Genesis 40
40
Yusufu yabuula ebisina biamalooro kababohe
1Mana olunyumakhwo omukaami weshiokhunywa womuruchi waMisiri nende omuteeshi wemikaatechie bamwonoonela omwami wabwe omuruchi waMisiri. 2Naye Farao yabatiililwa oburima abakali abo babili, mbu omukhulundu wabanyweesii nende omukhulundu wabateeshi. 3Nabara mundindi munzu yomwimilisi wabasikari, mumbohe habundu tsana ewa Yusufu yabohwa. 4Omwimilisi wabasikari namuheelesia Yusufu obulindi khubo, naye nabakhalabanila; nabo nibeekhalayo eshise mundindi. 5Mana bombi nibaloora amalooro, shia omundu liloorolie, mushilo shilala shieneshio, shia omundu nende eshisina shieliloorolie, omunyweesii oyo nende omuteeshi wemikaate womuruchi waMisiri, abali nibabohwa mumbohe. 6Kho mutsuli Yusufu niyeenjila ewa bali, nabalola nibahendanga. 7Nabareeba abakali baFarao aba yali ninabo mundindi munzu yomwamiwe, nasunga ari Mukhabeele murie leelo, abakhuuniye mumoni? 8Nibamusunjila mbu Khuloorile amalooro, ne shialiho ounyala okhukhubuulila eshisina ta. Yusufu nabasunjila ari Ne okhubuula khwosi shikhuli khwaNyasaye? Nimuchama, mumboolele. 9Omunyweesii omukhulundu namutoonyela Yusufu akeliloorolie, namusunjila mbu Mwilooro lianje, lola, omutsabibu kubeele imbeli wanje; 10ne khumutsabibu okwo kubeele nende amasaka kataru; nikukhola shinga okukanikha, ebimuli nibimulikha; mana nikwama ebiamo ebiengu, ebibumbaane khumasaka; 11ne eshikombe shiaFarao shibeele nishili mumukhono kwanje; nimbukula tsinzabibu, nindiinyila mushileombe shiaFarao, nimukaamila Farao eshikombe mumukhonokwe. 12Yusufu namusunjila ari Shino nishio eshisina shialio; mbu amasaka ako kataru netsindaalo tsitaru; 13inyuma wetsindaalo tsitaru, Farao yakhakhuchinguule omurwekwo, nakhukalusia mumilimochio; neshikombe shiaFarao nomuheelesie mumukhonokwe shinga olwa wakholanga olwambeli olwa walinji omunyweesiiwe. 14Ne unzitsulile isie olwa nobe nonyoolile amalayi, niukholela akeshisa, ekhusaaya; urumbule ewaFarao urusie munzu muno; 15okhuba toto mwene, ndeebwa okhurula mushialo shiabaHeburania; kata nende hano shindakholakhwo likhuwa liosi eliakhachila nibara mumbohe yobwina tawe.
16Olwa omuteeshi wemikaate omukhulundu yalola mbu obubuuli obwo bwali obulayi, namusunjila Yusufu mbu Nasi mwilooro lianje, lola, embeele nebitelu bitaru biemikaate emilafu khumurwe kwanje; 17ne khushitelu shiahekulu bibeelekhwo ebiliibwa biaFarao bietsimbia tsiosi, emilimo chiomuteeshi wemikaate; ne amanyonyi nikabilia khushitelu khumurwe kwanje. 18Yusufu namukalusia naboola mbu Shino nishio eshisina shialio; mbu ebitelu ebio bitaru netsindaalo tsitaru; 19inyuma wetsindaalo tsitaru Farao yakhachinguule omurwekwo nakurusia khwiwe, ne yakhakhuhanishe khumusaala; amanyonyi nako kakhalie inyamayo khumubilikwo.
20Nikaba mbu khunyanga yakhataru, niyo inyanga yaFarao yokhwitsulila okhwibulwakhwe, yateeshela abakholibe bosi lisabo; nachinguula omurwe kwomunyweesii omukhulundu khandi nende omurwe kwomukhulundu wabateeshi bemikaate hakari wabakholibe. 21Namukalusia omunyweesii omukhulundu mumilimochie chiobunyweesii khandi; naye namukaamila Farao eshikombe mumukhonokwe. 22Ne omuteeshi wemikaate omukhulundu namuhanikha, shinga Yusufu olwa yali nababuuliile. 23Habula omunyweesii oyo omukhulundu shiyamwitsulila Yusufu ta; yamwibilila butswa.
Currently Selected:
Genesis 40: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
