Genesis 46
46
Yakobo nabelitaalalie batsia eMisiri
1Mana Isiraeli nabuusia oluchendo halala nende biosi ebia yali ninabio, niyoola eBeeri-sheba, namalila Nyasaye waIsaka samwana emisango. 2Nyasaye nasungana nende Isiraeli mumabisulo akomushilo, naboola mbu Yakobo, Yakobo. Naye nafuchila mbu Endiho. 3Naboola mbu Isie msie Nyasaye, mbu Nyasaye waso; oraria okhukholomokha okhuula eMisiri ta; okhuba ebweneyo ndalakhukhola obe lihanga likhongo. 4Isie ndalakholomokha halala ninawe okhuula eMisiri; ne toto, ndilikhutikulusia khandi okhurulayo; naye Yusufu alira omukhonokwe khumonitsio. 5Yakobo narula eBeerisheba; abaana baIsiraeli nabo nibabukula Yakobo saabwe, nende abaana babwe abatiiti, nende abakhasi babwe, mumakaari aka Farao yali nayilileyo okhumuchinga. 6Nibabukula nende emiruko chiabwe, nemiandu chiabwe chiosi echia oali nibanyoolile mushialo shiaKanaani, niboola eMisiri, Yakobo nende olwibulolwe lwosi halala ninaye; 7mbu abaanabe abasiani, nende abasiani babaanabe bosi, nabakhaanabe, nende abakhaana babaanabe, nende olwibulolwe lwosi, yeenjila ninalwo eMisiri.
8Ne ameera kabaana baIsiraeli abeenjila eMisiri, Yakobo nende abaanabe abasiani, ngakano; mbu Reubeni, omwana wambeli waYakobo. 9Nende abaana baReubeni; mbu Hanokhu, nende Palu, nende Yezeroni, nende Karami. 10Nende abaana baSimeoni; mbu Yemuel, Yamini, Ohadi, Yakhini, Zohari, nende Shauli omwana womukhasi omuKananayo. 11Nende abaana baLawi; mbu Gerishoni, Kohatsi, nende Merari. 12Nende abaana baYuda; mbu Eri, Onani, Shela, Faresi, nende Zera; habula Eri nende Onani bafwila mushialo shiaKanaani. Nabaana baFaresi nibo Hezeroni nende Hamuli. 13Nende abaana baIsakhari; mbu Tola, Puwa, Iyobu, nende Shimironi. 14Nende abaana baZabuloni; mbu Seredi, Eloni, nende Yaleeli. 15Bano nibo abaana baLea mukha Yakobo, aba yeebulila ePadanaramu, halala nende omwanawe omukhaana Dina; abandu bosi, abaanabe abasiani nende abakhaana, bali amakhumi kataru nabataru. 16Nende abaana baGadi; mbu Zifioni, Habi, Shuni, Ezeboni, Eri, Arodi, nende Areli. 17Nende abaana baAsheri; mbu Imina, Ishiwa, Ishiwi nende Beria, nende Sera omukhaana wabwe; nabaana baBeria, mbu Heberi nende Malakhieli. 18Bano nibo abaana baZilipa, owa Labani yamuheelesia Lea omukhaanawe, ne bano nibo aba yamwibulila Yakobo, abandu ekhumi nabasasaba. 19Abaana baRaheli, omukhasi waYakobo; mbu Yusufu nende Benyamini. 20Naye Yusufu niyeebula Manase nende Efuraimu mushialo shiaMisiri, aba Asenati omukhaana waPotifera omwisaaliisi waOni yeebula. 21Nende abaana baBenyamini; mbu Bela, Bekheri, Ashabeli, Gera, Naamani, Ehi, Roshi, Mupimu, Hupimu, nende Aradi. 22Bano nibo abaana baRaheli, aba Yakobo yeebula; abandu bosi bali ekhumi nabane. 23Nende abaana baDani; mbu Hushimu. 24Nende abaana baNafutali; mbu Yazeeli, Guni, Yezeri, nende Shilemu. 25Bano nibo abaana baBiliha owa Labani yaheelesia Raheli omukhaanawe, ne bano nibo aba yamwibulila Yakobo; abandu bosi bali musaafu. 26Abandu bosi abeeniila halala nende Yakobo, abarula mundaye, aharali abakhasi babaana baYakobo, abandu bosi bali amakhumi kasasaba nabasasaba; 27nabaana baYusufu, aba yeebulila eMisiri, bah abandu babili; abandu bosi abeinzu yaYakobo abeenjila eMisiri bah amakhumi musaafu.
Yakobo nabelitaalalie muMisiri
28Namuruma Yuda imbeliwe ewaYusufu, mbu amwibaalile injila imbeliwe, eyitsia mushibala shiaGosheni. Kho nibeenjila mushibala shiaGosheni. 29Naye Yusufu nakasia likaarilie ietsifarasi, natihulukha okhutsia okhubukaanila Isiraeli samwana okhuula eGosheni; niyeelolosia imbeliwe, namukwakhwo mwikosi, nalilila mwikosilie eshise eshikali. 30Naye Isiraeli nasunjila Yusufu mbu Bulaano efwe, shichila emalile okhulola mumonimwo, noshiliho mwoyo. 31Mana Yusufu naboolela abaana babwe nende abomunzu yasanwana ari Ndalatikulukha enzie emuboolele Farao, nimusuniila mbu Abaana beefwe, nende abomunzu yapara, ababeelenje mushialo shiaKanaani, banzitsiile; 32ne abasaatsa abo nabaayi, okhuba babeetsanga abaruchi bemiruko; nabo beetsile nende ebiayo biabwe, nende tsing'ombe tsiabwe, nende biosi ebia bali ninabio. 33Kho nakabe mbu olwa Farao namulanje namureeba mbu Emilimo chieenywe echia mukholanga nemilimo shiina? 34Kho namusunje muri Abasumbabo khubeetsanga abaruchi bemiruko okhurula khubwana bweefwe okhuula bulaano, ifwe khandi nende abakuuka beefwe mbu mana mumenye mushialo shiaGosheni, okhuba buli mwayi nomusilo khubaMisiri.
Currently Selected:
Genesis 46: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
