Ezekieli 18
18
Omwoyo okwonoonanga, okwene kulafwa
1Likhuwa liOMWAMI nilinzitsila khandi, liri 2Muboolanga murie nimwikhoonyela oluchelo luno khukeshialo shiaIsiraeli, mbu Abasamwana baliile tsinzabibu tsiobwanya, ameeno kabaana nikafwa? 3Isie uno! Omwami NYASAYE aboola, shimuleekhoonyela oluchelo luno muIsiraeli khandi ta. 4Lole, emioyo chiosi nechianje; shinga omwoyo kwasamwana, nindio omwoyo kwomwaula kwosi nokwanje; omwoyo okwonoonanga, okwene kulafwa.
5Nebutswa omundu naba nali omulunjishi nakholanga akafuchiililwa, akali habwene, 6ne naraliilekhwo khutsingulu, kata okhuchinguulila emindu echiinamilungwa echieinzu yaIsiraeli tsimoni, kata okhwonoonia omukhasi wabeene kata okhusita ahambi khumukhasi ouli mubukaalibwe ta, 7naba naramiina omundu yesi ta, habula okhukalusilia omwikobi omusingokwenaba narayaaya ebindu namahababa ta, habula okhukabila abali inzala ebiliibwabie, namufwala ingubo oyo ouli eshihechenye; 8omundu ourayinia ebindu niyeenya injelesio, kata okhubukula amameeto kosi ta; ourusia omukhonokwe khukobumayaanu, nakhola akobuyaasii bwatoto hakari womundu nowashie, 9nachendanga mumalako kanje, nakholanga akobukhalachi bwanje, mbu okhukholanga akatoto; kho oyo nomulunjishi; okhuba mwoyo, alaba mwoyo, Omwami NYASAYE aboola.
10Naba niyeebula omwana ouli omunyaka, ouraatsia amatsayi, nakhola likhuwa kata elala khukano, 11ne narakhola likhuwa liosi eliokhukalia ta; habula ouliitsanga khutsingulu niyoonoonia omukhasi wabeene, 12namiina ababisandu abatakha, nayaaya ebindu namahababa, narakalusinjia omusingo ta; ouchinguulila emindu echiinamilungwa tsimonitsie, nakhola ebisinyo, 13nayinia ebindu niyeenya injelesio nabukula amameeto; kho oyo alaba mwoyo noho? 'A, shialaba mwoyo ta; yakholanga ebisinyo ebio biosi; okhufwa alafwa; amabangake kalaba khuye omwene.
14Nebutswa lole, naba niyeebula omwana oulola ebionoono bisoi biasamwana ebia yakhoanga, naria, narakholakhwo ario ta; 15ouraliitsanga khutsingulu ta, kata okhuchinguulila emindu echiinamilungwa echieinzu yaIsiraeli tsimoni, kata okhwonoonia omukhasi wabeene, 16kata okhumiina omundu yesi, kata okhubukula omusingo kwosi, kata okhuyaaya namahababa ta, habula okhukabila abali inzala ebiliibwabie, namufwala ingubo oyo ouli eshihechenye; 17ourusiye omukhonokwe khukobumayaanu, narabukula injelesio kata amameeto ta; oukhola akobuyaasii bwanje nachenda mumalako kanje; oyo shialafwa khulwa obumayaanu bwasamwana ta; okhuba mwoyo alaba mwoyo. 18Nebutswa samwana, okhuba yamiinanga nabula tsimbabasi, nayaaya ebiomwana wabwe namahababa, nakholanga akarali amalayi ta mubandube, lole, alafwa khulwa obumayaanubwe.
19Nebutswa mureebanga mbu Nishiina eshichila omwana narakuumilwa obumayaanu bwasamwana ta? Olwa omwana aba nakholile akafuchiililwa, akali habwene, nokhulinda amalako kanje nakakhola, okhuba mwoyo alaba mwoyo. 20Omwoyo okwonoonanga, okwene kulafwa; omwana shialakuumilwa obumayaanu bwasamwana, kata samwana okhukuumilwa obumayaanu bwomwanawe ta; obulunjishi bwomulunjishi bulaba khuye, nabwo obubii bwomubii bulaba khuye.
Injila yaNyasaye neinunjishi
(Ezek. 33.10-20)
21Ne omubii naba nashiukhana narula khubionoonobie biosi ebia yakholanga, nalinda amalako kanje kosi, nakhola akafuchiililwa, akali habwene, okhuba mwoyo alaba mwoyo; shialafwa ta. 22Kata obukhayibwe bwosi bwosi obwa yakhola shibuleetsulilwa khuye ta; mubulunjishibwe obwa yakholile alaba mwoyo. 23Omwami NYASAYE areeba mbu Nasi, okhufwa khwomubii khunjamisinjia noho? Ne shindakhachama mbu ashiukhane okhurula khunjilaye abe mwoyo? 24Ne omulunjishi naba nashiukhana okhurula khubulunjishibwe nakhola obumayaanu, nalonda khubisinyo biosi ebia omubii akholanga, ye alaba mwoyo noho? Obulunjishibwe bwosi bwosi obwa yakhola shibuleetsulilwakhwo ta; mukhubula obwisiikwa nomubwonoonibwe obwa yoonoonelanga, alafwila mubio.
25Nebutswa muboolanga mbu Injila yOMWAMI shiyili ineng'aafu ta. Hulile bulaano, inywe abeinzu yaIsiraeli; mbu injila yanje shiyili ineng'aafu ta? Ne shitsili tsinjila tsieenywe etsibula obuleng'aafu? 26Olwa omulunjis hi aba nashiukhana okhurula khubulunjishibwe nakhola obumayaanu, alafwa khulwabwo; alafwa khulwa obumayaanubwe obwa aba nakholile. 27Khandi omundu omubii naba nashiukhana okhurula khububiibwe obwa yali nakholanga, nakhola akafuchiililwa, akali habwene, aleehonia abe mwoyo. 28Shichila aba nayililisiye, nashiukhana okhurula khubukhayibwe bwosi obwa yali nakholanga, kho okhuba mwoyo alaba mwoyo; shialafwa ta. 29Nebutswa abeinzu yaIsiraeli baboola mbu Injila yOMWAMI shiyili ineng'aafu ta. E inywe abeinzu yaIsiraeli, injila yanje shiyili ineng'aafu? Ne shitsili tsinjila tsieenywe etsibula obuleng'aafu? 30Khulwako ndalamuyaasia, inywe abeinzu yaIsiraeli, buli mundu tsinjilatsie shinga olwa tsili, Omwami NYASAYE aboola. Mwikalukhasie, nimushiukhana okhurula khubukhayi bweenywe bwosi, mbu obumayaanu buleshe okhumwisichirasia. 31Mwibale obukhayi bweenywe obwa mukhayanga, nimwinyoolela omwoyo omuyia neiroho imbia; nishiina eshichila nimwenya okhufwa, inywe abeinzu yaIsiraeli? 32Okhuba okhufwa khwa oyo oufwa shikhunjamisia ta, Omwami NYASAYE aboola; khulwako, mwikalukhasie, mube mwoyo.
Currently Selected:
Ezekieli 18: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
