Ezekieli 23
23
Abakhaana babili abomunzu ndala
1Likhuwa liOMWAMI nilinzitsila khandi, liri 2Mwana womundu, baliho abakhasi babili, abakhaana abomunzu ndala; 3nibakhola akobuheyi muMisiri mulubuukha lwabwe; ebweneyo tsimbeele tsiabwe tsiafwinywa, abandu nibatiilakhwo khumbeele tsiobushisila bwabwe. 4Ameera kabwe ngakano, mbu Ohola omukhulundu, nende Oholiba omwana wabwe; nibaba abanje, nibeebula abaana abasiani nabakhaana. Khukameera kabwe, Samaria niye Ohola, naye Yerusalemu, Oholiba.
5Naye Ohola yakhola akobutamba olwa yali nali owanje; ne yeelaasia khubatiabe, nibo abaAshuru, abamenyanibe, 6abeefwalanga tsingubo tsieibuluu, nibali abakafuna naboburuchi, abasooliili abeenyekha bosi, abachendelanga khutsifarasi. 7Ne yahaana obutambabwe khubo, abalobole beAshuru bosi; ne omundu yesi owa yeelaasia ninaye, yeeyonoonia neminduchie echia yeenamilanga chiosi. 8Kata shiyalekha obutambabwe obwa yakholanga okhurula khundaalo tsilia etsieMisiri ta; okhuba mulubuukhalwe bakona ninaye nibatiilakhwo khumbeele tsiolushisilalwe nibasundula akobuheyi bwabwe khuye. 9Ne niko akachila nimuhaana mumakhono kabatiabe, mbu mumakhono kabaAshuru, aba yeelaasinjia ninabo. 10Nabo nibafuunula eshihechenyeshie; babukula abaanabe abasiani nabakhaana, nibamwira ye nolukanga; kho nakwa oluchelo mubakhasi; shichila bakhola obuyaasii khuye.
11Naye Oholiba omukhaana wabwe nalola ako; nebutswa yamushila obubii mubwilaasiibwe nomubutambabwe, obwali obunji okhushila obutamba bwomukhaana wabwe. 12Yeelaasia khubaAshuru, abakafuna naboburuchi, abamenyanibe, abeefwala nibeesiaha muno, abachendelanga khutsifarasi, abasooliili abeenyekha bosi. 13Nasi nindola mbu yoonoonekha; mbu bombi balonda khunjila ndala. 14Naye nameeta butswa obutambabwe; okhuba yalola ebifwanani biabasaatsa khwisiisi, amakondo kabaKalidayo nikang'oolwa neipala, 15abeeboyile emishiipi mubishienje, nibakanyilwa ebilemba khumirwe, bosi nibalolekha shinga abakhulundu, mbu eshifwanani shiabaBabeli, abeebule beshialo shiebuKalidayo. 16Niyakhabalola, yeelaasia khubo, nabarumila abarume ebuKalidayo. 17AbaBabeli abo nibamwitsila khushitali shiobuheeli, nibamwonoonia nobuheyi bwabwe; kho nakwa owobukaali khulwabwe; omwoyokwe nikubarulakhwo. 18Nolwa yafuunula obutambabwe, nafuunula nende eshihechenyeshie; omwoyo kwanje nikumurulakhwo, shinga omwoyo kwanje olwa kwali nikurulile khumukhaana wabwe. 19Nebutswa yeenjiyia obutambabwe, niyeetsulila tsindaalo tsiolubuukhalwe, olwa yakholanga obutamba mushialo shiaMisiri. 20Yeelaasia khubatiabe aba obusaatsa bwabwe bweengana obwetsisishili, nabatsukhanga shinga tsifarasi olwa tsitsukha. 21Nolwa witsulilanga obwilaasii bwolubuukhalwo, olwa abaMisiri bakhutiilakhwo khumbeele, khulwa tsimbeele tsiolubuukhalwo.
