Ezekieli 25
25
Obulakusi obuyinga Amoni
1Likhuwa liOMWAMI nilinzitsila, liri 2Mwana womundu, shiukhana nohenga abaana baAmoni, nolakula khubo, 3nosunjila abaana baAmoni ori Hulile likhuwa liOMWAMI NYASAYE; kano niko aka Omwami NYASAYE nboola; mbu Okhuba mwaboola mbu Ngako! Khuhabundu wanje ahatakatifu olwa hoonoonibwa, nende khushialo shiaIsiraeli olwa shiakwisibwa likunda; nende khubeinzu yaYuda olwa baarwa mushialo; 4niko akachila, lole, ndalamuhaana mumakhono kabandu bebukwe mbu mube ababwe; balakhupa tsikambi tsiabwe mwinywe, nibakasia ebimenyo biabwe mwinywe; balalia ebiamo bieenywe nibanywa amabeele keenywe 5Ndalakwisia Raba obwayilo bwetsingamia, namataala kaAmoni, ikhonje yebiayo; mana mulamanya mbu isie nisie OMWAMI. 6Okhuba kano niko aka Omwami NYASAYE aboola; mbu Okhuba mwakhupa tsikhofi nimwikhong'onda, nimwikhoya okhufukula eshialo shiaIsiraeli nelikhobo liosi eliomumioyo chieenywe; 7niko akachila, lole, enyiilile omukhono kwanje khwinywe, nimuhaana khubamahanga, mube eshiyaayo shiabwe; ndalamukhalaka okhurula khutsimbia tsiabandu, nimusisia mubialo; ndalamumalilana; mana balamanya mbu isie nisie OMWAMI.
Obulakusi obuyinga Moabu
8Kano niko aka Omwami NYASAYE aboola; mbu Okhuba Moabu aboola mbu Lole, inzu yaYuda yinga shinga amahanga kosi; 9niko akachila, lola, ndaeekhula mumbafu mwaMoabu, okhurula khumataa ake akali khulwakho, oluyali Iweshialo, niko Betsi-yeshimotsi, naBaalimeoni naKiriatsaimu. 10Ndalashihaana, halala nabaana baAmoni, khubandu bebukwe babe ababwe, mbu abaana baAmoni bareetsulilwe mubamahanga ta. 11Khandi ndalakhola akobuyaasii khuMoabu; mana balamanya mbu isie nisie OMWAMI.
Obulakusi obuyinga Edomu
12Kano niko aka Omwami NYASAYE aboola; mbu Okhuba Edomu yafukula inzu yaYuda namala eshikwoli khuyo, naba neshikha mukhumala eshikwoli khubo; 13niko akachila kano niko aka Omwami NYASAYE aboola; mbu Ndalanyiila omukhono kwanje khuEdomu, nishikhalakakhwo abandu nemiruko; nda ashikwisia likunda okhurula eTemani; kata okhuula eDedani balakwisibwa nolukanga. 14Ndalara akeshikwoli shianje khuEdomu mumakhono kabandu banje Isiraeli; nabo balakhola muEdomu akoburima bwanje nakobululu bwanje shinga olwa buli, mana balamanya eshikwoli shianje, Omwami NYASAYE aboola.
Obulakusi obuyinga abaFilisiti
15Kano niko aka Omwami NYASAYE aboola; mbu Okhuba abaFilisiti bakholile akeshikwoli nibamala eshikwoli nelikhobo eliomumwoyo, okhulimulula mubusuku oburaakama ta, 16niko akachila kano niko aka Omwami NYASAYE aboola; mbu Lola, ndalanyiila omukhono kwanje khubaFilisiti, nikhalaka khubo abaKheretsi, nimulula eshitonye shiolukuku eshitong'ile. 17Ndalamala eshikwoli khubo nobukuumi obululu; mana balamanya mbu isie nisie OMWAMI, olwa ndalara akeshikwoli shianje mumakhono kabwe.
Currently Selected:
Ezekieli 25: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
