko akachila Omwami shialeekhoyelanga abasooliili babwe,
kata shialabatiililwa tsimbabasi abaana babwe ababisandu nende abakhasi abalekhwa ta;
okhuba buli mundu khubo shiariitsanga Nyasaye ta, ne nomukholi wobubii,
khandi buli munwa kuboolanga akobusilu.
Khulwako kosi oburimabwe shibuhutsuluushe tawe,
nebutswa omukhonokwe ashikukoloole ario.
18Okhuba obumayaanu busambanga shinga omulilo;
bumalanga tsisasaari nende ebisisia;
yee, bumemukha mubitsakha ebiomumutsuru,
nabio nibikulukha mukhutuumuukha khwomwosi omunji.
19Khulwa oburima bwOMWAMl omwene mahe,
eshialo shisambilwe pe;
abandu nabo bali shinga tsikhwi tsiomulilo;
ahumaho oumubeelelela omwana wabwe.
20Abandu barimulanga khumukhono musatsa, nibaba butswa inzala;
baliitsanga khumukhono mukhasi, ne shibeekura ta;
balia buli mundu omubili kwowashie;
21Manase alia Efuraimu; ne Efuraimu, nManase;
ne bombi baseera Yuda.
Khulwako kosi oburimabwe shibuhutsuluushe tawe,
nebutswa omukhonokwe ashikukoloole ario.
Currently Selected:
Isaya 9: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
