Isaya 29
29
Arieli nende abasukube
1Woowe khuArieli Arieli, litookho ewa Daudi yakhoma amaheemake!
Meetele omuyika khumuyika;
leshe amasabo kakalushe;
2mana ndalamiina Arieli;
ne tsilabaho tsimbungu nende amalilo;
naye alaba khwisie shinga Arieli toto.
3Nasi ndalakhukhomela amaheema kanje tsimbeka tsiosi,
nikhubotokhasilia abelihe, babe nende eshirandaalo,
nimbaswalila ebituuli.
4Nawe oleesibwa hasi, noboolela mwiloba,
okhuboolakhwo nikhububuurila mulufu;
ne omwoyokwo kulafwana shinga okwomundu webitsoyelo mwiloba,
khandi okhuboolakhwo khuleebootsela mulufu.
5Ne obunji bwabasukubo, balafwana shinga olufu olunyushe,
khandi obunji bwabamariisia shinga omukhuutsi okuhweetsanga;
kalabasundusia, meetsukhana.
6Olakoonywa nende OMWAMI omwene mahe,
nende okhukukuma khwelikulu, nokhurenga khweshialo, nobuyoka obukhongo,
nende imbumbuyeka nende eshiimbalakusi nende tsimemu tsiomulilo okusambanga.
7Khandi obunji bwamahanga kosi akaseelanga Arieli,
nibo bosi abamuseera ye nende olukobalwe, nibamumiina,
bulaba shinga lilooro, shinga libisulo eliomushilo.
8Kalaba shinga olwa omundu oulumwa inzala aloora, kho aliitsanga;
nebutswa asisimukha, ne ashili omukhaya;
kata olwa omundu ouliibwa obuloho aloora, kho anyweetsanga;
nebutswa asisimukha, ne khane aluyile, omwoyokwe nakwo kushiikomba kurio;
nolwa obunji bwamahanga kosi bulaba,
abaseera eshikulu shiaSayuni.
Obubofu nende obukaatii bwaIsiraeli
9Ng'ang'aale, muhuche;
mwibofusie tsimoni, mube ababofu;
mumeele, nebutswa khulwa idivai ta;
muyiyayiye, nebutswa khulwa amalwa ta.
10Okhuba OMWAMI yamutsushiililekhwo roho yetsindoolo tsinyinji,
namutimbia tsimoni, nitsio abanabii;
khandi emirwe chieenywe, nichio abalakusi, yachifuuniishe.
11Ne amabisulo kosi kakwile khwinywe shinga amakhuwa keshitabu eshiboyilwe, eshia abandu bamukaamila oundi owechesiibwe nibaboola bari Chama osoome shino; naye nakalusia ari Shinyala ta; shiboyilwe; 12khandi eshitabu eshio shikaamilwa oundj ouramanyile okhusooma ta, bari Chama osoome shino; naye ari Shindamanya okhusooma ta.
13Khandi OMWAMI yaboola mbu
Olwa abandu bano basitanga ahambi ninasi namakhuwa,
nibambeelesia oluyali nende eminwa chiabwe,
ne emioyo chiabwe bachisitiye ehale ninasi,
oburii bwabwe khwisie nibuli lilako liabandu elia beechile nende emirwe;
14niko akachila, lola, ndalatsiililila okhukhola omulimo kwamakana mubandu bano,
omulimo kwamakana nende amangaliimwa;
ne obuchesi bwabachesi babwe bulatiba,
khandi obumanyilisi bwabarechelefu babwe bilabiswa.
15Woowe khu abo ababisanga OMWAMI obwibaali bwabwe hasi muno,
aba ebikhole biabwe bili mushiilima,
nibaboola bari Oukhulola niwina?
Kata oukhumanyile niwina?
16Mufumaminjia amakhuwa inywe!
Omulonji yakhapaarwakhwo shinga litoyi,
mbu eshilonje shisunje khu oyo owashilonga,
shiri Shiyayanonga tawe;
kata eshindu eshikholilwe okhusunga khu oyo owashikhola, shiri
Shiali nokhumanyilisia ta?
Obununulwi bwalsiraeli
17Shishili eshise eshituutu butswa,
mana Lebanoni halakalulwa omukunda omunulu,
omukunda omunulu nakwo nikubasibwa mbu nomutsuru?
18Ne munduukho eyo abeekala amarwi balahulila amakhuwa keshitabu,
khandi tsimoni tsiababofu tsilalola okhurula mumaweliweli nende mushiilima.
19Abasandile nabo balameetela okhwikhoya okhunji muMWAMI,
ne abamanani mubandu balasangalila Omutakatifu waIsiraeli.
20Okhuba owamariisia alakwisibwa owabutswa, omukokonyi naye alamalilanwa,
nabo abahenjelelanga obumayaanu balamalilanwa;
21abamukholanga omundu omwonooni khulwa likhuwa elia baboola,
nibamurechela omubero oyo ouhalabilanga muluyia,
nibamushiukhasia omundu watoto nende likhuwa liabutswa.
22Niko akachila OMWAMI naboola ari nanwa,
omwenoyo owanunula Aburahamu, khumakhuwa keinzu yaYakobo;
mbu Yakobo shialatiilwa tsisoni bulaano,
kata shialafwimbwa omurwe bulaano ta.
23Ne olwa alola abaanabe hakari yaho,
nibo emilimo chiamakhono kanje,
kho balaahula eliira lianje;
balaahula Omutakatifu waYakobo,
nibamuria Nyasaye waIsiraeli.
24Nabo abashiamu mumioyo chiabwe balanyoola obumanyilisii;
nababuutsuluuli nabo balafuchiilila obwibaali.
Currently Selected:
Isaya 29: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
