Ezekieli 33
33
Emilimo chiomulindi
(Ezek. 3.10-21)
1Likhuwa liOMWAMI nilinzitsila, liri 2Mwana womundu, sungana nabaana babandubo, nobaboolela mbu Olwa eleera olukanga khushialo shiosi, abandu beshialo tsana nibeela omundu nibamuraho abe omulindi wabwe; 3ne naba nakhupa olwika okhuchesiyia abandu olwa alola olukanga nilwitsa khushialo, 4kho ouhulila omwoyo kwolwika ne narachesiha ta, olukanga niluba nilwitsa nilumuyila, amabangake kalaba khuye omwene. 5Yahuliile omwoyo kwolwika ne narachesiha ta; amabangake kabe khuye, alaba niyakhachesiye, khane yakhahoniye obulamubwe. 6Nebutswa omulindi naba nalola olukanga nilwitsa, ne narakhupa olwika, abandu nibarachesiyibwa ta, mana olukanga nilwitsa niluyila omundu yesi khubo; kho omwene ayilwa ario mubumayaanubwe, ne amabangake ndalakabanza mumukhono kwomulindi tsana.
7Kho iwe, mwana womundu, ndakhuraho obeetsenje omulindi weinzu yaIsiraeli; khulwako, hulilanga amakhuwa komunwa kwanje, nobayilila obuchesiyii oburula khwisie. 8Olwa esunjila omubii yesi mbu Iwe omundu omubii, oli okhufwa; ne nawe noraboola akokhuchesiyia omubii oyo mbu arule khunjilaye ta; kho omundu oyo omubii alafwila mubumayaanubwe, ne amabangake ndalakabanza mumukhonokwo. 9Habula noba nomuchesiyia omubii akeinjilaye, mbu ashiukhane achirulekhwo, naye narashiukhana okhurula khunjilaye ta, kho alafwila mubumayaanubwe, ne iwe oba nohoniYe obulamubwo.
Injila yaNyasaye nihabwene.
10Nawe, mwana womundu, boolela abeinzu yaIsiraeli mbu Kano naka musunganga, mbu Obukhayi bweefwe nebionoono bieefwe bili khwifwe; khwotooshelelanga khulwabio; khukhanyala khurie okhuba mwoyo? 11Obaboolele mbu Isie uno! Omwami NYASAYE aboola; Okhufwa khwomubii shikhunjamisia ta, habula mbu omubii ashiukhane, arule khunjilaye, abe mwoyo. Shiukhane, mushiukhane murule khunjila tsieenywe tsimbii; nishiina eshichila nimwenya okhufwa, inywe abeinzu yaIsiraeli? 12Nawe, mwana womundu, sunjila abaana babandubo mbu Obulunjishi bwomulunjishi shibulamuhonia khunyanga yobukhayibwe ta; ne khukobubii bwomubii, shialakwa khulwabwo ta khunyanga olwa aba nashiukhana okhurula khububiibwe; kata oyo ouli omulunjishi shialanyala okhuba mwoyo khulwa obulunjishibwe ta, khunyanga olwa aba niyoonoona. 13Olwa emuboolela omulunjishi mbu okhuba mwoyo alaba mwoyo; naba natsaalikha khulwa obulunjishibwe, nakhola obumayaanu, kho obulunjishibwe bwosi bwosi shibuleetsulilwakhwo ta; habula mubumayaanubwe obwa akholile, nimwo omwa alafwila. 14Kata olwa emuboolela omubii mbu okhufwa alafwa; naba nashiukhana okhurula khububiibwe, nakhola akafuchiililwa, akali habwene; 15mbu omubii tsana naba nakalusia omusingo okwa abeele nabukuule, narunga ebia yabukula munjila yobwibi, nachenda mumalako kobulamu, oburakhola obumayaanu bwosi ta; kho okhuba mwoyo alaba mwoyo; shialafwa tawe. 16Ebionoonobie biosi biosi ebia yakhola shibileetsulilwa khuye ta; akholile akafuchiililwa, akali habwene; okhuba mwoyo alaba mwoyo.
