Ezekieli 39
39
1Nawe, mwana womundu, rumbula nofukula Gogu, nosunga ori Kano niko aka Omwami NYASAYE aboola; mbu Lola, ekhufukula, iwe Gogu, omukhulundu waRoshi, Meshekhu, naTubali; 2ndalakhushiukhasia, nikhwilusia, nikhutikulusia okhurula khushihesi shienotsi, nikhwimilila mbu oseere tsingulu tsiaIsiraeli; 3ndalakhupa obuyingobwo, burule mumukhonokwo mukhasi, nindakasia ebiselebio birule mumukhonokwo musaatsa. 4Olakwisibwa khungulu tsiaIsiraeli, iwe netsing'andatsio tsiosi, nende tsimbia etsia olaba noli ninatsio; ndalakhuhaana khumanyonyi amalii ketsimbia tsiosi, nokhutsisolo tsinabulimo, mbu oliibwe. 5Olakwisibwa mubulimo ebulafu; okhuba nisie ouboolile, Omwami NYASAYE aboola. 6Ndalaruma omulilo khuMagogu, nokhubeenabo abamenya shisale khunguku tsieinyanza; mana balamanya mbu isie nisie OMWAMI.
7Ndalamanyisia eliira lianje litakatifu hakari wabandu banje Isiraeli; kata shindalafuchiilila eliira lianje litakatifu okhwonoonibwa khandi ta; mana amahanga kalamanya mbu isie nisie OMWAMI, Omutakatifu muIsiraeli. 8Lola, keetsanga, ne kaleekhola; nolwa Omwami NYASAYE aboola; yino niyo induukho tsana eya ndaboolakhwo.
9Abamenyanga mumataala kaIsiraeli balarula nibabwana omulilo kwebimanulwa nibabisamba, mbu tsingabo nebikhumba, obuyingo nebisele, tsindabushi namafumo; nibio ebilaba tsikhwi tsiabwe emiyika musaafu; 10kata shibalarenyanga tsikhwi mubulimo, kata okhutsirema mumutsuru ta; okhuba baleekhoonyelanga ebimanulwa tsana khulwa omulilo; balayaayanga abo ababayaaya, nibabanyaka abo ababanyaka; nilwo olwa Omwami NYASAYE aboola.
11Khunduukho eyo ndalaheelesia Gogu eshianyi shieshilindwa muIsiraeli, mwibanda liAbabiri, ebukwe weinyanza; shileekalila ababiri; ebweneyo balamuyabila Gogu halala nobunji bwabandube; mana balalilanga mbu Libanda liaHamonigogu. 12Abeinzu yaIsiraeli balamala emiesi musaafu nibabayabilanga, okhusiiya eshialo. 13Kata abandu bosi beshialo balabayabiIanga; ne khulwako balafuma khunyanga olwa ndalalolosia oluyali lwanje; nolwa Omwami NYASAYE aboola. 14Balahandiika abandu okhubiranga mushialo okhuyabila ababiri abashitong'a khushialo, okhushilabia; ne olunyuma Iwemiesi musaafu balakhaaba. 15Ababiranga mushialo balabira, ne omundu yesi khubo naba nalola likumba liomundu, alasinjisiayo eshilolelo, okhuula olwa abayabili balaba nibaliyabiile mwibanda liaHamoni-gogu. 16Khandi litaala elo lilalangwa mbu Hamona. Nindio balasiiya eshialo.
17Nawe, mwana womundu, kano niko aka Omwami NYASAYE aboola; mbu Boolela ama-nyonyi ketsimbia tsiosi, nende buli solo inabulimo, ori Khung'aane, mwitse; mwikhung'aasie tsimbeka tsiosi khumusango kwanje okwa emumalila, omusango omukhongo khungulu siaIsiraeli, mbu mulie inyama nimunywa amabanga. 18Mulalia inyama yabalulu, nimunywa amabanga kabakhulundu beshialo; nakamamiiku, namakondi, netsimbusi, netsing'ombe, biosi ebineefu biaBashani. 19Mulalia amasinya nimwikura, nimunywa amabanga nimumeela, khumusango kwanje okwa emumaliile. 20Khumeesa yanje muleekura tsifarasi namakaari, nabalulu, nabandu bosi belihe; nolwa Omwami NYASAYE aboola.
21Ndalara oluyali lwanje hakari wamahanga; mana amahanga kosi kalalola akobukhalachi aka ndalaba nikholile, nomukhono kwanje okwa ndareele khubo. 22Kho abeinzu yaIsiraeli balamanya mbu isie nisie OMWAMI Nyasaye wabwe, okhurula khunyanga eyo. 23Amahanga nako kalamanya mbu abeinzu yaIsiraeli baarwa khulwa obumayaanu bwabwe; okhuba ba'khaya, nasi nimbabisa tsimoni tsianje; kho ndabahaana mumakhono kabasuku babwe, nibakwisibwa bosi nolukanga. 24Obukaali bwabwe nobukhayi bwabwe shinga olwa bwali, nindio ndabakholela endio; ndababisa tsimoni tsianje.
25Khulwako, kano niko aka Omwami NYASAYE aboolaj mbu Bulaano ndalakalusia tsikhabi tsiaYakobo, nimbeela tsimbabasi inzu yaIsiraeli yosi; ndalaba neimbalikha khulwa eliira lianje litakatifu. 26Baleebilila tsisoni tsiabwe, nobukhayi bwabwe bwosi obwa ba'khayanga, olwa balamenya mushialo shiabwe shisale, omundu yesi narabariisinjia ta, 27nolwa ndalaba nimbarusiye mumbia tsiabandu, nimbakhung'aasiye nimbarusiye mubialo biabasuku babwe, obutakatifu bwanje nibulolosiibwe mubo, mumoni tsiamahanga amanji. 28Mana balamanya mbu isie nisie OMWAMI Nyasaye wabwe, okhuba ndabaatisia batsie mumahanga, mana nimbakhung'aasia mushialo shiabwe; kata shindalalekha omundu yesi khubo mumahanga ta; 29kata shindalababisa tsimoni tsianje khandi ta, okhuba endi okhusundulila inzu yaIsiraeli Roho wanje; nolwa Omwami NYASAYE aboola.
Currently Selected:
Ezekieli 39: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
