Ezekieli 26
26
Obulakusi obuyinga Tiro
1Mumuyika kwekhumi nalulala, khunyanga yambeli eyomwesi, likhuwa liOMWAMI nilinzitsila, liri 2Mwana womundu, okhuba Tiro yasunga khuYerusalemu mbu Ngako! Eshilibwa shiamahanga shirabuushe nishinzikulila; nasi ndalayindihala, olwa bulaano likwisibwa amakunda. 3Khulwako kano niko aka Omwami NYASAYE aboola; mbu Lola, enzitsa okhukhuseera, iwe Tiro; ne ndalabuusia amahanga amanji okhukhuseera, shinga inyanza olwa yibuusinjia amarunda kayo. 4Kalakwisia olukoba lwaTiro, nikalikulula eminaarachie; nasi ndalahalakara liloba elili khuye, nimukwisia olwanda olukhaya. 5Alaba habundu wokhubakalila tsikhanda, hakari munyanza; okhuba nisie ouboolile, Omwami NYASAYE aboola; naye alakwa eshiyaayo shiamahanga. 6Abakhaanabe nabo abali mumukundu baleerwa nolukanga; mana balamanya mbu isie nisie OMWAMI.
7Okhuba kano niko aka Omwami NYASAYE aboola; mbu Lola, ndalaleera khuTiro Nebukhadineza omuruchi waBabeli, omuruchi wabaruchi, okhurula enotsi, nali netsifarasi namakaari nabachendela khutsifarasi, nomukanda omukhongo kwabandu abanji. 8Aleera abakhaanabo abali mumukunda nolukanga; alaswala tsingoba okhukhuyinga, naswala nende eshituuli okhukhuyinga, nachinguula tsingabo okhukhuyinga. 9Alarenjekha emiyinichie okhutuya olukobalwo, nalikulula eminaarachio netsihaywatsie. 10Khulwa obunji bwatsio, olufu Iwetsifarasitsie lulakhufuunikha; olukobalwo lularenga khumiyindili chiabachendela khutsifarasi, netsingarangarani, namakaari, olwa aleenjila nabira mubilibwabio, shinga abandu olwa beenjila mwitaala elirabuulwe eshibanga. 11Alatubanjila tsinjilatsio tsiosi netsimbakayu tsietsifarasitsie; aleera abandubo nolukanga; natsio tsisiirotsio tsisongookhu etsiamaani tsilakwisibwa hasi. 12Balakwisia ebiobuyindabwo eshiyaayo, nebiobukhalabwo, eshioluyiitsi; balalikulula olukobalwo, nibasasia tsinzutsio tsingaasu; balasukuna amachinako netsimbaho nelitoyi mumatsi hakari. 13Nasi ndalaakamia omwoyo kwetsinyimbotsio; kata amayoosi kamachieng'iko shikalahuliilikha khandi ta. 14Ndalakhukwisia olwanda olukhaya; olaba habundu wokhubakalila tsikhanda; kata shioliumbakhwa khandi ta; okhuba isie OMWAMI nisie ouboolile, Omwami NYASAYE aboola.
15Kano niko aka Omwami NYASAYE aboolela Tiro; mbu Tsinguku shitsilarenga khulwa obuyoka bwokhukwakhwo, olwa abafumirwa babinda, obwiri nibwikhola hakariwo? 16Mana abakhulundu bosi beinyanza baleekha okhurula khubifumbi biabwe biobwami, nibara elubeka tsikanzu tsiabwe, nibeenaabula ebiifwalo biamakha; baleefwala nokhutechela; baleekhala hasi, nibatechelanga buli khase, nibakhung'ang'aalila. 17Balakhwikhuulila olwikhuulu, nibakhusunjila mbu
Mako, omuluulwe, norulile khunyanza,
iwe litookho elifumanga,
owalinji owamaani khunyanza,
iwe nabamenyanga mwiwe,
abareetsanga amariisia khubosi abamenyangamwo.
18Bulaano tsinguku tsitechela khumyanga yokhukwakhwo;
toto, ebikhalachinga ebili mumatsi bifwa omwoyo khukhuhwahokhwo.
19Okhuba kano niko aka Omwami NYASAYE aboola; mbu Olwa ndalakhukwisia likunda, shinga amataala akaramenywamwo ta; olwa ndalayembia amatsi akolusiba khwiwe, amatsi amanji nikakhufuunikha; 20habwenaho ndalakhwisia halala nende abo abeekha mubuko, khubandu bakhale, nikhumenyia mushialo musi bwene, mumakunda kakhale muno, halala nende abo abeekha mubuko, mbu oleshe okhumenywamwo kata okhuba neing'oono mushialo shiabali mwoyo ta. 21Ndalakhukwisia owamariisia, kata shiolabaho khandi ta; kata nokhaabwa orie, shiolanyoolekha khandi ta, Omwami NYASAYE aboola.
Currently Selected:
Ezekieli 26: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
