Isaya 45
45
OMWAMI yamulaka Koreshi
1Kano niko aka OMWAMI aboolela masihiwe, niye Koreshi,
owa ndatiilile omukhonokwe musaatsa,
okhuhula amahanga imbeliwe,
nokhutendeyia abaruchi ebishienje;
okhwikula emiliango imbeliwe,
nebilibwa nabio shibiikalwa ta;
namuboolela mbu
2Ekhwimilila injila,
nireleesia ebikulu;
efunaka emiliango chiemikasa,
nikhalaka ebiyinjiilo bieshibia ebitonye ebitonye;
3khandi ekhuheelesia ebishila obukusi bwosi ebiomushiilima,
nende ebiobuyinda ebiabiswa hamasilisi,
mbu omanye shinga olwa endi OMWAMI,
Nyasaye waIsiraeli, oukhulanga eliiralio.
4Khulwa Yakobo omusumba wanje,
khandi Isiraeli omulobole wanje,
ndakhulanjile eliiralio;
kata noramanyanga ta, ndakhulayile amalaha.
5Nisie OMWAMI, ne abulaho oundi;
abulaho Nyasaye undi, habula isie;
ekhuboha mushishienje, kata noramanyanga ta;
6mbu okhurula ewa eliuba lifwindilanga, nokhurula mumbo,
bamanye shinga olwa oundi abulaho, habula isie;
nisie OMWAMI, ne oundi shialiho ta.
7Isie ekhola obulafu, khandi enonga eshiilima;
ekhola omulembe, khandi enonga amabii;
nisie OMWAMI, oukholanga kano kosi.
OMWAMI niye Omulonji
8Iwe likulu, roonyia okhurula hekulu,
amaleesi nako katsushiilile obulunjishi;
eshialo shiikushe, mbu shiame obuhonia,
nishimesia obulunjishi halala ninabwo.
Nisie OMWAMI owashilonga.
9Woowe khumwenoyo ouyingana nende Omulonjiwe!
Oluchio munjio tsieshialo!
Litoyi nalisunjile oyo oulilonga, lili Okholanga shiina?
Kata omulimokwo, kuri Shioli nobusitsa ta?
10Woowe khumwenoyo ousunjila samwana mbu
Wibulanga shiina?
Kata omukhasi, mbu Olumungwa shiina?
11Kano niko aka OMWAMI,
Omutakatifu waIsiraeli khandi Omulonjiwe, aboola;
mbu Mwakhareeba khumakhuwa kabaana banje,
kata khumakhuwa kemilimo chiamakhono kanje, mundachekhwo, noho?
12Nisie owakhola eshialo,
nende okhulonga abandu khushio;
isie, amakhono kanje kabambula likulu,
khandi amahe kalio kosi nisie owalaka.
13Isie ndamubuusiye mubulunjishi,
khandi ndalakololosia tsinjilatsie tsiosi;
aloombakha litookho lianje,
khandi alalekhuula abaarwa banje;
ne shialakhola ario khulwa omurungo kata eshiomufuusi ta;
nolwa OMWAMI omwene mahe aboola.
14Kano niko aka OMWAMI aboola; mbu
Ebirula mumilimo chiaMisiri, nende ebieinganga biaEtiopia,
nende abaSeba, abandu abarambi,
balakhwitsila, nibaba abobo;
balakhulondangakhwo;
balakhwitsila nibaboyilwe eminyolo; ne balakhwinamila,
nibakhusaaya, bari Toto mwene Nyasaye ali mwiwe; abulaho oundi,
shialiho Nyasaye undi ta.
15Toto mwene, niwe Omunyasaye owamabiswi,
e Nyasaye waIsiraeli, omuhonia.
16Balafwimbwa omurwe, toto balatiilwa tsisoni bosi;
baleenjila mutsisoni bosi halala abakholanga ebifwanani.
17Ne Isiraeli alahonibwa nende OMWAMI,
nende obuhonia bwobumeli;
shimulafwimbwa omurwe kata okhutiilwa tsisoni ta,
inziayo.
18Okhuba kano niko aka OMWAMI yaboola, owalonga likulu, ne niye Nyasaye,
owakhola eshialo nashilomba;
yashiralisia, shiyashilonga shibe eshikhaya butswa ta
yashikhola mbu shimenywemwo;
yaboola mbu Nisie OMWAMI; ne abulaho oundi.
19Shindaboola mumasilisi,
habundu mushialo shieshiilima, tawe;
shindasunjila abolwibulo lwaYakobo mbu Mukhaabe ahakhaya butswa, ta;
isie OMWAMI emboolanga akobulunjishi,
esunganga amakhuwa akali habwene.
Akebifwanani biaBabeli, nende OMWAMI
20Mwikhung'aasie nimwitsa;
sitilane ahambi abeene nabeene,
inywe abeehonokooshe abomumahanga;
babula obumanyi abachinga omusaala kweshifwanani shiabwe eshibaatse,
nibasaaya omunyasaye ouranyala okhuhonia ta.
21Yilwatse, nimurusia amakhuwa keenywe;
yee, beebaalanile halala.
Niwina owalolosia kano okhurula khale?
Niwina owakaboola mundaalo tsiakhale?
Shindi nisie, OMWAMI?
Abulaho Nyasaye undi ta, habula isie;
Nyasaye omulunjishi, khandi omuhonia;
abulaho oundi ta, habula isie.
22Muhenje khwisie, ne mulahonibwa,
inywe tsindulo tsiosi tsieshialo;
shichila isie endi Nyasaye, nabulaho oundi.
23Nditsubile khwisie omwene,
likhuwa nalio lirulile mumunwa kwanje mubulunjishi,
ne shililakalukha ta;
mbu imbeli wanje buli lisikamo liosi lilasikama,
buli lulimi luleetsuha.
24Balaboola khwisie mbu MuMWAMI mwonyene
nimwo omulimwo obulunjishi namaani;
kata abandu balamwitsila ye,
abali nibamusinyishiile, nibafwimbwa omurwe.
25MuMWAMI nimwo omwa olwibulo lwosi lwaIsiraeli
lulaheebwa obulunjishi, nibeekhoyela muye.
Currently Selected:
Isaya 45: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
