Genesis 39
39
Yusufu nende mukha Potifa
1Ne Yusufu yali niyayilwa eMisiri; mana Potifa, omukali waFarao, omwimilisi wabasikari, nomuMisiri, yali niyamukula mumukhono kwabo abaIshimaeli abali nibamuleerayo. 2Ne OMWAMI yali nende Yusufu halala, amakhuwake kosi nikakaasa; mana naba munzu yomwamiwe omuMisiri oyo. 3Omwamiwe naye nalola mbu OMWAMI ali halala ninaye, khandi shinga OMWAMI olwa atsitsachisia kosi aka yakholanga. 4Yusufu nakoosibwa mumonimwe, namukhalabanila; naye namukhola okhuba omusinjilili wemilimo munzuye; ne buli shiosi eshia yali ninashio, nashira mumukhonokwe. 5Nikaba mbu okhurula olwa yamukhola okhuba omusinjilili weinzuye, nende khubiosi ebia yali ninabio, OMWAMI nachiheelesia inzu yomuMisiri oyo ikhabi khulwa Yusufu; ikhabi yOMWAMI niyiba khubiosi ebia yali ninabio, munzu nende mumikunda. 6Nabilekha biosi ebia yali ninabio mumukhono kwaYusufu; ne khulwako, shiyateebakhwo likhuwa khubia yali ninabio ta, habula ebiliibwa ebia yaliitsanga bionyene.
Naye Yusufu yali owelikondo lilayi, niyakaasa muno. 7Ne inyuma wamakhuwa ako, omukhasi womwamiwe yamurakhwo Yusufu imoni, namuboolela mbu Khukone ninawe. 8Naye naloba, nasunjila omukhasi womwamiwe mbu Lola, omwami wanje shiamanyanga eshia endi ninashio munzu ta, khandi wara mumukhono kwanje biosi ebia ali ninabio; 9kata ye omwene shiyashila obukhulundu munzu muno; shiyanzikaliile eshindu shiosi shiosi ta, habula iwe wenyene, shichila oli omukhasiwe; nasi ndakhanyala endie okhukhola obumayaanu buno, nimwonoonela Nyasaye? 10Ne kata olwa yasunjilanga Yusufu buli nyanga buli nyanga, ye shiyamufuchiilila mbu akone ninaye kata okhubuutsa ninaye tawe. 11Habula inyanga yindi niyeenjila munzu okhukhola emilimochie, ne shiyalimwo omusaatsa undi yesi khubandu abomunzu omwo tawe. 12Naye natiila inguboye, nasunga mbu Khukone ninawe; naye nalekha inguboye mumukhonokwe, niyeelukha narula elwanyi. 13Ne olwa omukhasi yalola shinga olwa amulesheele inguboye mumukhonokwe niyeeluushe, 14kho nalanga abandu abomunzuye, nababoolela mbu Lole, yakhuleereele omuHeburania okhukhufwola; yanzitsiile bulaano mbu akone ninasi, nasi nikhupa tsimbungu. 15Mana olwa ahuliile ninjinga olukhu nikhupa tsimbungu, kho aleshile inguboye aha embeele, niyeelukha narula elwanyi. 16Kho nabiikha inguboye aha yali okhuula olwa omwamiwe yachelela hango. 17Namusunjila amakhuwa ako mbu Omukholi oyo omuHeburania owa wakhuleereele yanzitsiile okhu'fwola; 18ne olwa enjinjile olukhu nikhupa tsimbungu, kho nalekha inguboye aha embeele, niyeelukha narula elwanyi.
19Nikaba mbu olwa omwamiwe yahulila amakhuwa aka omukhasiwe yamuboolela, ari Nolwa omukholiwo yakholeele; kho yatiilwa oburima. 20Mana omwamiwe yamubukula Yusufu namura mumbohe, habundu ewa ababohe bomuruchi babohungwa; nabayo mumbohe. 21Ne OMWAMI naba halala nende Yusufu, namukholela akobuheeli oburalilu, nachila nakoosibwa mumoni tsiomulindi weimbohe. 22Omulindi weimbohe naye nara ababohe bosi abali mumbohe mumukhono kwaYusufu; kata kosi akeekholangamwo, niye owakakholanga. 23Omulindi weimbohe narahenga eshindu shiosi eshiali mumukhono kwaYusufu ta, shichila OMWAMI yali ninaye; ne aka yakhola, OMWAMI yakatsitsachisia bulayi.
Currently Selected:
Genesis 39: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
