Ezekieli 24
24
Oluchelo khuyamuunyu eyiyia niyipapachila
1A Khandi mumuyika kwashienda, mumwesi kwekhumi nikuli ekhumi, likhuwa liOMWAMI nilinzitsila, liri 2Mwana womundu, handiika eliira lieinyanga yino, eyene neyene; omuruchi waBabeli wakheekalila Yerusalemu inyanga yino. 3Ochelele abeinzu yino yeinduli oluchelo, nobasunjila ori Kano niko aka Omwami NYASAYE aboola; mbu
Renjekha eyamuunyu khumulilo, renjekha, notsukhamwo amatsi.
4Ramwo ebitonye bieinyama,
buli shitonye eshilayi, mbu eshiatakho neshiambeli,
niwitsusiamwo amakumba amalobole.
5Bukula likondi lilobole;
sunda omulilo;
teekha muno;
kapapachile bulayi, namakumba akalimwo.
6Kho kano niko aka Omwami NYASAYE aboola; mbu Woowe khwitookho lieshitsayi, khuyamuunyu eyilimwo tsindebelende, eya tsindebelende tsiayo tsiranyala okhurulamwo ta! Rusia eyilimwo, eshitonye eshitonye; okhwela khuleshe okhubaho. 7Okhuba amabanga aka yeebeenia kali hakariwe; yakara khulwanda olukhaya; shiyakatsukha khwiloba okhukabukakhwo olufu ta. 8Nasi, okhubuusia obululu nokhumala eshikwoli, ereele amabanga aka yeebeenia khulwanda olukhaya, kaleshe okhufuunikhwa. 9Khulwako, kano niko aka Omwami NYASAYE aboola; mbu Woowe khwitookho lieshitsayi! Nasi ndalameeta eshituuli shibe eshikhongo. 10Sunda tsikhwi, meeta omulilo, teekha inyama muno, lunga bulayi; amakumba nako kasambwe. 11Mana ochikalusie khumaanda niyili ikhaya, mbu yiyiye, omukasa kwayo kusambwe, eshifwabwi shiamwo shisalulusibwe, tsindebelendenatsio tsisambwe. 12Ndeechoonyiye butswa; tsindebelende tsiayo tsinyinji shitsirusibungwamwo nomulilo ta. 13Tsindebelende tsana nobwilaasiibwo obweshifwabwi; okhuba ndakhusiiya nawe norasiiyikha ta, kho shiolasiiywa eshifwabwishio khandi ta, okhuula olwa ndalaba nihutsulusiliye obululu bwanje khwiwe. 14Isie OMWAMI nisie ouboolile; kaleekhola, nasi ndalakakhola; shindalakalukha inyuma, kata okhubeelelela, kata okhwikalukhasia ta; tsinjilatsio shinga olwa tsili, nebikholebio shinga olwa bili, nindio ndalakhuyaasia, Omwami NYASAYE aboola.
Okhufwa khwamukha Ezekieli
15Khandi likhuwa liOMWAMI nilinzitsila, liri 16Mwana womundu, lola, endi okhumubukula oyo owa oheelanga muno, neikhupa; nebutswa shioleekhuula kata okhulila kata okhuroonyia amasika ta. 17Yisia amahuumo butswa noholeelile; orakasilia omufuwo amasika ta; wibohe eshilembashio, niwifwala ebilaaro; ne orafuunikha omunwakwo, kata okhulia ebiliibwa biamasika ta. 18Kho nisungana nabandu musenya; ne khubwile omukhasi wanje nafwa; ne nibushia mukamba nikhola shinga olwa ndali nindachilwe.
19Mana abandu nibareeba mbu Shiokhakhuboolelakhwo eshisina shiamakhuwa kano khwifwe, eshichila nokholanga orio? 20Nimbasunjila mbu Likhuwa liOMWAMI linzitsiile, liri 21Sunjila abeinzu yaIsiraeli ori Kano niko aka Omwami NYASAYE aboola; mbu Lola, enzitsa okhwonoonia habundu wanje ahatakatifu, ing'oono yene yobunyali bweenywe, ahanyonya tsimoni tsieenywe naha omwoyo kweenywe kwikomba; nabo abaana beenywe abasiani nabakhaana, aba mwaleshile inyuma, balakwisibwa nolukanga. 22Neenyu mulakhola shinga isie olwa ekholile; shimulafuunikha eminwa chieenywe kata okhulia ebiliibwa biamasika ta. 23Ebilemba bilaba khumirwe chieenywe, nebilaaro mubilenje bieenywe; shimuleekhuula kata okhulila ta; ne mulahweelelela mubumayaanu bweenywe, nimubinda abeene khubeene. 24Ne nolwa Ezekieli alamubeela eshilolelo; aka akholile kosi shinga olwa kali, nolwa mulakhola; olwa kano kalaba nikeetsile, mana mulamanya mbu isie nisie Omwami NYASAYE.
25Nawe, mwana womundu, khunyanga eyo olwa ndalababukulakhwo habundu wabwe hamaani, ing'oono yabwe eyibasangaasia, ahanyonya tsimoni tsiabwe naha omwoyo kweenywe kwikomba, khandi nende abaana babwe abasiani nabakhaana, 26khunyanga eyo omundu owihonokooshe alakhwitsila, nakhuupila omunwa 27Khunyanga eyo omunwakwo kuleekushila omundu tsana owihonokooshe; olaboola, noraba omusilu khandi ta; kho olababeela eshilolelo; mana ba amanya mbu isie nisie OMWAMI.
Currently Selected:
Ezekieli 24: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
