Ezekieli 30
30
Eshialo shiaMisiri shiakwisibwa likunda
1Likhuwa liOMWAMI nilinzitsila khandi, liri 2Mwana womundu, lakula nosunga ori Kano niko aka Omwami NYASAYE aboola; mbu
Khupa tsimbungu, mbu Woowe khunduukho eyo!
3Okhuba induukho tsana yili okhuula,
mbu induukho yOMWAMI yili okhuula,
induukho yelifumbi,
eshise shieshihesi shiamahanga.
4Olukanga luleetsa khuMisiri,
obusaalili bulabaho muEtiopia,
olwa abeerwa balakwa muMisiri;
balabukula obunji bwobuyinda,
emisechie nachio nichionoonibwa.
5Etiopia, naPutu, naLudi, nabebuArabu, naLibia, nabandu ababalia ninabo omuuma, balakwisibwa ninabo halala khulwa olukanga.
6Kano niko aka OMWAMI aboola; mbu Abo abaterela Misiri nabo balakwa;
obwikhulumamii bwobunyalibwe buleekha;
okhurula eMigidoli okhuula eSeyene balakwitsanga muye khulwa olukanga,
Omwami NYASAYE aboola.
7Shilaba eshikhaya hakari webialo ebili ebikhaya,
kata amataalake kalaba hakari wamataala akakwisibwa amakunda.
8Mana balamanya mbu isie nisie OMWAMI,
olwa ndalaba nihambiye Misiri omulilo,
Ahahahinihe bosi nibamalilanwa.
9Khunduukho eyo abarume balarula imbeli wanje mumaaro okhuriisia abaEtiopia abeelambisii; obusaalili bulaba khubo obunji, khunduukho yaMisiri; okhuba lola, yitsanga.
10Kano niko aka Omwami NYASAYE aboola; mbu Ndalaakamia obunji abandu baMisiri khulwa omukhono kwaNebukhadineza omuruchi waBabeli.
11Ye nabandube bosi, abamariisia mumahanga,
balaleerwamwo okhumulula eshialo;
balatsomola tsinganga tsiabwe okhuseera Misiri,
nibeetsusia eshialo abeerwa.
12Ndalakhamia omwalo kwaNaili,
ningusia eshialo mumakhono kabandu ababii;
ndalakwisia eshialo likunda, nabiosi ebilimwo,
khulwa amakhono kabasuku;
isie OMWAMI nisie ouboolile.
13Kano niko aka Omwami NYASAYE aboola; mbu
Ndalatibia emindu echia beenamilanga ninzakamia emindu tsana echiabutswa eNofu;
shialabaho omukhulundu muMisiri khandi ta;
ndalaramwo oburii mushialo shiaMisiri.
14Ndalakwisia Patsarosi likunda,
nisamba Zoani nomulilo,
nindeera obukuumi khuNo.
15Ndalasundulila Sini obululu bwanje,
nilio litaala liolukoba lieMisiri;
khandi ndalakhalaka obunji bwabandu beNo.
16Ndalasamba Misiri nomulilo;
Sini lilaba mubusaalili;
No lilarabulwa eshibanga,
olukoba lwalio nilulikululwa.
17Abasooliili beOni nabePi-besetsi balakwisibwa nolukanga,
abamataala ako nibayilwa mubuhambe.
18ETahapenehesi naho eshiteere shilakwa eshiilima olwa ndalafunachilayo amakokolo kaMisiri,
obwikhulumamii bwobunyalibwe nibwakama muye;
naye, lileesi liamufwimba,
nabo abakhaanabe balayilwa mubuhambe.
19Nindio ndalakhola akobuyaasii muMisiri;
mana balamanya mbu isie nisie OMWAMI.
20Mumuyika kwekhumi nalulala, mumwesi kwambeli, nikuli musaafu, likhuwa liOMWAMI nilinzitsila, liri 21Mwana womundu, ndafunaache omukhono kwaFarao omuruchi waMisiri; kata lola, shikuboyilwe kata okhusilikhwa kata okhubohwakhwo ipendechi mbu kube okwamaani okhutiila olukanga, ta. 22Khulwako, kano niko aka Omwami NYASAYE aboola; mbu Lola, efukula Farao omuruchi waMisiri; ndalafunaka amakhonoke, mbu okwo okuli kwamaani, nende okwo okwafinikha; ndalachila olukanga nilulakakha okhurula mumukhonokwe. 23Khandi ndalasalaasia abaMisiri mumahanga nimbakabula mubialo. 24Ndalakufuhasia amakhono komuruchi waBabeli, nimutiisia olukanga lwanje mumukhonokwe; nebutswa ndalafunaka amakhono kaFarao, naye alabinda imbeliwe, okhubinda khwomundu oufumirwa niyeenya okhufwa. 25Ndalakufuhasia amakhono komuruchi waBabeli, ne amakhono kaFarao kalatubukha; mana balamanya mbu isie nisie OMWAMI, olwa ndalatiisia olukanga lwanje mumukhono kwomuruchi waBabeli, naye nalunyiila khushialo shiaMisiri. 26Ndalasalaasia abaMisiri mumahanga, nimbakabula mubialo; mana balamanya mbu isie nisie OMWAMI.
Currently Selected:
Ezekieli 30: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
