Ezekieli 46
46
1Kano niko aka Omwami NYASAYE aboola; mbu Eshilibwa shiolwanyi Iwomukari eshihenga enabukwe shilabeetsenje nishiikaale mundaalo tsisasaba tsiemilimo; ne khunyanga yasabato shileekulungwe; kata khunyanga yokhuchaaka khwomwesi shileekulwe. 2Omwami weshialo aleenjile nabirila mushirookoola shieshilibwa elwanyi, nasinjila hashiyindi shieshilibwa; nabo abakuhani balakasie omusangokwe omusambe nemisangochie chiokhwishia; naye alamwinamile OMWAMI hamushingachi kweshilibwa; mana alaruleho; nebutswa eshilibwa shirakheekalwa ta okhuula khubwile. 3Nabo abandu beshialo baleenamenje imbeli w habwinjililo bweshilibwa tsana khusabato nende khukhuchaaka khwemiesi. 4Ne omusango omusambe okwa omwami weshialo alaleerelanga OMWAMI khunyanga yasabato kulabeetsenje amakondi keshimwamwane kasasaba akabula obulema, nelimiiku elibula obulema; 5nakwo omusango kweimele kulabe efa ndala khulwa limiiku, nomusango kweimele khulwa amakondi kulabe shinga olwa alar yala okhuhaana, neihini yamafura khubuli efa. 6Ne khunyanga yokhuchaaka khwomwesi, kube ihuunwa eyibula obulema, namakondi kasasaba, nelimiiku; biosi bibe ebibula obulema 7khandi ayinie ebiomusango kweimele, efa ndala khulwa ihuunwa, nende efa ndala khulwa limiiku, ne khulwa amakondi shinga olwa alanyala, neihini yamafura khubuli efa. 8Olwa omwami weshialo aleenjilamwo, aleenjile nabirila mushirookoola shieshilibwa, narulila mushio.
9Ne olwa abandu beshialo baleetsanga imbeli w munduukho tsiemilukha, ouba niyeenjila nabirila mushilibwa shienotsi okhwinamila OMWAMI alarulile mushilibwa shiesautsi, ne ouba niyeenjila nabirila mushilibwa shiesautsi alarulile mushilibwa shienotsi; aleshe okhukalukha nabirila mushilibwa eshia yeenjiliilemwo ta; ne arule natsia imbeli shilunji. 10Olwa baleenjilamwo, omwami weshialo aleenjila ninabo halala; khandi olwa balarulamwo, yesi alarula.
11Mumasabo nomunduukho tsiemilukha, omusango kweimele kulabeetsenje efa ndala khulwa ihuunwa, nende efa ndala khulwa limiiku, ne khulwa amakondi shinga olwa alanyala okhuhaana, neihini yamafura khubuli efa. 12Ne olwa omwami weshialo alayinia eshihaanwa eshia ahaana khulwa okhuchama, mbu omusango omusambe kata emisango chiokhwishia echia omwene achama okhuhaanila OMWAMI, aleekulilwe eshilibwa eshihenga enabukwe; mana alahaane omusangokwe omusambe nemisangochie chiokhwishia shinga olwa akholanga khunyanga yasabato; mana alarulemwo; ne namalile okhurula, eshilibwa shileekalwe.
13Olayininjie likondi lieshimwamwane elibula obulema khulwa omusango omusambe kwOMWAMI buli nyanga; mutsuli buli mutsuli olaliyininjie. 14Nahalala ninalio olayininjie mutsuli buli mutsuli ebiomusango kweimele, eshitonye shiakhasasaba shia efa, neshitonye shiakhataru shieihini yamafura akokhutsokasilia obusie tsana obunyushe; okwo nomusango kweimele kwOMw tsindaalo tsiosi khulwa lilako elirahwaho ta. 15Balabikasinjie bario, likondi liene, nomusango kweimele, namafura, mutsuli buli mutsuli, bibe omusango omusambe kwakhatsotso.
16Kano niko aka Omwami NYASAYE aboola mbu Omwami weshialo naba naheelesia oundi yesi owokhubaanabe eshihaanwa, eshiobulaamebwe; shibe shirio eshiabaanabenomwandu kwabwe khulwa obulaame. 17Nebutswa naba naheelesia oundi owokhubasumbabe eshihaanwa eshiokhubulaamebwe, shilabe eshishie okhuula khumuyika kwobulekhuule; mana shilakalusilibwe omwami weshialo; abaanabe bonyene nibo abanyala okhutong'a neshihaanwa eshiokhubulaamebwe. 18Kata omwami weshialo arakhabukula eshiokhubulaame bwabandube, okhubarusia mumiandu chiabwe namaani, ta; alalaamile abaanabe obulaame okhurula mumiandu chichie; mbu abandu banje baleshenje okhwahukhasibwa buli mundu nemianduchie ta.
19Mana niyanzinjisia mubwinjililo obwali elubeka Iweshilibwa niyanzusia mubisika ebitakatifu biabakuhani ebihenga enotsi; ne mubwenomwo nindola habundu ahasibila mumbo. 20Niyasunjila mbu Hano niho aha abakuhani balateeshelanga emisango chieshiuku nemisango chiobwonooni, naha balasambila emisango chieimele; mbu baleshe okhuchiyila mulwanyi Iwelwanyi, okhwahula abandu.
21Mana niyambila mulwanyi Iwelwanyi, niyambisia hatsikoona tsine tsiosi tsiolwanyi tsana; ne lola, lwaliho olwanyi lundi mubuli koona yolwanyi. 22Mutsikoona tsiosi tsine tsiolwanyi tsana mwalimwo tsinyanyi tsinduutu, etsiachelwa oburambi amakhono amakhumi kane nobuchiikha amakhumi kataru; etsio tsine etsiali mutsikoona tsiahelana obukhongo. 23Ne kwalimwo omushingachi okwatsifumbila, okhufumbila etsio tsine; ne kwalongwa namayika hasi wemishingachi tsana, tsimbeka tsiosi. 24Mana niyasunjila mbu Kano niko amateeshelo aha abakhalabani beihekalu balateeshelanga emisango chiabandu.
Currently Selected:
Ezekieli 46: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
