Genesis 33

Yakobo naEsau basaasanibwa

1Mana Yakobo nachinguula tsimoni nahenga, ne ngwoyo, Esau niyeetsa, nende abandu ebikhumi bine halala ninaye. Nakabula abaana khuLea, nende khuRaheli, nende khubakholi abakhasi abo babili. 2Kho niyeemisia abakholi abakhasi nende abaana babwe, Lea nende abaanabe nibarakhwo, nabo Raheli nende Yusufu nibamaliilikha. 3Naye omwene nababira, naba imbeli, niyeenama hasi okhuula musaafu, okhuula olwa yasita ahambi khumusiani wabwe.

4Esau niyeelukha okhumubukaanila, namufumbeelela, nakwa mwikosilie, namutsunzuuna; nibalila amasika. 5Nachinguula tsimoni nalola abakhasi nende abaana; nareeba mbu Nibeena bano aba oli ninabo? Naye nakalusia mbu Nibo abaana aba Nyasaye yambeelesia isie omusumbawo khulwa obukoosiabwe. 6Mana abakholi abakhasi abo niboolaho halala nende abaana babwe, nabo nibeenama. 7NaLea yesi niyoola nende abaanabe, nabo nibeenama. Ne olunyumakhwo Yusufu niyoola, nende Raheli, khandi nabo nibeenama. 8Naye nareeba ari Omukanda okwo kwosi okwa enzakaanile ninakwo nokwa shiina? Naye ari Mbu engoosibwe imbeli womwami wanje. 9Esau nakalusia ari Ebia endi ninabio bianlbela; mwana weefwe, ebio ebia oli ninabio bibe ebibio. 10Yakobo naboola mbu Tawe; ne nimba nimalile okhunyoola obukoosia imbeliwo, chama obukule eshihaanwa shianje shiamakhono kanje; olwa endolaane ninawe mumoni, shinga oulolana nende Nyasaye mumoni, nawe niunjama. 11Kho ekhusaaya obukule omuruulul kwanje okukhuleereelwe; okhuba Nyasaye yangoosiye obukoosiabwe, khandi okhuba ebia endi ninabio bimbelile. Kho namunichilisia, naye nabukula.

12Esau nasunga mbu Chenda khuchaache oluchendo khutsie, nasi ndalakhwimilila imbeli. 13Naye Yakebo namuboolela ari Omwami wanje, omanyile shinga abaana olwa bali abatoro, khandi mbu ebiayo nende tsing'ombe ebia endi ninabio binuuninjia; nibabitetekhasia okhuchenda kata inyanga ndala, ebiayo biosi biakhafwa. 14Nobulayi omwami wanje yeemile imbeli wanje, isie omusumbawo; nasi ndalabiimisia kahala, shinga injenda yemiruko echili imbeli wanje olwa yili, nende injenda yabaana, okhuula olwa enzula ewuwo, omwami wanje, eSeiri.

15Esau naboola mbu Kho bulaano ekhuleshele abokhubandu bano aba endi ninabo. Naye nakalusia ari Bakhole shiina? Enyoole butswa obukoosia imbeli womwami wanje. 16Kho Esau nafunya inyanga eyo nakalukha eSeiri. 17Mana Yakobo natsiililila okhuula eSukotsi, niyeeyumbashilayo inzu, nakhola ebisaakati biemirukochie; niyeshichila eliira liahabundu tsana lialangwa mbu Sukotsi.

18Yakobo niyoola khwitaala liaShekhemu nomulembe, mbu mushibala shiaKanaani, olwa yarula ePadanaramu; nakhoma amaheemake imbeli welitaala elo. 19Nakula eshianyi shiatsana eshia yali nakhomeelekhwo liheemalie, mumukhono kwabaana baHamori, samwana Shekhemu, ebitonye bieifeetsa eshikhumi. 20Nasinjisiayo eshimalilo shiemisango nashikulikha mbu Eli-elohe-Isiraeli.

Currently Selected:

Genesis 33: OUV

Highlight

Copy