Genesis 43
43
Abaana babwe Yusufu beetsa khandi, nibali nende Benyamini
1Ne inzala niyilula khushialo. 2Kho olwa bali nibamalile okhulia imele eya bali nibarusiye eMisiri, saabwe yabasunjila mbu Kalusheyo, mukhukulilekhwoyo ebiliibwa. 3Yuda namuboolela ari Omusaatsa oyo yakhulachilisia obutinyu, nasunga ari Shimulindolakhwo mumoni tawe, habula nimuli nende omwana weenywe oyo. 4Noruma omwana weefwe halala nineefwe, kho khulakholomokha nikhukhukulila ebiliibwa; 5ne noramuruma ta, shikhulakholomokha tawe; okhuba omusaatsa oyo yakhusunjila aui Shimulindolakhwo mumoni tawe, habula nimuli nende omwana weenywe. 6Isiraeli nasunga mbu Mbushiina nimukholela obubii murio, nimuboolela omundu oyo shinga olwa muli nende omwana weenywe oundi? 7Nibasunga bari Omundu oyo yakhureebelesia khumakhuwa keefwe, nende akabeweefwe, ari Seenywe ashili mwoyo? Ne mulikhwo nende omwana weenywe oundi? Ifwe nikhumukalusia shinga amareeboke olwa kali; khwakhamanyile khurie mbu yeetsa oldlusunga mbu Mwitsane nende omwana weenywe? 8Yuda naboolela Isiraeli samwana mbu Ruma omuyia halala ninasi, kho Dakhurule khwatsia; mbu mana khube mwoyo nikhurafwa ta, ifwe ninawe halala nende abaana beefwe abatiiti. 9Nasi ndalaba omusingokwe; olimwenya mumukhono kwanje; nimba nindamukalusia khwiwe nende okhumura imbeliwo ta, kho eshiina shilaba khwisie tsindaalo tsiosi; 10okhuba nikhuba nikhurashindilekhwo ta, khane khwakhaba nikhucheleele olwakhabili.
11Mana saabwe Isiraeli nabasunjila mbu Nikaba kario bulaano, khole muri naulwa; mbu mubukulekhwo khubindu ebishila obulayi bieshialo mubichinjilo bieenywe, mumuyilile omundu oyo eshihaanwa, mbu indesi yeshiuya eshilayi, nende obuushi, nende obubaane, nende manemane, tsinjuku, nende tsilusi; 12bukule nende amapeesa mumikhono chieenywe eshikhabili; namapeesa ako akakalusibwa muminwa chiamakunia keenywe, mutsie ninako mumikhono chieenywe; haundi keebililwa butswa. 13Mubukule nende omwana weenywe, murule, mutsie ewomusaatsa oyo khandi; 14ne Nyasaye Ounyala-biosi achile mubeelwe tsimbabasi imbeli womundu oyo, mbu amulekhuulile omwana weenywe oundi oyo, nende Benyamini. Nasi nifwilwa abaana banje, efwilwe. 15Kho abandu abo nibabukula ebihaanwa ebio, nibabukula nende amapeesa mumikhono chiabwe shikhabili, nende Benyamini yesi; nibarula, nibatsia eMisiri nibasinjila imbeli waYusufu.
16Nolwa Yusufu yamulola Benyamini nali ninabo, yamusunjila omusinjilili weinzuye mbu Beenjisia abandu abo munzu, osinze inyama okasie; okhuba abandu abo nabalie halala ninasi mushiteere. 17Omundu oyo nakhola shinga Yusufu olwa yamubiila, nabeenjisia abandu abo munzu yaYusufu. 18Ne abandu abo nibaria olwa beenjisibwa munzu yaYusufu j nibaboola mbu Namakhuwa kamapeesa kalia akakalusibwa mumakunia keefwe olwambeli, akachila nikhwinjisibwa muno; mbu mana anyoole obwiyangu khwifwe akhurulilekhwo, nakhuhamba nakhukhola abasumbabe, nende tsisishili tsieefwe. 19Nibasita ahambi khumusinjilili weinzu yaYusufu, nibasungana ninaye hamuliango weinzu 20nibasunga bari Omwami, ifwe toto khwakholomokha olwambeli okhukula ebiliibwa; 21ne olwa khwoola aha khwakonela, nikhuboholola amakunia keefwe, amapeesa kabuli mundu kali mumunwa kwelikunialie, amapeesa keefwe shinga olwa kachelwa habwene; ne khandi khwitsile ninako mumikhono chieefwe. 22Khandi nende amapeesa kandi khwitsile ninako mumikhono chieefwe akokhukula ebiliibwa; shikhumanyile mbu niwina owara amapeesa keefwe mumakunia keefwe ta. 23Naye nababoolela mbu Mukwe emioyo; muraria ta; Nyasaye weenywe, ne niye Nyasaye waseenywe, yamuheelesiye ikhabi mumakunia keenywe; ndanyoola amapeesa keenywe. Mana nabarusilia Simeoni. 24Omusaatsa oyo niyeenjisia abandu abo munzu yaYusufu, nabaheelesia amatsi, nibeeyosia amakulu; khandi naheelesia tsisishili tsiabwe ebia tsilia. 25Nabo nibakasia ebihaanwa ebio bilindilile Yusufu olwa nayeetsa mushiteere; okhuba bali nibahuliile mbu nabalie ebiliibwa ebweneyo.
26Nolwa Yusufu yachelela hango, nibamuyilila ebihaanwa ebia bali ninabio mumikhono chiabwe munzuwe, nibamwinamila okhuula hasi. 27Naye nabareeba akobulamu bwabwe, nasunga mbu Seenywe nomulamu, omukofu watsana owa mwaboolakhwo? Ashili mwoyo? 28Nibaboola bari Omusumbawo seefwe nomulamu; ashili mwoyo. Nibabunamia emirwe chiabwe, nibamwinamila. 29Naye nachinguula tsimonitsie, nalola Benyamini omusiani wabwe, omwana wanyina, nasunga mbu Uno niye omwana weenywe omushe, owa mwamboolela amakhuwake? Naboola mbu Nyasaye akhukoosie obukoosia, mwana wanje. 30Mana Yusufu nakhola bwangu; okhuba omwoyokwe kwaliibwa amahoofu khumusiani wabwe; nakhaaba ahokhulilila, niyeenjila mushikoroshie, nalililamwo. 31Niyeeyosia mumoni, narula; niyeesimilisia, nasunga ari Leere ebiliibwa. 32Nibamurenjeshela yenyene, nabo yabo bonyene, nabo abaMisiri aba yaliitsanga ninabo bonyene; okhuba abaMisiri shibafuchiilila okhulia ebiliibwa halala nende abaHeburania ta; okhuba kwalinji omusilo khubaMisiri. 33Nibeekhala imbeliwe, omukhulundu khubukhulundu bubwe bwobwibule, naye omushe khubutuutu bubwe; abandu abo nibahumana abeene bonyene. 34Naye nabamechela khubiliibwa okhurula khumeesaye; ne eshitonye shiaBenyamini shiashila eshiabandi bosi khubo khandi kharaano. Nibanywa, nibatsatsahala halala ninaye.
Currently Selected:
Genesis 43: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
