Genesis 45
45
Yusufuyeebuulila abaa na babwe
1Habwene yaho Yusufu yakhaywa okhwisimilisia imbeli wa abo bosi abali nibasinjiile ahambi ninaye; nachinga omwoyo nasunga mbu Murusie shia omundu imbeli wanje. Ne shiyasinjilaho omundu yesi ahambi ninaye ta, olwa yeebuulila abaana babwe. 2Nachinga olukhu nalila; abaMisiri nabo nibahulila, abomunzu yaFarao nabo bosi nibahulila. 3Yusufu naboolela abaana babwe mbu Nisie Yusufu; papa ashili mwoyo noho? Ne kata abaana babwe nibaranyala okhumukalusiamwo ta; okhuba beeria muno imbeliwe.
4Yusufu nasunjila abaana babwe mbu Sitekhwo ahambi. Nibasita ahambi. Naboola mbu Nisie Yusufu omwana weenywe, owa mwakusia eMisiri. 5Ne murabeelela kata okhwisinyishila abeene khulwa okhungusia yino tawe; okhuba Nyasaye yanyimisia imbeli weenywe okhuhonia obulamu bwabandu. 6Okhuba bulaano nemiyika chibili inzala niyiliho khushialo; khandi chihiliyo emiyika chiraano eehiranyala okhulimwa kata okhucheswa ta. 7Ne Nyasaye yanyimisia imbeli weenywe okhumuhonia mube omusikalo mushialo, nende okhumuhonia mube mwoyo nende obuhonia obukali. 8Iiho bulaano shimuli inywe abanyimisia yino tawe, habula niNyasaye; ne niye owakhola okhuba shinga samwana Farao, khandi omwami owemekhwa munzuye, khandi omuruchi owemekhwa mushialo shiosi shiaMisiri. 9Yanguhe, mutikulushe mutsie ewapapa, mumusunjile mbu Omwanawo Yusufu aboola mbu Nyasaye yakholile okhuba omwami waMisiri yosi; kho bulaano okholomoshe witse ewa endi, norashinda ta; 10mana omenye mushialo shiaGosheni, obeetsenje ahambi ninasi, iwe, nende abaanabo, nende abeetsukhulubo, nende ebiayobio, nende tsing'ombetsio, nende biosi ebia oli ninabio; 11ne ndalakhuliisilinjia habwenaho; okhuba chishili emiyika chiraano chieinzala; mbu oleshe okhuhweelwa emiandu, iwe, nende litaalalio liosi, nende biosi ebia oli ninabio. 12Lole, tsimoni tsieenywe tsiluutsi, halala nende tsimoni tsiomwana weefwe Benyamini, mbu nomunwa kwanje isie okusungananga nineenywe. 13Kho mulatoonyela papa akoluyali lwanje lwosi eMisiri, nende kosi aka muluutsi; mwanguhe, muleere papa hano. 14Mana nakwa mwikosi liaBenyamini omusiani wabwe, nalila; naye Benyamini yesi nalilila mwikosi lilie. 15Natsunzuuna abaana babwe bosi, nabalililakhwo; mana olunyumakhwo abaana babwe nibakhupa ninaye imbakha. 16Amakhuwa ako nikatswana nikahuliilikha munzu yaFarao, mbu Abaana babwe Yusufu beetsile. Nikaba amalayi imbeli waFarao nende imbeli wabakholibe. 17Farao naye namuboolela Yusufu mbu Obasunjile abaana beenywe mbu Mukhole muri; mutuushe emiruko chieenywe emisiiko, murule mutsie mushibala shiaKanaani; 18mana mubukule seenywe, nende abomwitaala lieenywe, mwitse ewa endi yino; nasi ndalamuheelesia ebilayi ebiomushibala shiaMisiri, neenyu mulalia khubunulu bweshibala. 19Iiho bulaano, okhulakwa olakwa; mukhole muri nanwa, mbu mubukule emakaari ketsing'ombe okhurula mushialo shiaMisiri khulwa abaana beenywe abatiiti nende abakhasi beenywe, muleere seenywe, mwitse ninaye. 20Khandi murahendela emiandu chieenywe ta; okhuba ebilayi bieshialo shiosi shiaMisiri nebieenywe.
21Nabo abaana baIsiraeli nibakhola bario; Yusufu naye nabaheelesia amakaari, shinga Farao olwa yali nalachile, nabaheelesia nende ebiliibwa biokh unjila. 22Ne bosi yabaheelesia buli mundu ebiifwalo bindi ebiyiakha; ne Benyamini, yamuheelesia tsifeetsa ebikhumi bitaru nende tsingubo tsimbiakha shikharaano. 23Ne khusamwana yamukoobela ebindu bino, mbu tsisishili ekhumi etsiachinga ebindu ebilayi biaMisiri, khandi nende tsisishili tsikhasi ekhumi etsiachinga imelel nemikaate nende ebiliibwa, ebia samwana aliila khunjila. 24Kho naseebula abaana babwe, nabo nibatsia; nababoolela mbu Muleshe okhusoolanila khunjila. 25Nibatikulukha okhurula eMisiri, niboola mushibala shiaKanaani, ewaYakobo saabwe. 26Nibamuboolela bari Yusufu ashili mwoyo okhuula bulaano, ne niye omwami owemekhwa mushibala shiosi shiaMisiri. Naye nafwa omwoyo, shichila shiyasuubila aka baboola ta. 27Nibamutoonyela amakhuwa kosi akaYusufu, aka yali nasungaane ninabo; mana olwa yalola amakaari aka Yusufu yali nakoobileyo mbu kamubukule, omwoyo kwaYakobo saabwe nikukalukha. 28Isiraeli naboola mbu Kambelile; Yusufu omwana wanje ashili mwoyo; nenzie endolane ninaye nishili okhufwa.
Currently Selected:
Genesis 45: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
