Ezekieli 22
22
Ebionoono biaYerusalemu
1Khandi likhuwa liOMWAMI nilinzitsila, liri 2Nawe, mwana womundu, olayaasia noho? Olayaasia litookho lieshitsayi? Kho omumanyie ebisinyobie biosi. 3Nosunje ori Kano niko aka Omwami NYASAYE aboola; mbu Litookho eliraatsinjia amatsayi hakari walio, mbu induukho yalio yule, nilikholanga emindu echiinamilungwa okhwiyonoonia, ndielo! 4Okwile oweshiuku khulwa amabanga aka waraatsia, nokwa owobukaali khulwa emindu eshia wakhola okhwinamila; wasitiye induukhoyo ahambi, eshise shiemiyikachio shiulile; khulwako ndakhukwisiye linyeko khumahanga, owokhunyokhoosibwa khubialo biosi. 5Abali ahambi nende abali ehale ninawe, bosi balakhunyokhoosia, iwe oweifuma imbii, owitsuulemwo obukoyaani.
6Lola, abakhulundu baIsiraeli ababeetsanga mwiwe, buli mundu obunyalibwe shinga olwa buli, bareelekhwo omwoyo okhuraatsia amabanga. 7Mwiwe abandu bafwolanga basamwana nabanyina; hakari mwiwe abarende bamiinungwa; mwiwe bakholelanga ababisandu nabakhasi abalekhwa obubii. 8Wafwolanga ebindu bianje ebitakatifu, niwonoonia tsisabato tsianje. 9Abandu baliho mwiwe abachiikhanga khulu a okhuraatsia amatsayi; balimwo abaliitsanga khutsingulu; ne hakari mwiwe bakholanga akobwilaasii. 10Mwiwe abandu bafuunulanga ebihechenye biabasamwana; mwiwe boonooninjia omukhasi owobukaali nali mwibilu. 11Alimwo owakhola eshisinyo nomukhasi wabeene; oundi owakhola obwilaasii niyonoonia nyakhufialanyene; oundi khandi mwiwe yoonoonia mbootsonyene, omwana wasamwana. 12Mwiwe abandu babukulanga eshiomufuusi okhuraatsia amatsayi; kata iwe obukulanga injelesio namameeto, niwinyoolela inganga khubamenyanibo khulwa obusandii, niunzibilila isie, Omwami NYASAYE aboola.
13Khulwako, lola, ndikhong'onda amakhono khulwa inganga yoburana eya wanyoola, nokhulwa amatsayi akabeetsanga hakari mwiwe. 14Omwoyokwo kunyala okhusimbiila, kata amakhonoko okhutinya, mundaalo tsilia olwa ndalakhukholelakhwo? Isie OMWAMI nisie ouboolile, ne ndalakhola. 15Ndalakhusalaasia mumahanga nikhukabula mubialo; ne ndalaakamia eshifwabwishio eshili mwiwe. 16Nasi ndaloonoonibwa khululwo mumoni tsiamahanga; mana olamanya mbu isie nisie OMWAMI.
17Likhuwa liOMWAMI nilinzitsila, liri 18Mwana womundu, inzu yaIsiraeli yingwiliile limuma; abo bosi bali omukasa neibaati neshibia netsisasi, mumulilo kwoburuli; bali butswa amamuma. 19Khulwako, kano niko aka Omwami NYASAYE aboola; mbu Okhuba mukwile amamuma mwesi, kho lole, ndalamukhung'aasia hakari weYerusalemu. 20Shinga olwa bakhung'aasia ifeetsa nomukasa neshibia netsisasi neibaati mumulilo kwoburuli, okhubihutsila omulilo khubisalulusie, nindio ndalamukhung'aasia muburima bwanje nomubululu bwanje, nimwalisiamwo nimusalulusia. 21Toto, ndalamukhung'aasia, nimufuurila omulilo kwoburima bwanje, mana mulasalulushila hakari wakwo. 22Shinga ifeetsa olwa yisalulushila mumulilo kwoburuli, nolwa mulasalulushila hakari wakwo; mana mulamanya mbu isie OMWAMI emusunduliile obululu bwanje.
23Likhuwa liOMWAMI nilinzitsila, liri 24Mwana womundu, omuboolele mbu Oli eshialo eshiralabiibwe kata okhukwisilibwa ifula khunyanga yobusinyishi ta. 25Abakhulundube hakariwe beenga shinga tsitalanyi etsihoola, etsirandula eshioluyiitsi; baliile obulamu bwabandu bulia; babukuule ebiobuyinda nebindu biolukoosi; bakholile abakhasi abanji babe abalekhwa hakariwe. 26Abakuhanibe bakholeele amalako kanje akamahababa, niboonoonia ebindu bianje ebitakatifu; shibaahukhasinjia ebili ebitakatifu nende ebirali ebitakatifu ta; kata shibeechesiye abandu okhwahukhasia ebiomusilo nende ebisiiyikhu ta; ne bafwolile tsisabaato tsianje; nasi enzonoonibungwa hakari wabwe. 27Abakhulundube hakariwe beengana ebisuutse nibirandula eshioluyiitsi; baraatsia amabanga nibatibia obulamu bwabandu khulwa okhwinyoolela inganga yoburana. 28Khulwabo abanabiibe bahoomile olufuyo, nibabalolela amakhaya, nibabalakulila akobubeeyi, bari Kano niko aka Omwami NYASAYE aboola; ne OMWAMI shiaboolilekhwo ta. 29Abandu beshialo beekhoonyela obumiini nibakhola obwibi; toto, banyasinjia abamanani abatakha, nibamiina abarende munjila eyirali habwene ta. 30Ne ndakhaaba mubo omundu owakhakasia olukoba nasinjila mushibanga imbeli wanje khulwa eshialo, mbu endeshe okhushimulula; ne shindanyoola omundu ta. 31Khulwako ndabasunduliile obusinyishi bwanje; ndabamalilaane nomulilo kwoburima bwanje; injila yabwe abeene, ndachikalusiye khumirwe chiabwe, Omwami NYASAYE aboola.
Currently Selected:
Ezekieli 22: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
