Abaheburania 13
13
Obukhalabani obuchamisia Nyasaye
1Mutsiililile okhuheelananga nabaana beenywe tsindaalo tsiosi.
2Murachweyanga okhwinjisia abacheni ta; shichila munjila eyo baliho abeenjisiye abamalaika nibaramanya ta.
3Mwitsulilenje abali mumbohe, shinga ababohwa ninabo halala; nende abakholelungwa obubii, shinga inywe mwesi murio olwa mushili mumubili.
4Obuteeshanii bubeetsenje noluyali mubandu bosi, obulili nabwo niburoonoonekha ta; shichila Nyasaye alabayaasia abasooti nabaheyi.
5Murabohungwa nobuheeli bwamapeesa ta; mufuchiilile mbu ebia muli ninabio bimuhelile; shichila ye omwene yasunga mbu Shindalakhulekha kata okhukhwibala nahatuutu ta. 6Khulwako khunyala okhuuma ikholo, nikhusunga mbu
Omwami niye omuhabini wanje, shindalariitsanga ta;
nishiina eshia omundu namundu alanyala okhu'kholela?
7Mwitsulilenje abo abalinji abeemilisi beenywe, abamuboolela amakhuwa kaNyasaye; ne olwa muyililisia khubumaliilishi bwobulamu bwabwe, mulonde obusuubili bwabwe.
8Yesu Kristo abeetsanga ario eshiabeele, khandi leelo, khandi inziayo. 9Murayilungwa hosi hosi nameechesio akambanga amacheni ta. Kakhoyeele mbu omwoyo kuralisibwe khulwa obukoosia, ne khulwa emisilo chiebiokhulia ta; shichila abachilondanga echio shibanyoolelamwo inganga yosi tawe.
10Khuli nende eshimalilo shieefwe shiemisango, eshia abo akakhalabanila mwiheema barafuchiililwa okhulia khubiakhwo ta. 11Emiruko echia omukuhani omukhulundu aleeranga amalasile kachio habundu ahatakatifu kabe omusango khulwa obwonooni, ebilundu biachio bimalanga bisambilwe elwanyi weikambi. 12Ne niko akachila Yesu naye yasaalilila elwanyi weshilibwa, mbu yaahule abandu khulwa amabangake. 13Khulwako neefu khurule khumutsiile elwanyi weikambi, nikhwifwila amanyeko aka ye yanyekwa. 14Shichila hano shikhuli nende litookho elimenya ta; nebutswa khukhaabanga lienelo elili okhwitsa. 15Kho khumalilenje Nyasaye omusango kwobwitsomii obushia nobushia, nikhubirila muye; nikwo ebiamo bieminwa echiiyamanga eliiralie. 16Ne khureebilila okhukholanga amalayi nokhukabana nabashieefwe ebia khuli ninabio, ta; shichila emisango echifwana chirio nichio echia Nyasaye achamanga.
17Hulilenje abeemilisi beenywe, nimuboongolelai okhuba beekhalanga meeso khulweenywe, shinga olwa bakhoyile okhukalusia amakhuwa khulweenywe; mbu mana bakholenje bario nobusangaali, nibarakhola nobushenyi ta; shichila obwo shibwakhamukaasila tawe.
18Mukhusaayilenje; okhuba khusuubilanga shinga olwa khuli nomwoyo omulayi, nikhwenyanga okhuchenda habwene mumakhuwa kosi. 19Emusaaya okhushila muno khwikhuwa lino, mbu emukalusilibwe bwangu.
Okhubasaayila, nokhuseebulana ninabo
20Ne bulaano, Nyasaye womulembe, owarusia mubafu omwayi omukhongo wamakondi, niye Omwami weefwe Yesu, namabanga keindakano yobumeli, 21amukhole abalamba mubuli lilayi liosi, okhukholanga aka yeenya. Akhole mwifwe akeenako akamuchamisia khulwa Yesu Kristo, oukwanile oluyali ebisoni nebisoni. Amina.
22Emusaaya, baana beefwe, mwismlilisilie likhuwa lino liobuchesiyii, okhuba emuhandiichiile mubwimbichiti butswa. 23Mumanye mbu omwana weefwe Timotseyo waboholoolwe mububohwi; naba niyoola bwangu, khwakhamulole halala ninaye.
24Mushiesilie abeemilisi beenywe bosi, halala nende abatakatifu bosi. AbaItalia bamushuesiye. 25Obukoosia bube nineenywe mwesi. Amina.
Currently Selected:
Abaheburania 13: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
