Ezekieli 34
34
Obulakusi obuyinga abaayi baIsiraeli.
1Likhuwa liOMWAMI nilinzitsila, liri 2Mwana womundu, rumbulila abaayi baIsiraeli amakhuwa kanje; rumbula, nobasunjila abaayi tsana ori Kano niko aka OMWAMI aboola; mbu Woowe khubaayi baIsiraeli abeeyaya abeene! Abaayi shibakhoyile okhwayanga amakondi niina! 3Muliitsanga amasinya; mwifwalanga tsingubo tsiobwoya bwako; musinzanga akanesibwa, nebutswa shimwayanga amakondi keene ta. 4Akali amateshele shimukatinyisie ta; akali amalwale, shimukahoniye ta; akafinikha, shimukaboyile ta; akaraniishe, shimukakalusiye ta; akakora shimukakhaabile ta; nebutswa mukaruchilenje nende amaani nobutinyu. 5Kho nikasalaana, shichila shiyaliho omwayi yesi ta; nikakwa ebiokhulia bietsisolo tsinabulimo tsiosi, nikasalaana. 6Amakondi kanje katiimatiimanga mungulu tsiosi, nokhubuli shikulu eshirambi; amakondi kanje kasalaana khushialo shiosi pe; kata yabulaho owatsia okhukakhaaba nokhukaruna.
7Khulwako, inyve abaayi, hulile likhuwa liOMWAMI; 8Omwami NYASAYE aboola mbu Isie uno! Toto mwene, olwa amakondi kanje kakwile eshioluyiitsi, amakondi kanje nikakwa ebiokhulia bietsisolo tsinabulimo tsiosi, shichila shiyaliho omwayi yesi ta; kata abaayi banje nibarakhaabanga amakondi kanje ta; habula abaayi tsana nibeeyaya abeene, nibaraaya amakondi kanje ta; 9khulwako, inywe abaayi, hulile likhuwa liOMWAMI. 10Kano niko aka Omwami NYASAYE aboola; mbu Lole, efukula abaayi; khandi ndalabanza amakondi kanje mumakhono kabwe, nimbaleshesia okhwaya amakondi; kata abaayi abo shibaleeyaya abeene khandi ta; ne ndalareesia amakondi kanje mumunwa kwabwe, kaleshe okhuba ebiokhulia biabwe.
11Okhuba kano niko aka Omwami NYASAYE aboola; mbu Lole, isie, mbu isie omwene, ndaIakhaaba amakondi kanje ningarunilisia. 12Shi nga omwayi olwa akhaabanga ebiayobie olwa aba nali hakari wamakondike akasalaanile, nindio ndalarunilisia amakondi kanje; ne ndalakahonia buli hosi ewa kaba nikasalaanile khunyanga yelifumbi neshiilima ta. 13Ndala karusia mumbia tsiabandu, ningakhung'aasia ningarusia mubialo, ningeenjisia mushialo shiabwe; ndalakaayanga khungulu tsiaIsiraeli, hamichela, nomubuli habundu ahamenyungwaho mushialo. 14Ndalakaayanga khubwayilo obulayi, ne obwayilo bwako bulaba khubutenje bwetsingulu tsiaIsiraeli; neyo ewa kalakona mubwayilo obulayi, nikaayanga khubwayilo obunulu khungulu tsiaIsiraeli. 15Nasi omwene nisie oulaayanga amakondi kanje, ningakonia, Omwami NYASAYE aboola. 16Ndalakhaabanga akeenako akakorile, ningalusia akaba nikalwala; nebutswa amaneefu akamaani, ndaIakalinda; ndalakaayanga habwene.
17Neenyu, inywe ebiayo bianje, kano niko aka Omwami NYASAYE aboola; mbu Lole, engabukhasia hakari wemiruko nemiruko, mbu hakari wamamiiku khandi nende tsikhole. 18Nelikhuwa lituutu butswa khwinywe okhwayilanga khubwayilo obulayi, mbu mana mutubanjile butubanjila obwayilo obushisikala nebilenje bieenywe? Nokhunyweelanga khumatsi ameelelekhu, mbu mana mutubuule akashisikala nebilenje bieenywe? 19Nako amakondi kanje kalaayanga obwa mwatubanjila nebilenje bieenywe, nikanywa ako aka mwatubuula nebilenje bieenywe, noho?
20Khulwako kano niko aka Omwami NYASAYE ababoolela; mbu Lole, isie, isie omwene, ndalakabukhasia hakari webiayo ebineefu nebing'ahu. 21Okhuba musindikhanga nolubeka nelibeka, nimuluuma amateshele kosi netsinzika, mbu mukasalaasie ebulafu; 22kho ndalahonia eshiayo shianje, shileshe okhuba eshioluyiitsi khandi ta; ndalakabukhasia hakari webiavo nebiayo.
23Khandi ndalaraho omwayi mulala okhukaruka, naye alakaayanga; ne niye omusumba wanje Daudi; alakaayanga, naba ye omwayi wako. 24Nasi OMWAMI ndalaba Nyasaye wabwe, omusumba wanje Daudi naba omukhulundu mubo; isie OMWAMI nisie ouboolile.
25Ndalalakana ninabo indakano yomulembe, ninzakamia tsisolo tsimbii mushialo; balamenya shisale mushitsiimi, nibakona mumitsuru. 26Ndalabamenyia hashikulu shianje; ndalakwisinjia ifula munduukho yayo; yilaba ifula yeikhabi. 27Emisaala echiomumikunda chilaamanga ebiamo, kata eshialo shilahaananga imele yashio, ne balamenyanga shisale mushialo shiabwe; mana balamanya mbu isie nisie OMWAMI, olwa ndalaba nifunaache ebisekeyi biamakokolo kabwe, nimbareesia mumakhono ka abo abababoha mubukhalabani. 28Shibalabeetsanga eshioluyiitsi shiabamahanga khandi, kata tsisolo etsiomushibala shitsilabalia ta; nebutswa balamenya shisale, kata alabulaho oubariisia. 29Ndalabamesilia ebiraache ebilayi, kata inzala shiyilalia eshialo shiabwe khandi, kata shibaleetuukha amaseyo kabamahanga khandi tawe. 30Ne balamanya mbu isie OMWAMI Nyasaye wabwe endi ninabo; khandi mbu bo, abeinzu yaIsiraeli, nibo abandu banje; nolwa Omwami NYASAYE aboola. 31Neenyu amakondi kanje, muli amakondi kobwayilo bwanje, nasi endi Nyasaye weenywe; nolwa Omwami NYASAYE aboola.
Currently Selected:
Ezekieli 34: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
