Genesis 42
42
Abaana babwe Yusufu beetsa eMisiei okhurunda imele
1Kho Yakobo yalola mbu imele yiliyo eMisiri; mana Yakobo nasunjila abaanabe ari Mukhahengananga murie? 2Naboola mbu Lole, embuliile shinga imele olwa yiliyo eMisiri; kholomosheyo, mukhurundile; mbu khube abalamu, nikhurafwa ta. 3Mana abaana babwe Yusufu ekhumi nibakholomokha eMisiri okhurunda imele. 4Ne Benyamini, owomwabo Yusufu, Yakobo shiyamuruma halala nende abaana babwe ta; okhuba yaboola mbu Haundi yakhanyoola amabii. 5Ne abaana baIsiraeli nibeetsa okhurunda mubeenabo abeetsangayo; okhuba yaliho inzala mushibala shiaKanaani.
6Naye Yusufu yali omwami weshibala; neniye owabakusinjia bosi abeshibala eshio ebiokhulia; mana abaana babwe Yusufu nibeetsa nibeenama hasi imbeiiwe. 7Ne Yusufu nalola abaana babwe, nabamanya, naye niyeefwayafwayia shinga ourabamanyile ta, nasungana ninabo obutinyu; nabareeba mbu Murulile heena? Nabo nibaboola bari Khurulile mushialo shiaKanaani; khwitsile okhurunda ebiliibwa. 8Yusufu nabamanya abaana babwe, nabo nibaramumanya ta. 9Yusufu niyeetsulila amalooro aka yaloora khubo, nabasunjila mbu Muli abaluuri; okhukoonya eshialo shinga olwa shili eshikhaya nikhwo okhuchila nimwitsile. 10Nibamusunjila mbu Tawe, omwami, ne okhurunda ebiliibwa nikhwo okhuchilile abasumbabo nibeetsa. 11Ifwe fwesi khuli abaana bomundu mulala; khuli abandu batoto; abasumbabo shibali abaluuri ta. 12Naye nababoolela ari Tawe; ne okhulola eshialo shinga olwa shili eshikhaya nikhwo okhuchilile nimwitsa. 13Nibasunga mbu Ifwe abasumbabo khuli abaana ekhumi nababili bomundu mulala mushialo shiaKanaani; ne lola, omushe weefwe ali nende seefwe leelo; ne mulala shialiyo tawe. 14Yusufu nabasunjila ari Kali butswa shinga olwa emusunjiile; mbu muli abaluuri inywe; 15ne nolwa mulamanyikha; mbula, Farao nafwile! Nebutswa shimularula hano omwana weenywe omushe nashili okhwitsa tawe. 16Rume mulala khwinywe atsie, amwende omusiani weenywe, ne abandi mulabohwe, okhuula amakhuwa keenywe olwa kalamanyikha, nimuli abatoto nohomba; nebutswa, nikarali kario ta, shinga Farao olwa ali mwoyo shimuchweyakhwo okhuba abaluuri ta. 17Nabara bosi mundindi tsindaalo tsitaru.
18Mana khunyanga yakhataru Yusufu yabasunjila mbu Khole muri nanwa, kho mulahona; okhuba isie emuriitsanga Nyasaye. 19Nimuba nimuli abandu batoto, omusiani weenywe mulala abohwe munzu yeindindi eya mwaboyilwemwo; neenyu mutsie, muyile imele khulwa obutakha bwomunzu tsieenywe, 20mundeerele omwana weenywe omushe; kho obwatieri bwamakhuwa keenywe bulamanyikha, muleshe okhufwa. Nibakhola bario. 21Nibasungana abeene bonyene bari Toto mwene, khuli nende eshiina khumakhuwa komwana weefwe; mbu khwalola amasila akomumwoyokwe olwa yakhusaayanga, nikhukhaya okhumuhulila; niko akachila amasila kano nikakhukwila. 22Reubeni nabakalusia ari Shindamusunjila ndi Muramwonoonela omwana; nimukhaya okhuhulila, ta? Niko akachila lole, aunabangake nako kabanzwa. 23Ne shibamanya shinga Yusufu olwa yabahulilanga ta; shichila yaliho omutafutal hakari wabo. 24Naye niyeekwenya elubeka, nalila amasika; mana nakalukha, nasungana ninabo; mana niyaahula Simeoni mubo, namuboha imbeli wabwe. 25Mana Yusufu nalaka mbu beetsusie imele mubichinjilo biabwe, nende okhukalusia amapeesa kabuli mundu mwikunialie, nokhubaheelesia ebiliibwa biokhunjila; nolwa bakholelwa bario.
Abaana babwe Yusufu bakalukha ebuKanaani
26Nabo nibatuukha tsisishili tsiabwe imele, nibahwaho. 27Ne mulala khubo olwa yeekula likunialie okhuliisia isishiliye habundu ewa bakona, yeetsukhana nalola amapeesake nikali mumunwa kwelikunia. 28Nabasunjila abaana babwe mbu Amapeesa kanje kakalusiibwe; lole, ngakano mwikunia lianje; mana nibafwa omwoyo, nibahengana nibachaaka okhutechela, nibasunga bari Nelikhuwa shiina lino elia Nyasaye akhukholeele?
29Kho niboola ewaYakobo saabwe mushialo shiaKanaani, nibamuboolela kosi akali nikabeekholeele; nibaboola bari 30Omusaatsa tsana, omwami weshibala eshio, yasungana nineefwe amakhuwa amatinyu, nakhukulikha mbu abaluuri beshialo. 31Neefu khwamuboolela mbu Khuli abandu abatoto; shikhuli abaluuri ta. 32Khuli abasiani ekhumi nababili bomundu mulala; mulala shialiho ta, ne omushe ali halala nende seefwe leelo mushialo shiaKanaani. 33Omundu oyo, omwami weshibala, nakhusunjila mbu Khwikhuwa lino kho nemumanyilekhwo, nimuba nimuli abandu abatoto; mbu muleshe omwana weenywe mulala ewanje yino, muyile imele khulwa obutakha bwomumataala keenywe, mutsie butsia; 34mundeerele omwana weenywe omushe; kho ndalamanya mbu shimuli abaluuri ta, ne mbu muli abandu abatoto; mana ndalamuheelesia omwana weenywe, neenyu mulakholanga obukhala mushialo.
35Kho olwa batsukha ebiali mumakunia kabwe, lola, liboho liabuli mundu liamapeesake liali mwikunialie; mana olwa balola, halala nende saabwe, amaboho kamapeesa kabwe, baria. 36Mana Yakobo saabwe nabasunjila ari Khulweenywe efwilwa abaana banje; Yusufu shialiho ta, khandi Simeoni shialiho ta; khandi mwenya okhuyila Benyamini yesi; amakhuwa kano kosi kanziiranga obubii. 37Reubeni namuboolela samwana ari Onyala okhwira abaana banje babili, nimba nindamukalusia khwiwe ta; omuhaane mumukhono kwanje, nasi ndilimukalusia khwiwe. 38Naye naboola mbu Omwana wanje shialakholomokha nineenywe tawe; okhuba omwana wabwe yafwa, ne niye yenyene owatong'a; naba nanyoola amabii khuiljila eya mutsiilakhwo, kho mwakheesia tsimbutsi tsianje eMakombe namasila.
Currently Selected:
Genesis 42: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