17Nebutswa abana babandu basunga mbu Injila yOMWAMI shiyili ineng'aafu ta; ne bo nibo aba injila yabwe yibula obuleng'aafu. 18Olwa omulunjishi aba nashiukhana okhurula khubulunjishibwe nakhola obumayaanu, alafwa khulwabwo. 19Khandi omubii naba nashiukhana okhurula khububiibwe, nakhola akafuchiililwa akali habwene, alaba mwoyo khulwako. 20Nebutswa musunganga mbu Injila yOMWAMI shiyili ineng'aafu ta. Inywe abeinzu yaIsiraeli ndalamuyaasia, buli mundu shinga tsinjilatsie olwa tsili.
Akokhukwa khwaYerusalemu
21Mumuyika kwekhumi nakhabili kwobwarwi bweefwe, mumwesi kwekhumi nikuli kharaano omundu owali niyeehonokooshe yarula eYerusalemu niyanzitsila, nasunga mbu Litookho likwile. 22Ne omukhono kwOMWAMI kwali nikubeele khwisie mungoloobe; niyanzikula omunwa, omundu oyo oweehonokokha narashianzitsila mutsuli ta; omunwa kwanje kwali nikwikuushe, nindaba omusilu khandi ta.
23Likhuwa liOMWAMI nilinzitsila, liri 24Mwana womundu, abamenyanga hamakunda akali mushialo shiaIsiraeli basunganga bari Aburahamu yali mulala yenyene, ne yalia eshialo shino; neefu khuli abanji; eshialo shiakhuheebwa ifwe, khushilie. 25Khulwako, obasunjile mbu Kano niko aka Omwami NYASAYE aboola; mbu Inywe muliitsanga inyama eyili namalasile, nimuchinguula tsimoni okhuhenga emindu echia mwinamilanga, nimwebeenia amabanga; inywe kho mwakhalia eshialo noho? 26Mwikhoonyelanga olukanga, nimukhola akeshisinyo, nimwonoonia buli mundu omukhasi wabeene; kho mwakhalia eshialo? 27Olabasunjila ori nanwa; mbu Kano niko aka Omwami NYASAYE aboola; mbu Isie uno! Toto mwene, abali mumukunda tsana balakwisibwa nolukanga, kata ouli mubulimo ebulafu, ndalamuhaana khutsisolo mbu aliibwe; kata abali mungoba nomumbinga balafwa khulwa oluumbe. 28Ndalakwisia eshialo likunda likha-ya, obwikhulumamii bwobunyalibwe nabwo bulaakama; kata tsingulu tsiaIsiraeli tsilaba tsikhaya etsia omundu yesi arabiramwo ta. 29Mana baiamanya mbu isie nisie OMWAMI, olwa ndalaba ningwisiye eshialo likunda likhaya, khulwa ebisinyo biosi ebia bakholanga.
30Nawe, mwana womundu, abaana babandubo bakhurumbulanga halukoba nomumiliango chietsinzu, nibasungana buli mundu nowashie, bari Witse ohulile likhuwa elirulile khuMWAMI shinga olwa lili. 31Bakhwitsilanga shinga abandu olwa beetsa, nibeekhala imbeliwo shinga olwa bali abandu banje, nibahulila amakhuwako, ne shibakakhola ta; okhuba balolosia obuheeli obunji neminwa chiabwe, habula emioyo chiabwe chilondanga inganga yabwe. 32Nawe, lola, obabeelanga butswa shinga omundu owimba olwimbo olulayi muno nomwayo okuchamisia, kata omusitsa oupa obukhana; okhuba bahulilangn amakhuwako, ne shibakakholanga ta. 33Kano olwa keetsa okhwikhola, ne toto mwene keetsanga, mana balamanya mbu omunabii yabeelenje hakari mubo.
Currently Selected:
Ezekieli 33: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