22Niko akachila, iwe Oholiba, kano niko aka Omwami NYASAHE aboola; mbu Lola, ndalabuusia abatiabo okhukhuseera, abo aba omwoyokwo kurulilekhwo; ndalabaleera okhukhuseera tsimbeka tsiosi; 23mbu abaBabeli nabaKalidayo bosi Pekodi naShoa naKoa, nabaAshuru bosi halaia ninabo; abasooliili abeenyekha, abakafuna naboburuchi bosi, abeifuma, abachendela khutisfarasi bosi. 24Baleetsa okhukhuseera okhurula enotsi namakaari netsingarangarani, nomukanda omukhongo kwetsimbia tsiabandu; baleerenjekha okhukhuseera tsimbeka tsiosi, netsingabo nebikhumba netsikuutwa; ne ndalahaana obukhalachi mumakhono kabwe; nabo balakhalaka akoko, obuyaasii bwabwe shinga olwa buli. 25Ndalaraho imbalikha yanje okhukhufukula; nabo balakhukholela nobululu; balakhurema amoolu nebirwi; abandubo abatong'a balakwa khulwa olukanga; balabukula abaanabo abasiani nabakhaana; mana abandubo abatong'a, omulilo kulabalia kutu. 26Khandi balakhunaabula tsingubotsio, nibabukula ebimilibio ebilayi. 27Nindio ndalaakamia obwilaasiibwo mwiwe, nobutambabwo oburula mushialo shiaMisiri, mbu oleshe okhubachinguulila tsimoni kata okhwitsulila Misiri khandi ta. 28Okhuba kano niko aka Omwami NYASAYE aboola; mbu Lola, ndalakhuhaana mumakhono ka abo aba okiyanga, abakhusinya; 29nabo balakhukholela nobukiyi, nibabukula ebiobunyakhanibwo bwosi, nibakhulekha noli eshihechenye, omukhaya; kata eshihechenye shiobutambabwo shilafuunulwa, obwilaasii nobutambabwo bwosi. 30Ako kosi kakhwikholilekhwo okhuba watsia mubutamba okhulonda khubamahanga, khandi shichila wakwa owobukaali khulwa emindu chiabwe echiinamilungwa 31Walonda khunjila yomukhaana weenywe; niko akachila ndalahaana eshikombeshie mumukhonokwo. 32Kano niko aka Omwami NYASAYE aboola; mbu
Olanywa khushikombe shiomukhaana weenywe,
eshili eshikhongo, eshiitsulamwo amanji;
olatseshelelwa nonyokhoosibwa,
shichila shilimwo amanji.
33Oleetsusibwa obumeesi neshibeela;
eshikombe shiamariisia nokhufwa; omwoyo nishio eshikombe shiomukhaana weenywe Samaria.
34Olashinyweela elala kupu,
nonyanya tsinjio tsiashio niwimaanya tsimbeele;
nisie ouboolile, Omwami NYASAYE aboola.
35Khulwako kano niko aka Omwami NYASAYE aboola; mbu Shichila wanzibilila niusukuna emukongowo, kho wituushe obukuumwi bwobwilaasiibwo nobutambabwo.
36OMWAMI nameeta niyasunjila mbu Mwana womundu, olayaasia Ohola nende Oholiba? Kho obarumbulile akebisinyo biabwe. 37Okhuba baheyanga, khandi amabanga kali khumakhono kabwe; bakholile akobuheyi nemindu echia beenamilanga; khandi abaana babwe aba banzibulila, babahaanila emindu tsana mbu chibalie. 38Khandi bameetile nibakholela lino; mbu bayoonoonia habundu wanje ahatakatifu khunyanga tsana niboonoonia tsisabato tsianje. 39Okhuba olwa bali nibamalile okhwirila emindu chiabwe tsana abaana babwe, mana khunyanga yeneyo nibeenjila habundu wanje ahatakatifu okhuhoonoonia; ne lola, nolwa bakholile hakari weinzu yanje. 40Khandi barumaane abandu abarula ehale; barumiilwe omurume ne mbabo beetsile; nawe niwiyosia khulwabwe, niwibakha iranji khumoni, niwisiaha ebimili, 41niwikhala khushitali eshieing'oono, neimeesa eyakasibwa imbeli washio; ne khubwenokhwo norenjekhakhwo amalesi kanje kelibuuliesi namafura kanje. 42Oluyoka lwomukanda kwabandu abeelambisii lwali ninawe; nahalala nabasaatsa abarakaasakhwo ta abandi baleerwa, abameesi abarula mushitsiimi; nabo nibara emikasa khumakhono kabakhasi tsana, netsisimbi tsing'oonefu khumirwe chiabwe.
43Nisunga mbu Abasaatsa abo shibaheyanga olwa bakhola ninaye akobutamba? 44Okhuba beenjiile ewa ali shinga abamutsiila omutamba; nolwa bali nibeenjilanga ewaOhola naOholiba, abakhasi abo abeelaasii. 45Ne abandu abalunjishi balabayaasia shinga abakhasi abaheyi olwa bayaasibungwa, nabakhasi abaraatsia amabanga; shichila nabaheyi, ne amabanga kali khumakhono kabwe.
46Okhuba kano niko aka Omwami NYASAYE aboola; mbu Buusia omukhung'aano khubo, nobakwisia eshiriisio nende eshiyaayo. 47Abomukhung'aano tsana balabalasa namachina, nibabarema netsinganga tsiabwe; baleera abaana babwe abasiani nabakhaana, nibasamba tsinzu tsiabwe nomulilo. 48Nolwa ndalaakamia obwilaasii mushialo, mbu abakhasi bosi bachesihe, nibaralonda khubwilaasii bweenywe ta. 49Mularungwa khulwa obwilaasii bweenywe, ne muleetuukha obukuumwi bwebionoono biemindu tsana echia mwinamilanga; mana mulamanya mbu isie nisie Omwami NYASAYE.
Currently Selected:
Ezekieli 23: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
