Isaya 65
65
Obukuumwi bwabeinduli
1Ndali nindiho okhureebwa nabeenabo abarandeebakhwo likhuwa ta,
nimbanyooleshela abarakhaaba tawe;
ndasunjila lihanga elirahaabila khuliira lianje ta,
mbu Ndiho, ndiho.
2Ndakalishiile oluyia lwabandu abakhayi amakhono kanje,
inyanga yosi,
abandu abachendanga khunjila eyirali indayi ta,
nibalonda amapaaro kabwe abeene;
3oluyia lwabandu abasinyisinjia imbeli wanje khatsotselo,
nibamalanga emisango mubikuuri ebiasirwa tsingaka,
nibasamba obubaane khumatofari;
4abeekhala mubilindwa, nibakona aheebisu;
abaliitsanga inyama yetsimbiitsi,
khandi omuunyu kwebisinyo kuli munyungu tsiabwe;
5abasunga mbu Sinjilaho wenyene,
orasita ahambi ninasi ta, okhuba endi omutakatifu, ekhushila iwe.
Bano nibo omwosi mumoolu kanje,
omulilo okwakhanga inyanga yosi.
6Lole, kahandiikwa imbeli wanje, mbu
Shindalaholeela tawe, habula ndalarunga;
toto, ndalarunga mungubo etsiomubilifu biabwe,
7obumayaanu bweenywe abeene, halala nende obumayaanu bwabakuuka beenyu,
abali nibasambanga obubaane khungulu,
nibanyeka khubikulu;
nolwa OMWAMI aboola;
niko akachila ndalaranjilila ninjela ebikhole biabwe mubilifu biabwe.
8Kano niko aka OMWAMI aboola; mbu
Shinga olwa banyoola idivai mushisakanya shietsinzabibu,
nibasunga mbu Muroonoonia ta,
shichila ikhabi yilimwo;
nolwa ndalakholanga khulwa abasumba banje,
endeshe okhubamulula bosi.
9Khandi ndalarusia olwibulo muYakobo,
nende abalaame bebikulu bianje muYuda;
abalobole banje nabo balashilia,
khandi abasumba banje balamenyayo.
10Ne Sharoni shilaba obwayilo bwebiayo,
ne libanda liaAkori lilaba habundu ahokhukona khwetsing'ombe,
khulwa abandu banie abarunilisia.
11Habula inywe abalekha OMWAMI,
abeebilila eshikulu shianje eshitakatifu abaalila Ikhabi imeesa,
nimwitsusisilia Obwilooshi idivai eyitsokasiibwe mushikombe;
12ndalamulekhuula mwilooshele olukanga,
khandi mwesi muleenamila obwirwi;
okhuba olwa ndalanga, shimwafuchila ta;
olwa ndaboola, shimwahulila ta;
ne mbu mwakhola akali amabii mumoni tsianje,
nimulobola ako akaraniamisia ta.
13Khulwako, kano niko aka Omwami NYASAYE aboola; mbu
Lole, abasumba banje balalia,
ne inywe mulaba inzala;
lole, abasumba banje balanywa,
ne inywe mulaba obuloho;
lole, abasumba banje baleekhoya,
ne inywe mulafwimbwa omurwe;
14lole, abasumba banje baleemba khulwa obusangaafu obwomumwoyo,
ne inywe mulalila khulwa eshibeela eshiomumwoyo,
nimukhupa tsimbungu khulwa okhuyengukha khwaroho tsieenywe.
15Khandi mulaleshela abalobole banje eliira lieenywe libe eshilaamo shiobubii,
ne Omwami NYASAYE alakhwira;
ne alakulikha abasumbabe eliira lindi,
16mbu mana owisabila omwene ikhabi mushialo yesabile ewaNyasaye wobwatoto;
noyo owitsuba mushialo yeetsubile Nyasaye wobwatoto;
okhuba amasila akambeli kamalile okhwibililwa,
khandi okhuba kabisilwe tsimoni tsianje.
Likulu liyia nende eshialo eshiyia
17Okhuba lola, enonga likulu liyia nende eshialo eshiyia;
ne ebienebio ebialinjiho shibiieetsulwa kata okhupaarwakhwo ta.
18Nebutswa musangaale nimutsatsahalila shieneshio eshia enonga,
obushia nobushia;
okhuba lole, enonga Yerusalemu libe omwikhoyo,
nabandu balio babe omusangaalo.
19Khandi ndalatsatsahalila Yerusalemu,
nisangaalila abandu banje;
ne omwoyo kwokhwikhuula shikulahuliilishilamwo khandi ta,
kata omwoyo kwetsimbungu.
20Shialabamwo khandi omwana omuhele oumala tsindaalo tsinduutu butswa,
kata omukofu ouramalilisia tsindaalotsie ta;
okhuba omwana alafwa namalile emiyika eshikhumi,
khandi omwonooni oumalile emiyikachie eshikhumi alaba mushilaamo shiobubii.
21Ne baloombakha tsinzu nibamenyamwo;
khandi balaraaka emikunda chiemitsabibu, nibalia khubiamo biachio.
22Shibaloombakha, noundi namenyamwo,
kata shibalaraaka, noundi nalia, ta;
okhuba shinga tsindaalo tsiomusaala olwa tsili,
nolwa tsindaalo tsiabandu banje tsilabeetsanga tsirio,
khandi abalobole banje baleekhoonyela ebiemilimo chiamakhono kabwe.
23Shibalanyakhana butswa, kata okhwibula khulwa amaraba, ta;
okhuba nibo olwibulo lwa abo abaheebwa ikhabi nende OMWAMI,
nende abaana babwe halala ninabo.
24Ne nibarashiahahaabila ta, ndalabahabila;
khandi nibashiboola, ndalahulila.
25Eshisuutse nende omusie kwelikondi bilaaya halala,
khandi italanyi yilaaya obunyasi shinga ing'ombe;
olufu nalwo lulaba ebiliibwa bieinzokha.
Shibalatsuunia kata okhwonoonia eshindu shiosi mushikulu shianje shiosi eshitakatifu tawe;
nolwa OMWAMI aboola.
Currently Selected:
Isaya 65: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
