Isaya 32
32
Omuruchi omulunjishi
1Lole, omuruchi alaruka nobulunjishi,
khandi abaami balaamiha nobukhalachi bwatoto.
2Ne buli mulala alaba shinga obwibiso mumuyeka,
nende ahamabiswi mumbumbuyeka;
shinga emialo chiamatsi mushialo eshiumu,
shinga eshiinikha shiolwanda olukhongo mushialo shiobuchoonyi.
3Ne tsimoni tsiabalola shitsilatimbwa ta,
khandi amarwi kabahulila kalarechelesia.
4Omwoyo kwomuyobe nakwo kulamanyilisia obulayi,
khandi olulimi lwoweshilimi lulanyala okhuboola habwene.
5Omundu omusilu shialalangwa mbu omukhulundu khandi,
kata omupele okhulangwa mbu owoluyali ta.
6Okhuba omusilu aboolanga akobusilu,
omwoyokwe nakwo kurechekhanga obumayaanu,
okhulechelesia Nyasaye,
nokhuboola akali amashiamu khuMWAMI,
okhwima abali inzala eshiokhulia,
kata okhuyiniaho eshiokhunywa khu abo aba obuloho buliitsanga.
7Ebia omupele akholelanga nabio nebibii;
arechekhanga amakhuwa amabii,
okhumalilana abamanani nende amakhuwa kobubeeyi,
kata olwa omutakha aboola akali habwene.
8Ne oweshiilongoole arechekhanga akeshiilongoole,
natinya khubiima bieshiilongoole.
Abakhasi beYerusalemu bachesiyibwa
9Buushe, inywe abakhasi abeelambisii, muhulile omwoyo kwanje;
inywe abeshikhasi abalechia amakhuwa, mureche amarwi khuka emboola.
10Inywe abakhasi abalechia amakhuwa,
tsindaalo nitsihweele etsishilakhwo omuyika kho mulatechela;
okhuba lichesa lietsinzabibu lilachweya,
tsindaalo etsiokhufuna shitsilabaho ta.
11Techele, inywe abakhasi abeelambisii;
nenje, inywe abarahendelanga likhuwa ta;
mwifwalule, mube eshihechenye,
mana mwibohe amakunia mubishienje bieenywe.
12Mwikhong'onde khubilifu, nimwikhuula emikunda emikaasu,
nende omutsabibu okwama muno.
13Tsisasaari nende ebisisia bilayumba khusbialo shiabandu banje;
yee, khutsinzu tsiosi tsiobusangaafu, mwitookho litsatsahafu;
14okhuba inzu ikhongo yilalekhwa;
litookho elietsulamwo abandu lilakwa likunda;
eshikulu nende eshiru bilakwa ebimenyo bietsisolo ebisoni nebisoni,
ahachamisia tsisishili tsinabulimo;
obwayilo bwebiayo;
15okhuula olwa roho yilatsushiililwa okhurula mwikulu,
khandi eshitsiimi nishikwa omukunda omunulu,
omukunda omunulu nakwo nikubasibwa mbu nobulimo.
16Mana obukhalachi bwatoto bulabeetsangaho mushitsiimi,
nabwo obulunjishi buleekhala mumukunda omunulu.
17Ne emilimo chiobulunjishi chilaba omulembe;
khandi ebiamo biobulunjishi, mbu obuholeelefu nende obwisiichi ebisoni nebisoni.
18Abandu banje balamenyanga habundu homulembe;
mubimenyo ebiisiikwa, nomubuhuluushilo obuholeelefu.
19Nebutswa amachina keifula kalakwa, mukhukwisibwa khwomutsuru;
litaala nalio lilatiitiyilibwa elala.
20Muli abeikhabi inywe abaraakanga khuluchingal lwamatsi kosi,
abalekhuulanga ing'ombe nende isishili.
Currently Selected:
Isaya 32: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
