Genesis 37

Yusufu nende abaana babwe

1Ne Yakobo namenya mushibala eshia samwana yalimwo omucheni, mushibala shiaKanaani. 2Tsino nitsio tsinzibulo tsiaYakobo. Yusufu, olwa yali owemiyika ekhumi namusaafu, yali niyaayanga ebiayo halala nende abaann babwe; nali omuyia, halala nende abaana baBiliha nende abaana baZilipa, abakhasi basamwana; naye Yusufu namuleerela saabwe amakhuwa kabwe amabii. 3Ne Isiraeli yamuheela Yusufu okhushila abaanabe bosi, shichila niye owali omwana wobukofubwe; namunabila ikanzu yamakhono amarambi. 4Mana abaana babwe nibalola shinga olwa saabwe yamuheela okhushila abaana babwe bosi, nibamukiya, kata nibaranyala okhusungana ninaye nomulembe tawe.

5Ne Yusufu naloora lilooro, naboolela abaana babwe amakhuwa kalio; nabo nibameeta butswa okhumukiya. 6Nababoolela mbu Chame muhulilekhwo lilooro lino elia endoorile; 7mbu lole, ifwe khubeele nikhubohanga ebinywa mumukunda; ne eshinywa shianje nishibuukha, nishisinjila; khandi lole, ebinywa bieenywe nabio nibibotokhanaho nibiinamila eshinywa shianje. 8Abaana babwe nibamusunjila bari Niwe owitsa okhukhuruka ifwe noho? Kata niwe owitsa okhwamiha khwifwe? Nibameeta butswa okhumukiya khulwa amalooroke, khandi khulwa amakhuwake. 9Khandi naloora lilooro lindi khandi, naboole a abaana babwe khulio, ari Lole, endoorile lilooro khandi; mbu eliuba nende omwesi nende tsinyininyini ekhumi nandala binyinamiile. 10Nababoolela samwana nende abaana babwe; samwana namuhalabila, namusunjila mbu Nelilooro shiina lino elia oloorile? Mbu isie nende mawo nende abaana beenywe khuliitsa toto nikhwinama hasi imbeli wuwo? 11Abaana babwe nibamufwimbila; ne samwana nabiikha likhuwa elo mumwoyokwe.

Yusufu yakusibwa eMisiri

12Abaana babwe nibatsia okhwaya ebiayo biasaabwe eShekhemu. 13Isiraeli namusunjila Yusufu mbu Abaana beenywe shibaayanga ebiayo eShekhemu? Yitsa ekhurume ewa bali. Naye nafuchila ari Endiho. 14Namuboolela mbu Tsia bulaano obalole abaana beenywe nibaba nibali abalamu, nende ebiayo nibiba nibili habwene; ungalusilie amakhuwa. Kho namuruma okhurula ewa bali mwibanda liaHeberoni, natsia niyoola eShekhemu. 15Ne omundu undi namunyoola natiimatiimanga mubwayilo; omundu oyo namureeba ari Okhaabanga shi? 16Naye ari Ekhaabanga abaana beefwe; nochama unzibaalile ewa baayanga. 17Omundu oyo nasunga mbu Bakharula hano; okhuba embuliile nibaboola mbu Chende khutsie eDotsani. Kho Yusufu nabalondachilila abaana babwe, nabanyoola eDotsani. 18Nabo nibamulola nashili ehale; ne olwa yali nashili okhuula ewa bali, bakhobana mbu bamwire. 19Nibasungana abeene nabeene bari Lole, omwene malooro ngwoyo, yeetsanga. 20Kho chende khumwire, mana khumusukune mwiyabo lindi khukano, mana nakhuboole mbu isolo yimuliile; mana khwakhalole amalooroke shinga olwa kakhabe.

21Naye Reubeni nahulila, namuhonia mumikhono chiabwe; naboola mbu Khuleshe okhumwira. 22Reubeni nababoolela mbu Muramuraatsia amatsayi ta; mumusukune mwiyabo lino eliliho mushitsiimi, ne muramutiilakhwo ta. Okhuba yeenya okhumuhonia mumikhono chiabwe mbu amukalusilie samwana. 23Kho olwa Yusufu yoola ewa abaana babwe bali, bamufwalula ikanzuye yamakhono amarambi eya yali niyeefwalile; 24nibamuyila nibamusukuna mwiyabo; ne liyabo elo liali likhaya, amatsi nikabulamwo.

25Nibeekhala okhulia ebiliibwa; nibachinguula tsimoni nibahenga, ne lola, omukanda kwabachendi abaIshimaeli ngwokwo, nibarula eGileadi, nibachinjiile khungamia tsiabwe obubaane nende indesi yeshiuya eshilayi nende manemane, nibali khuluchendo nibabiyila eMisiri. 26Mana Yuda nasunjila abaana babwe ari Kakhukaasila shiina okhumwira omwana weefwe nende okhubisa amabangake? 27Chende khumukusie mubaIshimaeli bano, emikhono chieefwe chileshe okhuba khuye; okhuba ye nomwana weefwe, nowamabanga keefwe. Abaana babwe nibafuchiilila bario. 28Mana abahooni abaMidiani nibabiraho; nibakhwesa Yusufu nibamurusia mwiyabo, nibakusia Yusufu khubaIshimaeli tsifeetsa amakhumi kabili. Nabo nibamuyila Yusufu eMisiri.

29Naye Reubeni nakalukhaho khwiyabo liatsana; khane Yusufu nabulamwo mwiyabo elo; mana narandula tsingubotsie. 30Nakalukhayo ewa abaana babwe bali, naboola mbu Omwana shialimwo tawe; nasi, nenzie heena? 31Nibabukula ikanzu yaYusufu, nibeera imbusi ikhole, nibachiina ikanzu mumalasile; 32nibatsia nende ikanzu eyo yatnakhono amarambi, nibamumanyia saabwe; nibasunga bari Khunyoolile yino; kho yahukhasia niyiba niyili ikanzu yomwanawo nohomba. 33Naye nachimanya, naboola mbu Yino niyo ikanzu yomwana wanje; toto isolo yimuliile; nitieri, Yusufu amalile okhutonyolwa ebitonye. 34Yakobo narandula tsingubotsie, niyeeboha ebiifwalo biamakunia mushishienje, namwikhuula omwanawe tsindaalo tsinyinji. 35Nabaanabe abasiani bosi, nende abaanabe abakhaana bosi. Nibeetsa okhumulemia omwoyo; naye nakhaya okhulemibwa omwoyo; naboola mbu Tawe, shichila ndalamwishila omwana wanje eMakombe nishimwikhuula. Samwana namulilila amasika. 36Ne abaMidiani nibamukusia eMisiri, khuPotifa, owali omukali waFarao, nomwimilisi wabasikari.

Currently Selected:

Genesis 37: OUV

Highlight

Copy