Ezekieli 40
40
Omunabii yabisulilwa omufwano kweihekalu
1Mumuyika kwamakhumi kabili nakharaano kwobwarwi bweefwe, mukhuchaaka khwomuyika, omwesi nikuli ekhumi, mumuyika kwekhumi nakhane olunyuma Iwokhuhulwa khwelitookho, khunyanga eyo omukhono kwOMWAMI kwali khwisie, niyambila yaho; 2mbu mumabisulo, Nyasaye yambila mushialo shiaIsiraeli niyara khushikulu eshirambi muno, ewa omufwano kwelitookho kwandoleshela enasautsi. 3Niyambilayo, ne lola, omundu ngwoyo; okhulolekhakhwe khweenga shinga okhulolekha khwomukasa, nali nende olutsaha Iweikitani mumukhono, nelitundu eliokhuchela; nasinjiile hashilibwa. 4Omundu tsana niyasunjila mbu Mwana womundu, henga netsimonitsio ohulile namarwiko, norakhwo omwoyo khukosi aka ndalakhumanyia; shichila oleerilwe hano ekhumanyie amakhuwa kandi; nawe orumbulile inzu yaIsiraeli kosi aka olalola.
5Ne lola, olukoba lwaliho okhubotokhana ihekalu yosi; ne litundu eliokhuchela eliali mumukhono kwomundu tsana lwahela amakhono kasasaba amarambi, mbu buli mukhono nikumeetilwakhwo obubambalifu bweshikalo. Kho yachela obubambalifu bwolukoba tsana, mbu litundu elala; noburambi bwalwo, litundu elala. 6Mana niyoola khushilibwa eshihenga ebukwe, naniina khumaniinilo kashio; nachela obwelu bwene bwomushilibwa, litundu elala obuchiikha bwabwo. 7Buli khakoro khabalindi khahela litundu elala oburambi, nelitundu elala obuchiikha; nahakari worukoro tsana rubili rubili hahela amakhono karaano; nobwelu bwomushilibwa hashirookoola shieshilibwa enanzu, bwahela litundu elala. 8Yachela nende eshirookoola shieshilibwa enanzu, mbu amakhono munaane; 9nemisiilo chiashio, amakhono kabili; nashio eshirookoola shieshilibwa shiahenga enanzu. 10Orukoro rweshilibwa shiebukwe rwali rutaru elubeka, narutaru elubeka; rwosi rutaru rwali oruhelani; nemisiilo nachio chiali emihelani, elubeka eyi nende eyi. 11Nachela omuliango kweshilibwa, amakhono ekhumi; ne obubambalifu bweshilibwa bwahela amakhono ekhumi nakataru. 12Kwaliho omushingachi imbeli worukoro omukhono mulala elubeka eyi nende eyi; narwo orukoro, amakhono kasasaba elubeka eyi namakhono kasasaba elubeka eyi. 13Nachela eshilibwa okhurula khwisiisi lielwanyi eliakhakoro khalala okhuula khwisiisi lielwanyi liakhakoro khandi, obuchiikha amakhono amakhumi kabili nakaraano, okhurula khumuliango okhuula khumuliango kundi. 14Yachela nende eshirookoola, amakhono amakhumi kabili; nalwo olwanyi lwali imbeli weshirookoola shieshilibwa tsimbeka tsiosi. 15Okhurula khubwinjililo bweshilibwa, hambeli washio, okhuula khushihesi shieshirookoola shiomukari mushilibwa, hahela amakhono karaano. 16Eshilibwa shiali nende ebianzwi ebianyelehala elwanyi, mumisiilo chiorukoro; eshirookoola nashio shiali nebianzwi mukari tsimbeka tsiosi; ne buli kusiilo kwalikhwo eshifwanani shiomushindu.
