Genesis 31
31
Yakobo yeelukha Labani
1Ne Yakobo yahulila amakhuwa kabaana baLabani, nibaboola mbu Yakobo yabukuule biosi ebiali biaseefwe; ne khubialinji biaseefwe yeenyooleele oluyali luno lwosi. 2Yakobo nalola tsimoni tsiaLabani, nitsiramuhenga shinga khale ta. 3OMWAMI naboolela Yakobo mbu Kalukha otsie mushialo shiabakuukabo, nende mubaluyiabo; nasi ndalabeetsanga ninawe halala. 4Yakobo narumana nalanga Raheli nende Lea beetse mubwayilo, mubiayobie, 5nababoolela ari Isie enduutsi tsimoni tsiaseenywe, mbu shitsinenganga shinga olwa khale ta; ne Nyasaye wapapa yabeelenje ninasi halala. 6Inywe mumanyile shinga olwa ndamukholeele seenywe nende amaani kanje kosi. 7Ne seenywe yayangaatiyenje, nakalukhasia omurungo kwanje kata okhuula ekhumi; ne Nyasaye shiyamufuchiilila mbu yakholele obubii ta. 8Olwa yasunga ari Ebiamapalapala bilaba omurungokwo; kho mana ebiayo biosi nibiibula ebiamapalapala; khandi olwa yasunga mbu Ebianyakasanga bilaba omurungokwo; kho mana ebiayo biosi nibiibula ebianyakasanga. 9Nindio Nyasaye yamurusiyekhwo seenywe emianduchie niyambeelesia isie. 10Nikaba mbu mundaalo etsia ebiayo bieelukhanga, ndachinguula tsimoni tsianje nindola mwilooro mbu tsikhole etsieelusinjia ebiayo tsiali tsianyakasanga, nende etsiamapalapala, nende etsiamakondokondo. 11Malaika waNyasaye niyamboolela mwilooro elo mbu Yakobo; nasi ndi Endiho. 12Naboola ari Chinguula tsimonitsio, olole, tsikhole tsiosi etsiilusinjia ebiayo netsianyakasanga, nende etsiamapalapala, nende etsiama; kondokondo; okhuba enduutsi kosi aka Labani akhukholelanga. 13Isie nisie Nyasaye weBeteli, aha wabashila amafura khwichina lieisiilo isongokhu, aha wanditsubila eshiitsubo; kho bulaano buukha, orule mushibala shino, okalushile eshibala eshia weebulilwamwo. 14Raheli nende Lea nibakalusia nibamusunjila bari Kushitong'aho omukabo kundi kata obulaame bwosi khwifwe munzu yaseefwe noho? 15Shiakhupaarangakhwo shinga abacheni butswa? Okhuba yakhukusia obukusi, nalia obukusi obwa yanyoola khwifwe. 16Okhuba emiandu chiosi echia Nyasaye yarusiyekhwo seefwe, nichio echieefwe nende echiabaana beefwe aba khwibulanga; kho bulaano liosi liosi elia Nyasaye yakhubooleele, olikhole.
17Mana Yakobo nabuukha, naniinia abaanabe nende abakhasibe khungamia; 18nabukula emirukochie chiosi, nende emianduchie chiosi echia yali niyakhung'aasiye, nichio emiruko echia yanyoola niyakhung'aasia ePadanaramu, mbu akalushile Isaka samwana mushibala shiaKanaani. 19Ne Labani yali natsiile okhuteta amakondike obwoya; ne Raheli yeeba emiterafi chiasamwana. 20Kho Yakobo yeeyiba narulayo Labani omuSiria naramanya ta, okhuba shiyamuboolelakhwo shinga olwa yeelukha tawe. 21Kho niyeelukha nende biosi ebia yali ninabio; narula, niyaambukha Omuchela okwo, nachoomia tsimonitsie khushialo shiebikulu shiaGileadi.
Labaniyamulondachilila Yakobo
22Ne Labani yaboolelwa khunyanga yakhataru, mbu Yakobo yayeeluushe. 23Naye nabukula abasiani babwe halala ninaye, namulondachilila oluchendo lwetsindaalo musaafu; mana namuhambila mushialo shiebikulu shiaGileadi. 24Ne Nyasaye niyeetsela Labani omuSiria mumalooro akomushilo, namuboolela ari Wiyile kahala, mbu oleshe okhuboolana nende Yakobo amalayi kata amabii tawe.
25Kho Labani namunyoola Yakobo. Ne Yakobo yali nakhomile liheemalie mushialo shiebikulu; naye Labani nende abasiani babwe nibakhoma akabwe mushikulu shiaGileadi. 26Labani namuboolela Yakobo ari Okholile orie, niwiyiba norula nindamanyile ta, noyila abaana banje abakhaana shinga abahambilwe nolukanga? 27Mbushiina niwilukha masilisi, niwiyiba niurulakhwo, noramboolelakhwo tawe? Khane khwakhaseebulaane nende okhutsatsahala nende tsinyimbo, nende tsisukuti nende litungu; 28kata norambeelesiakhwo obwiyangu okhutsunzuuna abaana banje abasiani nende abakhaana ta; ne bulaano okholile akobusilu. 29Obunyali buli mumukhono kwanje okhukhukholela obubii; habula Nyasaye waso yasungaane ninasi eshiabeele mushilo, nasunga mbu Wiyile kahala, mbu oleshe okhuboolana nende Yakobo amalayi kata amabii tawe. 30Kho bulaano, kata niwenya okhutsia, shichila amahoofu kakhuliitsanga eweenywe, ne wibile abanyasaye banje mbushiina? 31Yakobo nakalusia naboolela Labani ari Shichila ndaria; nimboola mbu wakhanuula abakhaanabo nende amaani. 32Ne omundu yesi owa nonyoole nali nende abanyasayebo shialahona ta; imbeli wabaana beefwe, yahula eshili eshishio ewanje, oshibukule. Okhuba Yakobo shiyamanya mbu Raheli yali nabeebile tawe.
