Ezekieli 20
20
Aka Nyasaye yakholela Isiraeli
1Mumuyika kwomusaafu, mumwesi kwakharaano nikuli ekhumi, abandi abokhubakofu baIsiraeli nibeetsa okhureeba khuMWAMI; nibeekhala imbeli wanje. 2Likhuwa liOMWAMI nilinzitsila, liri 3Mwana womundu, sungana nabakofu baIsiraeli nobaboolela ori Kano niko aka Omwami NYASAYE aboolambu Mwitsile okhureeba khwisie noho? Isie uno! Omwami NYASAYE aboola, shinyala okhureebwakhwo nineenyu ta. 4Olabayaasia, mwana womundu, olabayaasia noho? Kho obamanyie ebisinyo biabasaabwe shinga olwa bili, 5nobasunjila ori Kano niko aka Omwami NYASAYE aboola; mbu Khunyanga eya ndalobolelakhwo Isiraeli, ndachinguula omukhono okhwitsubila olwibulo lweinzu yaYakobo, nindimanyia khubo mushiulo shiaMisiri, olwa ndabachinguulila omukhono nimbeetsubila mbu Isie nisie OMWAMI Nyasaye weenywe. 6Khunyanga eyo ndabachinguulila omukhono ninditsuba mbu ndakhabarusia mushialo shiaMisiri, nimbeenjisia mushialo eshia ndabakhaabila, eshia amabeele nende obuushi biashilamwo, eshialo eshishila ebindi biosi oluyali. 7Nimbasunjila mbu Sukune ebisinyo ebio ebichamisinjia tsimoni tsieenywe, buli mundu khwinywe, nimureeyonoonia nemindu echiinamilungwa echieMisiri ta; isie nisie OMWAMI Nyasaye weenywe. 8Nebutswa bakhaya, nibaloba okhumbulila; kata shibasukuna buli mundu ebisinyo ebiachamisinjia tsimonitsie, kata okhwibala emindu echiinamilungwa echieMisiri ta.
Mana nisunga mbu ndakhasundula obululu bwanje khubo, ninzusia oburima bwanje khubo hakari weshialo shiaMisiri. 9Nebutswa ndakhola khulwa eliira lianje, mbu lileshe okhwonoonibwa mumoni tsiamahanga aka bali hakari wako, aba ndali nindimanyiyekhwo, nimbarusia mushialo shiaMisiri. 10Kho ndabarusia mushialo shiaMisiri, nimbayila mushitsiimi. 11Ndabaheelesia amalako kanje, nimbamanyia obukhalachi bwanje, ebia omundu alaba mwoyo khubio naba nabikholanga. 12Khandi nimbaheelesia tsisabato tsianje tsibe eshilolelo hakari wanje ninabo, mbu bamanye shinga olwa endi isie OMWAMI oubaahula. 13Nebutswa abeinzu yaIsiraeli bakholela induli mushitsiimi; shibachenda mumalako kanje ta, ne baloba obukhalachi bwanje, ebia omundu alaba mwoyo khubio naba nabikhoIanga. Kata tsisabato tsianje batsionoonia muno. Mana nisunga mbu ndakhabasundulila obululu bwanje mushitsiimi nimbamalilana. 14Nebutswa ndakhola khulwa eliira lianje, mbu lileshe okhwonoonibwa mumoni tsiamahanga ako aka ndabarusiayo mumoni tsiako. 15Khandi ndabachinguulila omukhono mushitsiimi ninditsuba mbu shindakhabeenjisia mushialo eshia ndabaheelesia, eshia amabeele nende obusuhi biashilamwo, eshishila ebindi biosi oluyali, ta. 16Shi chila baloba obukhalachi bwanje, nibarachenda mumalako kanje ta, niboonoonia tsisabato tsianje; okhuba emioyo chiabwe chialondanga khumindu tsana echia beenamilanga. 17Ne kata kario, imoni yanje yababeelelela, nindabamalilana kata okhubatibilia elala mushitsiimi ta.
