Isaya 28
28
Obuchesiyii khuEfuraimu
1Woowe khulusimbi Iwobwichinjimisii lwabameesi baEfuraimu,
khandi khushimuli eshiniala shieing'oonoye mgaasu,
eshili enamurwe welibanda linulu liabeenabo abakhayilwe khulwa idivai!
2Lole, OMWAMI ali nende omundu omululu owamaani;
alalukwisia hasi namayukuba,
shinga ifula yamachina, imbumbuyeka eyimululanga,
ikhumatsi yamatsi akayemba.
3Olusimbi Iwobwichinjimisii lwabameesi baEfuraimu lulaseenelwa hasi;
4ne eshimuli eshiniala shieing'oonoye ingaasu,
eshili enamurwe welibanda linulu,
shilaba shinga likhuyu elienga, lichesa liako nilishili;
elia omundu yesi ouhenga olwa alilola,
kata nilishili mumukhonokwe, alimila bukala.
5Munduukho eyo OMWAMI omwene mahe alaba olusimbi Iweing'oono khandi oluchisa olukaasu khubasikaale mubandube;
6khandi nende roho yobukhalachi khumwenoyo owikhaale okhukhalaka ebiina,
khandi nende amaani khubo abakeng'elanga obulasani hashilibwa.
Obuchesiyii nende obusuubisii khuYerusalemu
7Ne khane bano nabo bayiyayiya nibameelile idivai,
khandi bashiamile khulwa amalwa;
omukuhani nende omunabii bayiyayiyile nibameelile amalwa,
idivai yibamilile bukala,
bashiamile khulwa amalwa;
bayiyayiya mukhulola,
beesichirala mubukhalachi.
8Okhuba tsimeesa tsiosi tsitsuule amasale nende eshifwabwi,
mbu mana habulaho ahatakatifu.
9Niwina owa aleechesia obumanyi?
Kata niwina owa alamanyilisilia amakhuwa keene?
Mbu abo abaleshesibwa okhunuuna,
nibarusibwa khulubeele noho?
10Okhuba kabeetsanga lilako khwilako lindi, iilako khwilako lindi;
eshichelo khushichelo shindi, eshichelo khushichelo shindi;
hano hatiiti, yaha hatiiti.
11Tawe; ne yakhasunjila oluyia luno nende abayobo,
abolulimi olucheni;
12olwatsana olwa yasunjila mbu Buno nibwo obuhuluushi,
mumuhuluusie oyo ouluyile;
buno nibwo obusakuluushi;
nebutswa bakhaya okhuhulila.
13Niko akachila likhuwa liOMWAMI lilaba khubo,
mbu lilako khwilako lindi, lilako khwilako lindi;
eshichelo khushichelo shindi eshichelo khushichelo shindi;
hano hatiiti, yaha hatiiti,
mbu batsie bakwe makalama, nibafunikha, nibahambwa, nibatiilwa.
14Khulwako, muhulile likhuwa liOMWAMI, inywe abakokonyi
abarukanga abandu bano abali muYerusalemu;
15okhuba mwaboolile muri Ifwe khwakholile indakano nokhufwa,
khandi khwafuchilisaniye nende Makombe;
olwa likhupache lieshinyasio eliyombeelela libira hakari,
shililoola khwifwe ta;
okhuba khwakholile obubeeyi obwilushilo bweefwe,
khandi khwibisile hasi wobukaatii;
16niko akachila Omwami NYASAYE aboola ari nanwa, mbu
Lole, nisie oukasiye muSayuni omuse,
mbu lichina, nilio lichina eliateemwa,
eliliimaasia lisiisi mukoona, eliolukoosi muno, liomuse omuralilu;
mbu Ousuubila shialatetekhana ta.
17Khandi ndalakhola obukhalachi omukoye,
nende obulunjishi ipulambu;
khandi amachina kelikulu kalayuula obwilushilo bwobubeeyi,
amatsi nako nikayemba habwibisilo.
18Ne indakano yeenywe nende okhufwa yilasiliisibwa,
khandi obufuchilisanii bweenywe nende Makombe shibulasinjila tawe;
olwa likhupache lieshinyasio eliyombeelela libira hakari,
nilwo olwa mulaseenelwa hasi ninalio.
19Buli olwa lilabiramwo lwosi, lilamubukula;
okhuba mutsuli shiamutsuli lilabirangamwo,
mushiteere khandi mushilo;
ne okhumanyilisia amakhuwa keene khwakhabe oburiisii bwonyene.
20Okhuba eshitali neshiimbichiti, eshia omundu aranyala okhwilambisiakhwo ta;
khandi eshiokhwifwimba neshinyelele eshia aranyala okhwifwimba tawe.
21Okhuba OMWAMI alabuukha shinga olwa yakhola mushikulu shiaPerasimu,
alaba noburima shinga olwa yali mwibanda liaGibeoni;
mbu mana akhole emilimochie echiamayia,
niyoosia eshikholeshie, eshikholeshie eshicheni.
22Kho bulaano muraba abakokonyi ta,
mbu ebitiili bieenywe bileshe okhunyikwa;
okhuba ndahuliile khuMwami, OMWAMI omwene mahe,
akeshihesi khubialo biosi pe.
23Reche amarwi, muhulile, omwoyo kwanje;
rechelesie, muhulile okhuboola khwanje.
24Omulimi alimanga natsiililila butswa mbu araache, noho?
Abuusanga amayindi kelilobalie natsiililila butswa?
25Olwa abeetsanga namalile okhulirelesia,
shiamiitsanga tsinuuni, nasalaasia tsing'ooli,
niyanza ingano munyali,
nende ishayiri habundu wayo,
nende ikusemeti khulwakho?
26Okhuba Nyasayewe amwibaalilanga habwene, namwechesia.
27Okhuba tsinuuni shitsihuulungwa nende eshihuulilo eshimemu,
kata omukurutumu kwelikaari shikuselenjesibwa khung'ooli ta;
nebutswa tsinuuni tsikhomwa nende olusaala,
natsio tsing'ooli nende indabushi.
28Imele yobusuma yitubulungwa noho?
Tawe, shiachihuulanga natsiililila butswa ta;
olwa achesiakhwo emikurutumu chielikaarilie nende tsifarasitsie, shiachitubulanga tawe.
29Kano nako karula khuMWAMI omwene mahe,
ouli owamakana mubwibaali,
khandi omukhulundu mubuchesi.
Currently Selected:
Isaya 28: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