17Mana niyambila mulwanyi Iwelwanyi, ne lola, ebisika mbiebio, nobwelu bwamachina mulwanyi tsimbeka tsiosi; ebisika amakhumi kataru bialiho habwelu bwamachina. 18Obwelu bwamachina bwarondokhana nebilibwa, elubeka, nibuhelana nebilibwa oburambi; obwo nobwelu bwamachina obwahasi. 19Mana nachela oburambi okhurula imbeli weshilibwa shiahasi, mukari washio, okhuula imbeli wolwanyi Iwomukari, elwanyi washio; mbu amakhono eshikhumi, ebukwe nende enotsi.
20Yanzimilila niyambila enotsi, ne shieshio, eshilibwa shiolwanyi Iwelwanyi, eshihenga enanotsi; nachela oburambi nende obuchiikha bwalwo. 21Nashio shiali nende orukoro rwabalindi, rutaru elubeka eyi norutaru elubeka eyi; ne emisiilo chiashio neshirookoola shiashio biahelana nende ebieshilibwa shiambeli; mbu oburambi bwashio amakhono amakhumi karaano, nobuchiikha amakhono amakhumi kabili nakaraano. 22Nabio ebianzwi biashio, neshirookoola shiashio, nemishindu chiashio, biahelana nende ebieshilibwa eshihenga ebukwe; abandu baniinilanga khumaniinilo musaafu, niboola khushirookoola. 23Shialilo eshilibwa shiolwznye olwomukari eshihengana neshilibwa shindi, elubeka Iwenotsi, shinga eshielubeka Iwebukwe; naye nachela okhurula khushilibwa okhuula khushilibwa, mbu amakhono eshikhumi.
24Mana niyanzimilila enasautsi, ne lola, eshilibwa shieshio, eshihenga enasautsi; nachela emisiilo chiashio neshirookoola shiashio; nabio nibihelana nende ebindi obukhongo. 25Bialiho ebianzwi mushio nomushirookoola shiashio tsimbeka tsiosi, shinga ebianzwi bilia; oburambi nibuba amakhono amakhumi karaano, nobuchiikha amakhono amakhumi kabili nakaraano. 26Kaliho amaniinilo musaafu okhuniinilakhwo, mana niboola khushirookoola; nashio shiali nende ebifwanani biemishindu khumisiilo chiashio, shilala elubeka nashilala elubeka. 27Shialiho eshilibwa shiolwanyi olwomukari esautsi; naye nachela okhurula khushilibwa okhuula khushilibwa, enasautsi, amakhono eshikhumi.
28Mana niyambila mulwanyi Iwomukari, mushilibwa shiesautsi; nachela eshilibwa tsana shiesautsi, nishihelana nende ebindi. 29Kata orukoro rwabalindi rwashio, nemisiilo chiashio, neshirookoola shiashio, nibihelana nende ebindi; bialiho ebianzwi mushio nomushirookoola shiashio tsimbeka tsiosi; oburambi bwashio nibuba amakhono amakhumi karaano, nobuchiikha amakhono amakhumi kabili nakaraano. 30Bialiho ebirookoola tsimbeka tsiosi, ebiahela oburambi amakhono amakhumi kabili nakaraano nobuchiikha amakhono karaano. 31Eshirookoola shiashio shiahenga enalwanyi Iwelwanyi; ebifwanani biemishindu bialiho khumisiilo chiashio; ne khulwa okhuniinilakhwo, kaliho amaniinilo munaane.
32Mana niyambila mulwanyi Iwomukari enabukwe; nachela eshilibwa, nishihelana nende ebindi. 33Orukoro rwashio rwabalindi, nemisiilo chiashio, neshirookoola shiashio, nibihelana nende ebindi; bialiho ebianzwi mushio, nomushirookoola shiashio, tsimbeka tsiosi; oburambi bwashio nibuhela amakhono amakhumi karaana nobuchiikha amakhono amakhumi kabili naka raano. 34Eshirookoola shiashio shiahenga ena lwanyi Iwelwanyi; ebifwanani biemishindu bia liho khumisiilo chiashio, elubeka eyi nende eyi; ne khulwa okhuniinilakhwo, kaliho amaniinilo munaane.
