Okhurula 1
1
Okhumiinwa khwabaIsraeli eMisiri
1Kano niko ameera kabaana baIsiraeli, abeetsa eMisiri; buli mundu nende abeinzuye nibatsia halala nende Yakobo. 2Mbu Reubeni, naSimeoni, naLawi, naYuda; 3Isakhari, naZabuloni, naBenyamini; 4Dani naNafutali, Gadi naAsheri. 5Ne abandu bosi abarula munda yaYakobo bali abandu amakhumi musaafu; naye Yusufu yali niyamala okhubayo eMisiri. 6Mana Yusufu nafwa, nende abaana babwe bosi, nende bosi abolwibulo Iwenolwo. 7Nabo abaana baIsiraeli beebulana, nibaselasela, nibeenjiha, nibashilaana amaani muno muno; nibeetsula mushialo.
8Haho omuruchi omuyia nabuukha eMisiri, ouramumanya Yusufu ta. 9Naye nasunjila abandube ari Lole, abandu bano, abaana baIsiraeli, bakhushila obunji, khandi bakhushila amaani; 10chende khubakholele akobuchesi, baleshe okhwinjiha, mana olwa lihe liosi liakhabuukha, bakheeyunga khubasuku beefwe, nibakhuseera, nibarula mushialo shino. 11Kho mana baraho khubo abasinjilili abokhubalunyia mbu babamiine nemisiiko emisiro. Niboombashila Farao amataala kobubiishi, mbu Pitsomu nende Ramesesi. 12Ne shinga olwa bameeta okhubamiina, nindio bameeta okhwinjiha, khandi nindio bameeta okhulanda khushialo. AbaMisiri nibatang'a khulwa abaana baIsiraeli. 13Nabo abaMisiri babalunyial abaana baIsiraeli butinyu mbu bakhalabane; 14nibakhola tsindaalo tsiabwe tsindulu khulwa emilimo emitinyu, echielitoyi nende echiamatofali, khandi khulwa emilimo chiosi echiahukhaane mumikunda, mbu emilimo chiabwe chiosi echia babakhosia butinyu.
15Mana omuruchi waMisiri yasungana nende abeebusia abaHeburania, mulala oweliira mbu Shifira, noundi oweliira mbu Pua; 16nasunga ari Buli lwosi olwa muleebusinjia abakhasi abaHeburania, nimubalola nibali khushisaala eshiokhwibulilakhwo, naba nali omwana omusiani, mumwire; ne naba nali omwana omukhaana abe mwoyo. 17Nebutswa abeebusia abo bamuriitsanga Nyasaye, kho shibakhola shinga olwa omuruchi waMisiri yabalaka tawe, habula bahonokosia abaana abasiani babe mwoyo. 18Mana omuruchi waMisiri nalanga abeebusia abo, nabareeba ari Mbushiina nimukhola likhuwa lino, nimubahonokosinjia abaana abasiani babe mwoyo? 19Abeebusia nibakalusia Farao bari Shichila abakhasi abaHeburania shibali shinga abakhasi abaMisiri tawe; okhuba nabaangu, ne beebulanga olwa omwibusia abeetsanga narashioola ta. 20Kho Nyasaye yabakholela abeebusia abo amalayi; abandu nabo nibeenjiha, nibaba namaani muno. 21Ne olwa abeebusia abo bali nibariitsanga Nyasaye, yabasinjisilia tsinzu. 22Naye Farao nalaka abandube bosi, ari Buli mwana omusiani owibulwa, mumusukune mumwalo kwaNaili; ne buli mwana omukhaana, mumuleshe abe mwoyo.
Currently Selected:
Okhurula 1: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
