Genesis 32

Yakobo niyeerechekha okhubukaana nende Esau

1Yakobo naye natsiililila muluchendolwe, abamalaika baNyasaye nibamubukaanila. 2Ne Yakobo olwa yabalola, naboola mbu Lino nelihe liaNyasaye; nakulikha habundu tsana eliira mbu Mahanaimu.

3Yakobo naruma abarume bamuranjilile, mbu batsie ewaEsau omwana wabwe, mushibala shiaSeiri, mumbali tsiaEdomu. 4Nabalaka nasunga ari Nilwo olwa namuboolele omwami wanje Esau; mbu Omukholiwo Yakobo aboola mbu Ndamenyangayo ewaLabani, nishindayo okhuula bulaano; 5ne endi nende tsing'ombe, nende tsisishili, nende ebiayo, nende abakholi abeshisaatsn nende abeshikhasi; ne erumile abandu okhumumanyia omwami wanje, mbu mana engoosibwe imbeliwo.

6Kho abarume abo nibamukalushila Yakobo nibasunga mbu Khuulile ewomwana weenywe Esau, naye yeetsa okhukhubukaanila; ne ali nende abandu ebikhumi bine. 7Mana Yakobo naria, nabeeyabeeya muno; kho nakabula abandu aba yali ninnbo, nende ebiayo, nende tsing'ombe, nende tsingamia, emikanda chibili; 8naboola ari Esau naba niyoola khumukanda kwambeli nakukhupa, omukanda okusikala nakwihonokoshe.

9Yakobo naboola mbu Ee Nyasaye wakuuka Aburahamu, Nyasaye wapapa Isaka, OMWAMI ovasunjila mbu Kalukha mushibalashio, nende mubaluyiabo, nasi ndilikhukholela obulayi; 10isie shingwaniile obuheelibwo oburalilu kata hatuutu ta, kata obwatotobwo bwosi, ebia wakholela isie omusumbawo; okhuba ndaambukha Yorodani kuno nindi nende indabushi yanje yonyene; ne bulaano engwile emikanda chibili. 11Umbabine mumukhono kwomwana weefwe, mbu mumukhono kwaEsau; okhuba emuriile, mbu fwana yakheetsa wa'khupa, nende nyina halala nende abaana. 12Nawe waboola mbu Okhukhola ndilikhukholela obulayi, nikhola olwibulolwo lube shinga omuyeshe kweinyanza, okurabalikhakhwo tawe khulwa obunji bwakwo.

13Nakonaho eshilo shieneshio; kho nabukula khubia yali ninabio, bibe eshihaanwa shiaEsau omwana wabwe; 14mbiebino, mbu tsimbusi tsinyafusi ebikhumi bibili nende tsikhole amakhumi kabili, amakondi amanyafusi ebikhumi bibili nende amamiiku amakhumi kabili, 15tsingamia etsiali nitsinuunia halala nende abaana batsio amakhumi kataru, tsing'ombe tsitwasi amakhumi kane nende tsisurusi ekhumi, tsisishili tsikhasi amakhumi kabili nende ebimoosi biatsio ekhumi. 16Nabihaana mumikhono chiabasumbabe, shia lituuli khubwalio; nasunjila abasumbabe ari Muranjilile okhwambukha, ne muleshenje olwanga hakari welituuli nende lituuli lindi. 17Nalaka owaranjilila ari Olwa namubukaane nende Esau omwana weefwe, nakhureeba mbu Oli owawina? Ne otsia heena? Khandi nebiawina ebia wimisiye bino? 18Kho osunje mbu Nebiomusumbawo Yakobo; neshihaanwa eshirumiilwe omwami wanje Esau; naye ngwoyo, ali munyuma weefwe. 19Khandi nalaka ario owokhubili nende owokhutaru, bosi abalondanga amatuuli, ari Nolwa namumuboolele Esau, nimumunyoola. 20Khandi mulamusunjila muri Omusumbawo Yakobo ngwoyo, ali munyuma weefwe. Okhuba yasunga mbu Ndalamukwisia omwoyo khulwa eshihaanwa eshiranjiliile imbeli wanje, mana olunyumakhwo ndalamulola mumoni; haundi nayafuchiilile. 21Kho eshihaanwa eshio nishiranjilila okhwambukha; naye omwene nakona eshilo shieneshio mumukanda okwo.

Yakobo yalwanilwa ePenieli

22Mana nabuukha eshilo shieneshio, nabukula abakhasibe babili, nende abakholibe abakhasi babili, nende abaanabe ekhumi namulala, niyaambukha mwifubukho lieYaboku. 23Nababukula nabaambusia injelekha womuchela, niyaambusia nende biosi ebia yali ninabio. 24Mana Yakobo natong'a yenyene; ne yaliho omusaatsa undi owamulwania okhuula olwa bwashia. 25Nolwa yalola shinga olwa aramunyala ta, namutiilakhwo lifwonelo lieikhukunyu; mana lifwonelo lieikhukunyu yaYakobo niliibalalila, olwa yali nalwananga ninaye. 26Nasunga mbu Ndekhuula enzie, okhuba eshibala bwakhachaaka okhushia. Yakobo nasunga mbu Shikhulekhuula ta, habula niumbeele ikhabi. 27Naye namureeba ari Eliiralio niwe wina? Naye ari Nisie Yakobo. 28Naye naboola mbu Eliiralio shiolalangungwa mbu Yakobo khandi ta, habula Isiraeli; shichila olwanile nende Nyasaye khandi nende abandu, nohula. 29Mana Yakobo namureeba ari Chama umboolele eliiralio. Naye nasunga mbu Ne nishiina eshichila niureeba eliira lianje? Namuheelesia ikhabi habwenaho. 30Yakobo nakulikha habundu tsana eliira mbu Penieli; okhuba yaboola mbu Emuluutsi Nyasaye mumoni nomumoni, khandi ndihonokooshe. 31Eliuba nilifwinda nilibala khuye niyaambukhanga ePenueli, natiechela ikhukunyu. 32Niko akachila abaana baIsiraeli shibaliitsanga omusi kweibaatswa okuli khwifwonelo lieikhukunyu kata okhuula bulaano ta; okhuba yatiila khwifwonelo lieikhukunyu yaYakobo khumusi kweibaatswa.

Currently Selected:

Genesis 32: OUV

Highlight

Copy