35Mana niyambila khushilibwa shienotsi; nashichela, nishihelana nende ebindi; 36mbu orukoro rwashio rwabalindi, nemisiilo chiashio, neshirookoola shiashio; bialiho ebianzwi mushio tsimbeka tsiosi; oburambi bwashio nibuhela amakhono amakhumi karaano, nobuchiikha amakhono amakhumi kabili nakaraano. 37Eshirookoola shiashio shiahenga enalwanyi Iwelwanyi; ebifwanani biemishindu bialiho khumisiilo chiashio, elubeka eyi nende eyi; ne khulwa okhuniiniIakhwo, kaliho amaniinilo munaane.
38Shialiho eshisika shindi nomuliango kwashio mushirookoola shieshilibwa, aha boosilinjia omusango kwokhusambwa. 39Khandi mushirookoola shieshilibwa tsialimwo tsimeesa tsibili elubeka eyi, netsimeesa tsibili elubeka eyi, okhwirilakhwo eshiomusango kwokhusambwa, neshiokwobwonooni, nende eshiokweshiuku. 40Elubeka lulala, elwanyi, habwinjililo bweshilibwa enanotsi, tsialiho tsimeesa tsibili; nokhulubeka lundi Iweshirookoola shieshilibwa, tsialiho tsimeesa tsindi tsibili. 41Tsimeesa tsialiho tsine mukari, netsimeesa tsindi tsine elwanyi, elubeka Iweshilibwa; mbu tsimeesa tsiosi munaane etsia beerelangakhwo emisango. 42Tsialiho tsimeesa tsine etsiomusango kwokhusambwa, etsiamachina amabaatse; oburambi bwatsio bwali omukhono mulala neshitonye, nobuchiikha omukhono mulala neshitonye, nobuchinguukhu omukhono mulala; ne khutsio nikhwo okhwa bareetsanga ebikholelo biene ebia beerelanga ebiemisango chiokhusambwa nemisango chindi. 43Ebikuru nabio biareebwamwo tsimbeka tsiosi, buli shilala oburambi bwashio nibuhela obubambalifu bweshikalo; ne tsimeesa tsana tsiali etsiokhurakhwo inyama yemisango.
44Mana niyanzinjisia mulwanyi olwomukari, ne lola, ebisika bibili mbiebio, mulwanyi Iwomukari, shilala elubeka Iweshilibwa shienotsi, nishihenga esautsi, eshindi elubeka Iweshilibwa shiesautsi, nishihenga enotsi. 45Niyasunjila mbu Eshisika shino eshihenga esautsi neshiabakuhani abasinjilila obulindi bweihekalu. 46Nashio eshisika eshihenga enotsi neshiabakuhani abasinjilila obulindi bweshimalilo; nibo abaana baZadoki, ne nibo bonyene mubaana baLawi abasitanga ahambi khuMWAMI okhumukhalabanila. 47Mana nachela olwanyi, mbu oburambi amakhono eshikhumi nobuchiikha amakhono eshikhumi, tsimbeka tsiosi tsine nitsihelana; eshimalilo nashio shiali imbeli weihekalu.
48Mana niyambila hashirookoola shieihekalu, nachela buli kusiilo kweshirookoola, mbu amakhono karaano elubeka eyi, namakhono karaano elubeka eyi; eshilibwa nishihela amakhono ekhumi nakane obuchiikha bwashio, nelisiisi lieshilibwa amakhono kataru elubeka eyi, namakhono kataru elubeka eyi. 49Oburambi bweshirookoola bwahela amakhono amakhumi kabili, nobuchiikha amakhono ekhumi nakabili, ne shiali namaniinilo ekhumi akokhuniinilakhwo; ne tsialiho tsisiilo halala nende emisiilo tsana, ndala elubeka eyi, neyindi elubeka eyi.
Currently Selected:
Ezekieli 40: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
