Ezekieli 17
17
Oluchelo Iwetsinditsu nende omutsabibu
1Likhuwa liOMWAMI nilinzitsila liri 2Mwana womundu, leera omunehe, nochela oluchelo khubeinzu yaIsiraeli; 3osunje mbu Iiano niko aka Omwami NYASAYE aboola; mbu Inditsu ikhongo muno eyali netsimbaha tsikhongo nemiiro emirambi, eyamabaha amanji kamakondokondo, yeetsa eLebanoni niyikhalaka omurwe kwomusiita niyibukula; 4niyinokakhwo olusaka lulala olwokhutsinyelele, olwali hekulu, niyiluyila mushialo shiobukhala, niyiluraaka mwitookho liabeinganga. 5Khandi niyibukula eyokhumwo yeshialo, niyichiraaka mushilundu shietsimwo, niyichira aha amatsi kali amanji. Yachiraaka shinga indombo yolubaya. 6Nayo niyimela, niyiba omusaala okulanda, omwimbichiti, okwe tsisaka tsiakwo tsiachooma khuye, eshisina shiakwo nishitong'a hasi wakwo. Nikukwa omusaala okulanda, nikurusia tsisaka nikusebukha tsindombo.
7Ne yaliho inditsu yindi ikhongo, eyali netsimbaha tsikhongo namabaha amanji; ne lola, omusaala tsana kwakotia emisi chiakwo okhuchooma khuyo, tsisaka tsiakwo nitsisebukha nitsichooma khuyo, okhurula khushilundu eshia kwaraakwamwo, mbu yikutsushiilila amatsi. 8Mana nikuhuyibwa nikuraakwa mwiloba linulu liamatsi amanji mbu kurusia tsisaka nikwama ebiamo nikuba omusaala omukaasu. 9Kho osunje ori Kano niko aka Omwami NYASAYE areeba; mbu Kulakaasa noho? Shialasiula emisi chiakwo, nahalula ebiamo biakwo, amasaafu kakwo amatendeemu kosi nikaniala? Mana shikwakheenya omukhono kwamaani muno kata abandu abanji okhukwiha nemisi chiene ta. 10Ne lola, nikuhuyibwa nikuraakwa kulakaasa noho? Shikulanialila elala olwa omuyeka kwebukwe kukutiilakhwo? Mbula, kulanialila mubilundu ewa kwamelela.
11Iihandi likhuwa liOMWAMI nilinzitsila, liri 12Bulaano osunjile abeinzu eyo yeinduli, ori Shimumanyile eshisina shiamakhuwa ako? Obaboolele mbu Lole, omuruchi waBabeli yayeetsile eYerusalemu, nahamba omuruchi walio nabakhulundu balio natsia ninabo eBabeli; 13nabukula omundu khubomunzu yomuruchi nalakana ninaye indakano namwitsubia eshiitsubo. Ne yali nabukuule abali abakhulundu mushialo nabayila, 14mbu obwami bwisibwe hasi, niburachinguukha ta; habula mbu businjile khulwa okhulindanga indakanoye. 15Nebutswa yamukholela induli naruma abarumebe eMisiri, mbu bamukhoonye netsifarasi nabandu abanji. Kho alakaasa noho? Oukhola akafwana kario yakheehonokokha noho? Aloonoonia indakano mana yeehonokoshe? 16Isie uno! Omwami NYASAYE aboola, Toto mwene, ewa omuruchi tsana amenyanga owamwemekha ye abe omuruchi, owa yaleka eshiitsuboshie niyoonoonia indakanoye, ebweneyo eBabeli niho aha alafwila. 17Kata Farao nelihelie liamaani nomukandakwe omukhongo shialamuhabina mwihe ta, olwa baswala ebituuli netsingoba khulwa okhwira abandu abanji. 18Okhuba yaleka eshiitsubo niyoonoonia indakano; ne lole, yali napataane ninaye amakhono, nebutswa nakhola ako kosi; shialeehonokokha ta. 19Khulwako, kano niko aka Omwami NYASAYE aboola; mbu Isie uno! Toto mwene, eshiitsubo shianje eshia yalechile, neindakano yanje eya yoonooniye, ndalabirunga khumurwekwe. 20Ne olurimba lwanje ndalalwala khuye, naye alahambwa mushireko shianje; ndalamuyila eBabeli, nimuyaasilia ebweneyo khulwa obukhayibwe obwa yakhaya. 21Nabo abaseeribe abalayi abelihebe, balakwisibwa nolukanga; nabo abalaba nibasikaale balasalaasilibwa enabuli muyeka; mana mulamanya shinga olwa endi isie OMWAMI ouboolile.
22Kano niko aka Omwami NYASAYE aboola; mbu Nasi ndalabukula olusaka oluli khumurwe kwomusiita omurambi, ninduraaka; ndalanoka akhasaka akhatoro akhokhutsinyelele etsili hekulu, nikharaaka khushikulu eshirambi eshichinguukhu. 23Khubutenje bweshikulu shiaIsiraeli newa ndalakharaaka; nakho khalarusia tsisaka nikhaama ebiamo, nikhaba omusiita omukaasu; kata amanyonyi ketsimbia tsiosi kalamenya mushiinikha shiakwo; kalamenya mushiinikha shietsisaka tsiakwo. 24Nachio emisaala chiosi echiomubulimo chilamanya shinga isie OMWAMI olwa ndeesiye omusaala omurambi, ninjinguula omusaala okuli hasi, ninyumia omusaala omutendeemu nindendeemia omusaala omuumu; isie OMWAMt nisie ouboolile, nikhola.
Currently Selected:
Ezekieli 17: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
