Ezekieli 28

Obulakusi obuyinga omuruchi waTiro

1Likhuwa liOMWAMI nilinzitsila khandi, liri 2Mwana womundu, sunjila omukhulundu weTiro ori Kano niko aka Omwami NYASAYE aboola; mbu

Okhuba omwoyokwo kwichinjimisiye,

oboolanga mbu Nisie omunyasaye;

ndikhaale mubwikhalo bwaNyasaye,

munda mwetsinyanza.

Nebutswa oli omundu namundu, shioli omunyasaye ta,

kata olwa okaala mbu omwoyokwo kuli shinga omwoyo kwaNyasaye.

3Lola, oli omuchesi okhushila Danieli;

libulaho eliamabiswi elibiswa khwiwe;

4khulwa obuchesibwo nobumanyilisiibwo wayeenyoolela obuyinda,

nonyoola itsahaabu neifeetsa mwibiishilolio;

5khulwa obuchesibwo mukobukhala wayeenjiyiye obuyindabwo;

omwoyokwo kwichinjimisiye khulwa obuyindabwo.

6Khulwako, kano niko aka Omwami NYASAYE aboola; mbu

Okhuba okaala mbu omwoyokwo kuli shinga omwoyo kwaNyasaye,

7niko akachila, lola, ndalaleera abasuku khwiwe,

abamariisia mumahanga;

balatsomola tsinganga tsiabwe okhuseera obuchesibwo obukaasu,

niboonoonia ing'oonoyo.

8Balakhwisia muBuko,

nawe olafwila munda mwetsinyanza shinga abeerwa olwa bafwitsanga.

9Oshienya okhusunga mbu Nisie omunyasaye, imbeli wa oyo oukhwira?

Kata olwa oli omundu namundu, norali omunyasaye ta,

mumukhono kwa oyo oukhufumira?

10Olafwila mumakhono kabasuku shinga abasinde olwa bafwitsanga;

okhuba nisie ouboolile, Omwami NYASAYE aboola.

Olwikhuulu khulwa omuruchi waTiro

11Khandi likhuwa liOMWAMI nilinzitsila, liri 12Mwana womundu, yikhuulila omuruchi waTiro olwikhuulu, nomusunjila ori Kano niko aka Omwami NYASAYE aboola; mbu

Niwe owali omukuuli kwobulamba,

oweetsula obuchesi,

noli habwene mubung'oonefu.

13Wali muEldeni, omukunda kwaNyasaye;

oruchina rwolukoosi rwetsimbia tsiosi rwali eshifuunikhoshio;

mbu odemu, neipeteta, neiyahalomu;

itarashishi, neishohamu, neiyashepi;

isapiri, neinopeki, neibaraketsi,

neitsahaabu eyakasibwa tsisukutitsio namaleleko.

Khunyanga olwa walongwa,

niyo eya biakasilibwakhwo.

14Ndakhuraho halala nomukerubi omulindi owatsushiililwa amafura khushikulu eshitakatifu shiaNyasaye;

wachendanga eyi nende eyi hakari wamachina komulilo.

15Walinji habwene munjilatsio okhurula khunyanga olwa walongwa okhuula obumayaanu olwa bwanyooleshela mwiwe.

16Khulwa obunji bwobukhalabwo bakhwitsusia amahababa, nawe niwoonoona;

khulwako ndakhurusia mushikulu shiaNyasaye shinga eshionooneeshe;

omukerubi tsana omulindi nakhwilusia okhurula hakari wamachina komulilo.

18Khulwa obunji bwobutamaanubwo,

mubumayaanu bwobukhalabwo,

wayonoonia habunduwo hatakatifu;

ne khulwako ndarusia omulilo hakariwo,

nakwo nikukhumala;

ndakhukwisia likoshe khushialo mumoni tsia abo bosi abakhuhenganga.

19Abo bosi abakhumanya abomumbia tsiabandu bakhung'ang'aalila;

okwile owamariisia;

shiolabaho khandi ta.

Obulakusi obuyinga Sidon

20Likhuwa liOMWAMI nilinzitsila, lirie 21Mwana womundu, shiukhana ohenje Sidoni, olakule 22nosunga ori Kano niko aka Omwami NYASAYE aboola; mbu

Lola, ekhufukula, iwe Sidoni;

ne ndalalolosia oluyali lwanje hakariwo;

mana balamanya mbu isie nisie OMWAMI,

olwa ndalakhola akobukhalachi muye,

nindolosia obutakatifu bwanje muye.

23Okhuba ndalaruma oluumbe muye,

namatsayi khunjilatsie;

abafumirwa balakwitsanga hakari muye,

khulwa olukanga oluli khuye tsimbeka tsiosi,

mana balamanya mbu isie nisie OMWAMI.

24Ne khunzu yaIsiraeli, shishilabaho khandi eshisisia eshifumira kata lihwa okhubanyasia tawe, mu abo bosi ababafumbila, ababalekanga; mana balamanya mbu isie nisie OMWAMI.

25Kano niko aka Omwami NYASAYE aboola; mbu Olwa ndalaba nikhung'aasiye abeinza yaIsiraeli okhurula mumbia tsiabandu etsia basalaasibwamwo, nindolosia obutakatifu bwanje mubo mumoni tsiamahanga, mana balamenya mushialo shiabwe, eshia ndaheelesia omusumba wanje Yakobo. 26Nabo balamenyamwo shisale; toto, baloombakha tsinzu, nibaraaka emikunda chiemitsabibu, nibamenya shisale, olwa emba nikholile obukhalachi khubosi ababalekanga, ababafumbilakhwo; mana balamanya mbu isie nisie OMWAMI Nyasaye wabwe.

Currently Selected:

Ezekieli 28: OUV

Highlight

Copy

Compare