18Khandi ndasunjila abaana babwe mushitsiimi mbu Murachenda mumalako kabaseenywe, kata okhulinda obukhalachi bwabwe, kata okhwiyonoonia nemindu tsana echia beenamilanga ta 19Isie OMWAMI nisie Nyasaye weenywe; chendenje mumalako kanje, nimulinda akobukhalachi bwanje, nimukakhola. 20Mwahulenje tsisabato tsianje; natsio tsilaba eshilolelo hakari wanje nineenywe, mbu mumanye shinga olwa isie OMWAMI endi Nyasaye weenywe. 21Nebutswa abaana abo nibakholela induli; shibachenda mumalako kanje ta, kata okhulinda akobukhalachi bwanje okhukakhola, ebia omundu alaba mwoyo khubio naba nabikholanga; khandi niboonoonia tsisabato tsianje.
Mana nisunga mbu ndakhasundula obululu bwanje khubo, ninzusia oburima bwanje khubo mushitsiimi. 22Nebutswa ndamala nirusiakhwo omukhono, nikhola khulwa eliira lianje, mbu lileshe okhwonoonibwa mumoni tsiamahanga ako aka ndabarusiayo mumoni tsiako. 23Khandi ndabachinguulila omukhono mushitsiimi, ninditsuba mbu ndakhabasalaasia mumahanga, nimbakabula mubialo, 24shichila shibali nibakholanga akobukhalachi bwanje ta, ne bali nibalobile amalako kanje niboonoonia tsisabaato tsianje; tsimoni tsiabwe natsio tsiali nitsihenganga emindu echia abasamwana beenamilanga. 25Khandi ndabaheelesia amalako akarali amalayi nobukhalachi obwa baranyala okhuba mwoyo khubwo ta; 26nimboonoonia mubihaanwa biabwe abeene, olwa babisia mumulilo abeekulanda bosi, mbu mana embariisie muno, bamanye mbu isie nisie OMWAMI.
27Khulwako, mwana womundu, sungana nabeinzu yaIsiraeli, nobasunjila ori Kano niko aka Omwami NYASAYE aboola; mbu Mukano khandi abaseenywe banyechile, nibakholela akobukhayi. 28Okhuba olwa ndali nimbeenjisiye mushibala tsana eshia ndachinguula amakhono ninditsuba ndakhabaheelesia, bahenjelesia buli shikulu eshirambi nabuli musaala omutendeemu, nibamalilayo emisango chiabwe, khandi ebweneyo nibahaanilayo ebihaanwa biabwe biobusinyisii; khandi ebweneyo nibatuumilia isiakakha yabwe, nibatsushiilila emisango chiabwe echiokhutsushila. 29Kho nimbareeba mbu Habundu yaho aheechingu aha mutsiitsanga halangwa harie? Iiho nihalangwa mbu Bamal okhuula olwa leelo. 30Khulwako osunjile abeinzu yaIsiraeli ori Kano niko aka Omwami NYASAYE aboola; mbu Kho mwiyonoonia shinga abaseenywe olwa beeyonoonia noho? Khandi mutsia mubuheyi bwokhulonda ebisinyo biabwe? 31Olwa muba nimuhaana ebihaanwa bieenywe, nimubisia abaana beenywe mumulilo, kho mwiyonooninjia nemindu chieenywe chiosi echia mwinamilanga, okhuula olwa leelo. Nasi ndakhanyala okhureebungwa nineenyu, noho, inywe abeinzu yaIsiraeli? Isie uno! Omwami NYASAYE aboola, Shinyala okhureebwakhwo nineenyu ta.
32Aka mupaaranga mumioyo chieeny ve shlkeetsa okhwikhola ta; olwa muboolanga mbu Khulaba shinga amahanga, shinga tsimbia etsiomubialo, okhwinamila ebiemisaala namachina.
