Ezekieli 32
32
Olwikhuulu khulwa Farao
1Mumuyika kwekhumi nakhabili, mumwesi kwekhumi nakhabili nikuli lulala, likhuwa liOMWAMI nilinzitsila, liri 2Mwana womumdu, yikhuula olwikhuulu khulwa Farao omuruchi waMisiri, nomusunjila mbu
Wichelasia neitalanyi mmbuukha mumahanga;
nebutswa oli shinga okukwena munyanza;
ofuuranga mumooloko,
notubuula amatsi nebilenjebio,
niwonoonia emialo chiabwe.
3Kano niko aka Omwami NYASAYE aboola; mbu
Ndalaala olurimba lwanje khwiwe,
halala nomukanda kwabetsimbia tsinyinji,
nikhukhwesela mulukhanda lwanje.
4Ndalakhwibala khwiloba nikhusukuna mubulimo ebulafu,
nileera amanyonyi kosi akokhwikulu kakhuyeelekhwo,
ninzikusia tsisolo tsieshialo shiosi khwiwe.
5Ndalabakala inyama yomubilikwo khubikulu ninzitsusia amabanda omulambokwo.
6Ndalanyisia eshialo okhuula khubikulu namabanga akarulanga khwiwe,
oleetsula mumichela chiosi.
7Olwa ndalakhusimia, ndalafuunikha likulu ningwisia tsinyininyini tsialio eshiilima;
ndalafuunikha eliuba nelileesi,
kata omwesi shikulaakhakhwo ta.
8Ebiashilo biosi ebiashilanga mwikulu ndalabikwisia eshiilima ikuluwo,
niraho eshiilima khushialoshio,
Omwami NYASAYE aboola.
9Ndalabeyabeyia emioyo chiabetsimbia tsinyinji, olwa ndalakhuyila mubuhambe mumahanga, mubialo ebia oramanyilekhwo ta. 10Ndalang'ang'aasia abetsimbia tsinyinji khukoko, abaruchi babwe nabo balaria okhuria khwamakana khululwo, olwa ndalareesia olukanga lwanje imbeli wabwe; balatechelanga khase khase, buli mundu khulwa obulamu bubwe omwene, khunyanga yokhukwakhwo. 11Okhuba kano niko aka Omwami NYASAYE aboola; mbu Olukanga Iwomuruchi waBabeli lulakhwitsila. 12Ndalakwisia abandubo bosi khulwa tsinganga tsiabalulu, abo bosi abali abamariisia mumahanga.
Balafubia obwikhulumamii bwaMisiri,
nobunji bwabandu babwe bulasikha.
13Ndalatibia nende emiruko chiashio chiosi,
okhurula ewa chili, hamatsi amanji.
Ebilenje biabandu shibilakatubuula khar di,
kata tsimbakayu tsiemiruko okhukatubuula ta.
14Mana ndalakhola amatsi kabwe kabe ameeleleshe,
emialo chiabwe nichibira shinga amafura,
Omwami NYASAYE aboola.
15Olwa ndalakwisia eshialo shiaMisiri likunda, eshikhaya butswa,
eshialo eshibula biosi ebia shiali nishieetsulamwo,
olwa ndalabarootsa bosi abamenyangamwo,
habwenaho balamanya mbu isie nisie OMWAMI.
16Olwo nilwo olwikhuulu olwa baleekhuula; abakhaana bamahanga balawikhuula; baleekhuula bario khulwa Misiri nomukanda kwosi kwabandube, Omwami NYASAYE aboola. 17Khandi mumuyika kwekhumi nakhabili, mumwesi kwambeli nikuli ekhumi nakharaano, likhuwa liOMWAMI nilinzitsila, liri 18Mwana womundu, khupila abandu bosi baMisiri tsimbungu, nobeesia hasi, ye omwene nende abakhaana bamahanga akeifuma, okhuula khushialo shiahasi, halala nabeenabo abeekha muBuko.
19Ali heena owa oshilanga likondo?
Yikha, walisibwe nabasinde.
20Balakwa hakari wa abo abeerwa nolukanga; kata omukanda kwabandube balayabilwa ninaye halala. 21Abashila amaani mubalulu balamusunjila ewa bali eMakombe hakari, halala nababeelibe, mbu Beeshile nibakona bukona, abasinde bano, abeerwa nolukanga.
22Ashuru aliyo, nomukandakwe kwosi; ebilindwa biabwe bimufumbila; bosi beerwa, nibakwisibwa nolukanga; 23ebilindwa biabwe biakasibwa muBuko musi bwene, omukandakwe kwosi nikufumbila eshilindwashie; bosi beerwa, nibakwisibwa nolukanga, abali nibaleeranga amariisia mushialo shiabali mwoyo.
24Elamu aliyo, omukanda kwabandube nikufumbila eshilindwashie; bosi beerwa, nibakwisibwa nolukanga, abeekha mushialo shiahasi nibashili abasinde, abali nibaleeranga amariisia mushialo shiabali mwoyo; nibeetuukha tsisoni tsiabwe halala nabeenabo abeekha muBuko. 25Bamukasiliye obulili hakari wabeerwa, halala nomukanda kwabandube; ebilindwabie bimufumbila; nabasinde bosi, nibeerwa nolukanga; amariisia kabwe kalinjiho mushialo shiabali mwoyo, nibeetuukha tsisoni tsiabwe halala nabeenabo abeekha muBuko; bareebwa hakari wa abo abeerwa.
26Meshekhu naTubali baliyo, nomukanda kwabandu babwe; ebilindwa biabwe bibafumbila; nabasinde bosi, nibeerwa nolukanga; okhuba bali nibaleeranga amariisia mushialo shiabali mwoyo. 27Shibayabilwa halala nabalulu bakhale abakwa, abeekha eMakombe nibali nebimanulwa biabwe biobulasani, emirwe chiabwe nichialisibwa khunganga tsiabwe, ebikhumba biabwe nibili khumakumba kabwe, ta; okhuba amariisia kabalulu kaliho mushialo shiabali mwoyo. 28Nawe olafunakwa nokona hakari wabasinde, noyabilwa halala nende abo abeerwa nolukanga. 29Edomu aliyo, nabaruchibe nabakhulundube bosi, abayabilwa halala nende abo abeerwa nolukanga, kata olwa bali abalulu bario; balayabilwa nabasinde, halala nende abo abeekha muBuko.
30Abakhulundu benotsi baliho bosi, nabeSidoni bosi, abakholomooshe halala nabeerwa nibafwimbwa omurwe, kata olwa bali abamariisia bario mubululu bwabwe; bayabilwa bario mubusinde, halala nende abo abeerwa nolukanga, nibeetuukha tsisoni tsiabwe halala nende abo abeekha muBuko.
31Farao alabalola, nalema omwoyo khulwa omukanda kwabandube; mbu Farao nabameheke bosi, abeerwa nolukanga, Omwami NYASAYE aboola. 32Okhuba yeenjisia amariisiake mushialo shiabali mwoyo; ne alayabilwa hakari wabasinde, halala nende abo abeerwa nolukanga, nibo Farao nomukanda kwabandube, Omwami NYASAYE aboola.
Currently Selected:
Ezekieli 32: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
