Abaheburania 9
9
Habundu ahatakatifu ahomushialo, nende ahomwikulu
1Ne kata indakano yambeli yilia yali nende emilukha chiayo chiobukhalabani bwaNyasaye, nende habundu wayo ahatakatifu, ahali ahomushialo muno. 2Shichila liheema liakasibwa, ne hambeli halimwo eshichibi shietsitaha, neimeesa, nemikaate chiokhubaho; habwenaho halangwa mbu Habundu ahatakatifu. 3Ne inyuma weingubo ishinga yakhabili halimwo liheema elilangwa mbu Habundu ahashila obutakatifu; 4ahalimwo eshikaye shieitsahaabu shiamalesi kelibuuliesi nende lisanduku lioburumbusi eliafuumwa itsahaabu tsimbeka tsiosi, nililimwo inyungu yeitsahaabu eyalimwo imana tsana, neindabushi yaHaruni eyasebukha, norubaho rwoburumbusi; 5hekulu khulio balikhwo abakerubi boluyali nibafwimba litisilo tsana. Nebutswa bulaano shikhunyala okhuboola akebindu ebio biosi ta.
6Kho ebio biosi nibimalile okhukasibwa birio, abakuhani beenjilanga mwiheema hambeli obushia nobushia nibakhola akobukhalabani bwabwe; 7habula mwiheema liakhabili omukuhani omukhulundu yeenjilanga yenyene, lulala khumuyika, ne nareenjila aharali amalasile ta, aka ahaana khulwa ye omwene, khandi khulwa amakosa kabandu. 8Mwikhuwa elo Roho Omutakatifu amanyinjia shinga injila eyokhwinjila habundu ahatakatifu olwa yirashiafwimbulwa ta, Liheema liahambeli lilia olwa liali nilishiliho. 9Kata lienelo noluchelo olukhoyela eshise eshia khulimwo shino; eshisina mbu ebihaanwa nende emisango biahaanungwa, nebutswa shibianyala okhumukhola omwinamili oyo omulamba mumwoyo mukari tawe, 10shichila biali butswa ebiebiokhulia nebiokhunywa nebiobusiiyi lukano lukano; nemilukha chiomubili, echili nobunyali okhuula khunduukho yobukalulwi obuyia.
11Ne Kristo yamala okhwitsa, nali omukuhani omukhulundu wamalayi ako akamala okhwitsa. Yabirila mwiheema elishila obukhongo nobulamba, elirakholwa namakhono ta, eshisina mbu elirali eliomubulonje buno tawe. 12Yeenjilila elala habundu yaho ahatakatifu, lulala Iwenolwo lwonyene; ne shiyayeenjila nali nende amalasile ketsimbusi nebimoosi ta, habula nende amabanga keke, namalile okhunyoola obununulwi bwobumeli. 13Okhuba amalasile ketsimbusi netsisurusi, nelikoshe lieimoosi nilimiitswa khu abo aboonooneeshe, nibiba nibinyala okhubaahula nibibasiiya emibili, 14kho amabanga kaKristo, oweehaanila Nyasaye aharali eshikha shiosi ta, khulwa Rohowe wobumeli, shikalashila muno okhutisa emioyo chieefwe nokhurusiamwo ebikhole ebifu, mbu khukhalabanilenje Nyasaye oubeetsangaho mwoyo?
15Ne niko akachila ye niye wanjila weindakano imbia, mbu olwa okhufwa khundi khumalile okhwikhola, okhunyoola obununulwi mubukhayi obwali bweindakano eyambeli, mana abalanje balie obulaame bwobumeli obwasuubisibwa. 16Shichila aha indakano yobulaame yili, khatimba akokhufwa khwomwenoyo owachilaka kamanyishile elala. 17Okhuba indakano yobulaame yili nobunyali okhufwa nikhumalile okhwikhola; shiyilikhwo nobunyali bwosi ta olwa owachilaka ashili mwoyo. 18Niko akachila kata eyambeli eyo shiyasimikhwa aharali amalasile ta. 19Okhuba olwa Musa yali namalile okhuboolela abandu bosi buli lilako liosi eliomumalako, yamala nabukula amalasile kebimoosi ebio netsimbusi, nende amatsi nobwoya bwamakondi oburanzayi namabinu, namiitsa khushitabu shiene nende khubandu bosi, 20nasunga mbu Amalasile keindakano eya Nyasaye yamulaka inywe ngakano. 21Khandi nende liheema nebikholelo biosi biobukhalabani, yabimiitsakhwo amalasile ario. 22Kata ndakhanyala okhusunga mbu mumakhuwa kamalako ebindu biosi bitisungwa amalasile; naharali okhuraatsa amalasile, obulesheli bubula.
Obwonooni bwayinibwaho khulwa omusango kwaKristo
23Kho kali nikakhoyeele mbu ebifwanani biebiomwikulu bisiiyilwe echienechio; ne ebiomwikulu biene bisiiyilwe emisango echishila echio. 24Shichila Kristo shiyayeenjila habundu ahatakatifu ahakholwa namakhono, ahalwanana nelikondo liahatoto, ta; habula mwikulu mwene, okhulolekha bulaano imbeli wetsimoni tsiaNyasaye khulweefwe. 25Kata shiyayeenjilamwo okhwihaananga omwene akhandi akhanji ta, shinga omukuhani omukhulundu olwa yeenjilanga habundu ahatakatifu omuyika buli muylka, namalasile akarali akeke omwene ta; 26nikakhabeele kario, kakhabeelenje nikakhoyeele mbu asaalilenje akhandi akhanji okhurula khumusuule. Nebutswa luno lulala lwonyene, khubumaliilishi bweshise shino walolosiibwe, okhuyiniaho obwonooni khulwa okhwimala omwene abe omusango. 27Ne shinga olwa kalakwa mbu abandu bafwe lulala, mana olunyumakhwo obuyaasibwi nibubaho, 28nolwa Kristo yesi yahaanwa lulala ario, okhwituukha ebionoono biabanji, khandi alalolekha olwakhabili, khukobwonooni ta, habula khulwa obuhonia bwa abo abamulindiililanga.
Currently Selected:
Abaheburania 9: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