33Isie uno! Omwami NYASAYE aboola, Nomukhono kwamaani, nomukhono okunyiililwe, nobululu obusundulwa, ndalaba omuruchi oumuruka. 34Ndalamurusia mumbia tsiabandu nimukhung'aasia okhurula mubialo ebia mwasalaasibwamwo, nomukhono kwamaani, nomukhono okunyiililwe, nobululu obusundulwa; 35nimuyila mushitsiimi shietsimbia tsana, ninyenesanila nineenyu ebweneyo, mumoni khumoni. 36Shinga olwa ndeenesana nabakuuka beenywe mushitsiimi shieshialo shiaMisiri, nolwa ndaleenesana nineenyu, Omwami NYASAYE aboola, 37Ndalamubisilia hasi weindabushi, nimwinjisia nimubasia, 38nimusiiyila elala nirusia mwinywe abeinduli, nende abo abakhayanga; ndalabarusia mushialo eshia bamenyangamwo, nebutswa shibaleenjila mushialo shiaIsiraeli ta; mana mulamanya mbu isie nisie OMWAMI. 39Neenyu, inywe abeinzu yaIsiraeli, kano niko aka Omwami NYASAYE aboola; mbu Tsie, mukhalabanile buli mundu emindu echia yeenamilanga, kata bulaano kata nende olunyuma, nimuba nimurachama okhumbulila ta; ne shimuloonoonia eliira lianje litakatifu nebihaanwa bieenywe nemindu chieenywe echia mwinamilanga khandi tawe. 40Okhuba mulukulu lwanje olutakatifu, khubutenje bwolukulu lwaIsiraeli, Omwami NYASAYE aboola, Ebweneyo bosi abeinzu yaIsiraeli, bosi pe, balakhalabanilanga mushialo; ebweneyo newa ndalabafuchiilila, khandi ebweneyo newa ndaleenyela ebihaanwa bieenywe, nebihaanwa bieenywe ebikhulundu, nebindu bieenywe ebitakatifu biosi. 41Shinga isiakakha ndalamufuchiilila, olwa ndalamurusia mutsimbia tsiabandu, nimukhung'aasia nimurusia mubialo ebia mwasalaasibwamwo; nasi ndalalolosia obutakatifu bwanje mwinywe, mumoni tsiamahanga. 42Mana mulamanya mbu isie nisie OMWAMI, olwa ndalamwinjisia mushialo shiaIsiraeli, mushialo tsana eshia ndachinguula omukhono ninditsuba okhuheelesia abakuuka beenywe. 43Ebweneyo muleetsulila tsinjila tsieenywe, nende ebikhole bieenywe biosi ebia mweeyonoonia ninabio; ne muleesinya abeene, khulwa tsimbii tsieenywe tsiosi etsia mwakholilenje. 44Mana mulamanya mbu isie nisie OMWAMI, olwa ndalaba nikholile khwinywe emilimo khu lwa eliira lianje; ne akakhoyela tsinjila tsieenywe tsimbii, kata akakhoyela ebikhole bieenywe ebimayaanu ta, iny ve abeinzu yaIsiraeli, Omwami NYASAYE aboola.
Obulakusi obuyinga abeisautsi
45Likhuwa liOMWAMI nilinzitsila, liri 46Mwana womundu, choomia tsimonitsio okhuhenga enasautsi, niwilwatsa enasautsi, nolakulila omutsuru kweshialo shiaNegebu, 47nosunjila omutsuru kwaNegebu ori Hulila likhuwa liOMWAMI; kano niko aka Omwami NYASAYE aboola; mbu Lola, ndalahambilia omulilo mwiwe, nakwo kulalia buli musaala omutendeemu, nende buli musaala omuumu. Tsimemu tsiomulilo etsiatukhanga shitsilasimibwa ta; ne mumoni mwabandu bosi, okhurula esautsi okhuula enotsi, mulasambwa khulwatsio. 48Nabo abandu bosi balalola mbu isie OMWAMI nisie oukuhambiye; shikulasimibwa ta. 49Mana nisunga mbu E Omwami NYASAYE! Baboolanga khwisie mbu Ne shiali omucheli wetsinjelo?
Currently Selected:
Ezekieli 20: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
