Genesis 38

Yuda naTamari

1Nikaba mbu mundaalo etsio Yuda yakholomokha narula ewa abaana babwe bali, nakotola niyeenjila ewomuAdulami undi oweliiralie niye Hira. 2Yuda nalolayo omukhaana womuKanaani undi oweliiralie niye Shua; namuleera, namuteeshia. 3Naye yahela inda niyeebula omwana omusiani; namukulikha eliira mbu Eri. 4Khandi nahela inda niyeebula omwana omusiani; namukulikha eliira mbu Onani. 5Khandi nameeta niyeebula omwana omusiani, namukulikha eliira mbn Shela; naye Yuda yali nali eKhezibu olwa yamwibula. 6Mana Yuda yamukhweesia Eri omwanawe owambeli omukhasi, neliiralie liali mbu Tamari. 7Naye Eri, omwana wambeli waYuda, yali omumayaanu imbeli w; OMWAMI namwira. 8Mana Yuda namusunjila Onani mbu Winjile ewomukhasi womwana weenywe, omukalusie nomubuusilia omwana weenywe omurwe. 9Naye Onani yamanya mbu olwibulo olwo shilwakhaba olulwe ta; kho olwa yeenjila ewomukhasi womusiani wabwe, yatsukha butswa hasi, aleshe okhubuusilia omwana wabwe olwibulo. 10Nelikhuwa elo elia yakhola niliba libii imbeli w; namwira ye yesi. 11Mana Yuda yasunjila Tamari nyakhufialanyene mbu Omenye munzu yeenywe noli omulekhwa okhuula olwa Shela omwana wanje aliba nakhulile; shichila yasunga mbu Aleshe okhufwa shinga abaana babwe. Naye Tamari natsia ewabwe namenyayo.

12Olunyumakhwo omukhaana waShua, niye mukha Yuda, yafwa; nolwa amasika keeya, Yuda natsia ewa abandube bali nibatetanga amakondike obwoya eTimina, ye nende omwitsawe Hira omuAdulami. 13Tamari naye yaboolelwa ari Lola, nyakhufialawo atikulukha okhutsia eTimina okhuteta amakondike obwoya. 14Kho niyeefwalula ebiifwalobie biobulekhwa, niyeefuubila olububi niyeefuunikha, niyeekhala mushilibwa shieEnaimu, khunjila eyitsia eTimina; okhuba yalola mbu Shela noumalile okhukhula, naye narakalusibungwa ninaye ta. 15Olwa Yuda yamulola yakaala mbu nomukhasi omutamba; okhuba yali niyeefuuniishe mumoni. 16Niyeekwenya khunjila, natsia ewa yali khundulo, namuboolela mbu Chama enzinjile ewuwo; okhuba shiyamanya mbu ninyakhufialanyene ta. Naye nasunga mbu Naumbe shiina niwinjila ewanje? 17Naye ari Ndalakhukoobela eshimeeme shiomumbusi tsianje. Nabureeba ari Ne olamba omusingo okhuula olwa naungoobele noho? 18Naye naboola mbu Nomusingo shiina okwa nekhuhe? Naye ari Ingakayo yeshibalikho nende olutsaha lwayo, nende indabushi eyili mumukhonokwo. Naye namuheelesia, niyeenjila ewuwe; mana nahela inda khululwe. 19Kho narula, niyeenyokha, niyeefwalula olububi olwa yali ninalwo, niyeefwala khandi ebiifwalo biobulekhwabwe.

20Mana Yuda yakooba eshimeeme shiomumbusi mumukhono kwomwitsawe omuAdalamu, atsie anunule omusingo okwa yalekhayo mumukhono kwomukhasi oyo; naye naramunyoola ta. 21Kho nareebelesia mubandu bahabundu tsana, ari Ali heena omutamba mwenoyo owali eEnaimu, khundulo weinjila? Nabo bari Shiabeetsangaho omutamba yesi ta. 22Naye nakalukha ewaYuda, naboola mbu Shimunyoolile ta; kata abandu bahabwene yaho bakaana mbu shiabeetsangaho omutamba yesi ta. 23Yuda naboola ari Lekha abe ninabio, khuleshe okhufwimbwa emirwe; lola, eshimeeme shino emuyiliile, ne shiomunyoolile ta.

24Mana olunyuma wemiesi shinga chitaru, Yuda yaboolelwa mbu Tamari nyakhufialawo yakholile obutamba; khandi lola, ali inda yobuheyi. Yuda nasunga mbu Mumurusie ebulafu, asambwe. 25Olwa yarusibwa yamuupila nyakhufialanyene omunwa, nasunga ari Omundu omwene bindu bino niye owambesia inda; khandi ari Ekhusaaya mbu yahukhasia omwene bindu bino, mbu ingaka yeshibalikho, nende olutsaha, nende indabushi. 26Yuda niyeeyama mbu nebibie, naboola mbu Nomulunji okhushila isie; okhuba shindamuheelesia Shela omwana wanje ta. Naraba ninaye khandi ta.

27Ne mushise olwa yalumwa okhwibula, lola, amakhwana kali mundaye. 28Ne olwa yalumwa, omwana mulala yarusia omukhono; mana omwibusia nabukula oluusi oluranzayi naluboha khumukhonokwe, nasunga mbu Uno niye ouranjiliile okhurula. 29Habula olwa yakalusia omukhonokwe, ne omwana wabwe narula. Mana nasunga mbu Kho wiyikuliile eshibanga! Ne khulwa ako yakulikhwa eliira mbu Faresi. 30Nolunyumakhwo omwana wabwe narula, owali nende oluusi oluranzayi khumukhonokwe; naye nakulikhwa eliira mbu Zera.

Currently Selected:

Genesis 38: OUV

Highlight

Copy