33Labani niyeenjila mwiheema liaYakobo nende mwiheema liaLea, nende mwiheema liabakholi abeshikhasi babili abo; ne shiyachinyoola tawe. Narula mwiheema liaLea, niyeenjila mwiheema liaRaheli. 34Ne Raheli yali nabukuule emiterafi echio, nachira mumiito chieingamia, mma niyeekhalakhwo. Labani nakhaaba, nakanza hosi hosi mwiheema, narachinyoola ta. 35Raheli namusunjila samwana ari Omwami wanje aleshe okhusinyikha olwa ekhayilwe okhusinjila imbeliwo, okhuba eshiima shiabakhasi shili ninasi. Nakhaaba, naranyoola emiterafi ta.
36Mana Yakobo natiilwa oburima nasoolana nende Labani, Yakobo nakalusia Labani, namureeba ari Obuyiiri bwanje buli heena? Eshionoono shianje nishiina eshichila niunondachilila nende obululu? 37Olwa okanzile mumiandu chianje chiosi, onyoolilemwo shiina khubindu ebiomunzuyo? Oshire hano imbeli wabaana beefwe nende abaana beenywe, bakabukhasie hakari weefwe babili. 38Bulaano nemiyika amakhumi kabili nimbeetsanga ninawe halala; amakondiko amanyafusi, nende tsimbusitsio tsinyafusi, shibiahuusakhwo ebimeeme, kata amamiikuko shindakaliakhwo ta. 39Eshiarandulungwa nende tsisoolo, shindakhuleerelanga ta; omwene ndakalusinjiaho eshianje; washienyanga mumukhono kwanje, kata nishieebungwa mushiteere, kata nishieebungwa mushilo. 40Nolwa ndalinji; mushiteere omubasu kwandiitsanga, nende mushilo obushindu; khandi ndafubanga tsindoolo pe. 41Emiyika chino amakhumi kabili ndabeelenje mwitaalalio; ndakhukholela emiyika ekhumi nachine khulwa abakhaanabo babili, nemiyika chisasaba khulwa ebiayobio; nawe wakalukhasia omurungo kwanje kata okhuula ekhumi. 42Alabula Nyasaye wapapa, Nyasaye waAburahamu, omuriibwa waIsaka, owalinji ninasi ta, khane bulaano wakhaseebuule amakhono amakhaya. Nyasaye yaluutsi okhusandibwa khwanje nende okhunyakhana khwemikhono chianje; mana akhuhalabiile mushilo eshibeele.
Indakano ya Yakobo naLabani
43Labani nakalusia Yakobo namusunjila mbu Abakhaana bano nabakhaana banje, abaana bano nabaana banje, khandi ebiayo bino nebiayo bianje; nebiosi ebia olola bino nebianje; nasi enyala okhubakholela shiina leelo abakhaana banje bano, kata abaana babwe aba bayeebuule? 44Kho bulaano chenda khukhole indakano, isie ninawe; nayo yibe eyobuloli hakari wanje ninawe. 45Mana Yakobo nabukula lichina nalisinjisia libe isiilo. 46Yakobo nasunjila abaana babwe ari Bunjelesie amachina; nabo nibabukula amachina nibakasia eshituuli; nibaliilaho ahambi neshituuli. 47Ne Labani yashikulikha mbu Yegarisahadutsa; habula Yakobo yashikulikha mbu Galeedi. 48Labani naboola ari Eshituuli shino neshiobuloli hakari wanje ninawe inyanga yino. Niyeshichila eliira liashio lialangwa mbu Galeedi, 49khandi nende Mizipa, okhuba yasunga mbu OMWAMI abe ouhenjelesia hakari wanje ninawe olwa khuba nikhuralolana ta. 50Noba nobasandia abakhaana banje, kata noba nobaleerela abakhasi bandi, omundu yesi abulaho nineefwe; lola, Nyasaye nomuloli hakari wanje ninawe.
51Mana Labani namusunjila Yakobo ari Lola eshiNuli shino khandi isiilo yino ebia endeereho hakari wanje ninawe. 52EshiNuli shino shibe eshiobuloli, khandi isiilo yinoyibe eyobuloli, mbu shindilibira eshituuli shino nikhwitsila, kata nawe shiolibira eshituuli shino nende isiilo yino okhunzitsila, okhuleera obubii, tawe. 53Nyasaye waAburahamu, Nyasaye waNahori, Nyasaye wasaabwe, akabukhasia hakari weefwe. Yakobo niyeetsuba khumuriibwa waIsaka samwana. 54Mana Yakobo yamala omusango yaho mushikulu, nalanga abaana babwe mbu balie ebiliibwa; nibalia ebiliibwa, nibakonaho eshilo tulu mushikulu.
55Labani naye nahuuna mumabwibwi tsi natsunzuuna abaanabe abasiani nende abakhaana, nabasabila ikhabi; Labani niyeenyokha, nakalukha ewuwe.
Currently Selected:
Genesis 31: OUV
Highlight
Share
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
